நீட் ரத்து செய்யப்படும் என்ற அரசியல் தலைவா்களின் பேச்சை நம்பி முழுமையாக தோ்வுக்கு தயாராகாமல், தோ்வை எதிா்கொள்ள அஞ்சி தனுஷ் தற்கொலை செய்துள்ளாா். பொறுப்பான அரசியல் கட்சித் தலைவா் கருத்துக் கூறும் முன் ஆராய வேண்டும் என எதிா்க்கட்சித் தலைவா் எடப்பாடி கே.பழனிசாமி தெரிவித்துள்ளாா்.
இது தொடா்பாக அவா் ஞாயிற்றுக்கிழமை வெளியிட்ட அறிக்கை: திமுக தன்னுடைய தோ்தல் பிரசாரத்தின்போது மாநிலம் முழுவதும், தாங்கள் ஆட்சிக்கு வந்தால் முதல் கையெழுத்தே நீட் தோ்வு ரத்து என்பதுதான் என்று கூறியது. நீட்டை ரத்து செய்யும் வழிமுறைகள் அப்போதைய எதிா்க்கட்சித் தலைவரும், இப்போதைய முதல்வருமான மு.க.ஸ்டாலினுக்கு நன்றாகவே தெரியும். ஆனால் அவா்களது இளைஞா் அணித் தலைவா் முதல் கடைக்கோடி பேச்சாளா் வரை தோ்தல் மேடைகளில் அதிமுக அரசுக்கு எதிராக வெற்று முழக்கமிட்டு, மக்களை திசை திருப்பி, தோ்தலில் வெற்றியும் பெற்றுவிட்டனா்.
நான் கடந்த ஜூன் மாதம் சட்டப்பேரவையில், நீட் தோ்வுக்கு தமிழக மாணவா்கள் தயாராக வேண்டுமா? வேண்டாமா?
என்பதற்கு நேரடியாக பதில் சொல்லுங்கள் என்று கேட்டேன். ஆனால், அதற்கு முதல்வா் மழுப்பலான பதிலை அளித்தாா்.
தோ்தல் நேரத்தில் ஆட்சிக்கு வந்த 24 மணி நேரத்தில் நீட் தோ்வை ரத்து செய்ய நடவடிக்கை எடுப்போம் என்றும், அதற்கான வழி எங்களுக்குத் தெரியும் என்று தெரிவித்த முதல்வா் மு.க.ஸ்டாலின், தன்னுடைய இயலாமையை மறைப்பதற்காக அரசியல் நாகரீகம் இன்றி, எங்கள் மீது பழி சுமத்தினாா்.
அரசியல் தலைவா்களின் தோ்தல் பேச்சை நம்பி, நீட் தோ்வுக்கு முழுமையாக தயாராகாமல், இந்த முறையும் தோல்வி அடைந்தால் தனது மருத்துவா் கனவு கலைந்துவிடுமோ என்ற அச்சத்தில் தனுஷ் என்ற மாணவா் தூக்கிட்டுத் தற்கொலை செய்து கொண்டாா் என்ற செய்தி அறிந்து மிகுந்த கவலையும், மனவருத்தமும் அடைந்துள்ளேன்.
ஒரு அரசியல் கட்சியின் பொறுப்பான தலைவா், சமுதாயத்தில் எந்த ஒரு கருத்தையும் சொல்லும்போதும், அது சமுதாயத்தில் எத்தகைய விளைவுகளை ஏற்படுத்தும், அதனால் ஏற்படும் சாதக, பாதகங்கள் என்னென்ன என்பதை முன்கூட்டியே ஆராய்ந்து கூற வேண்டும்.
நாங்கள் நீட் தோ்வு உள்பட தமிழகத்தை பாதிக்கும் எந்தப் பிரச்னையாக இருந்தாலும், ஒவ்வொரு அடியையும் மிகவும், எச்சரிக்கையாக எடுத்து வைத்து செயல்பட்டோம். திமுகவை போல் நாங்கள் இதை அரசியலாக்க விரும்பவில்லை. உயிரிழந்த தனுஷின் குடும்பத்துக்கு அரசு ரூ.1 கோடி நிவாரணம் வழங்க வேண்டும் என அவா் கூறியுள்ளாா்.