பெட்ரோல், டீசல் விலையை ஜிஎஸ்டி வரம்புக்குள் கொண்டு வருவதில் திமுக இரட்டை நிலைப்பாடு கொண்டிருப்பதாக அதிமுக ஒருங்கிணைப்பாளா் ஓ.பன்னீா்செல்வம் விமா்சித்துள்ளாா்.
இது தொடா்பாக ஞாயிற்றுக்கிழமை அவா் வெளியிட்ட அறிக்கை: மாநில சுயாட்சி, நீட் தோ்வு ரத்து, அண்டை மாநிலங்களுடனான நதிநீா்ப் பிரச்னை என எந்தப் பிரச்னையாக இருந்தாலும், ஆட்சியில் இல்லாத போது ஒரு பேச்சு, ஆட்சியில் இருக்கும்போது ஒரு பேச்சு என்பது திமுகவுக்கு கைவந்த கலை.
அந்த வகையில் தற்போது பெட்ரோலிய பொருள்களை, சரக்குகள் மற்றும் சேவைகள் வரி (ஜிஎஸ்டி) வரம்பின் கீழ் கொண்டு வருவது குறித்து தனது நிலைப்பாட்டை தமிழக அரசு தெரிவித்து இருக்கிறது.
மு.க.ஸ்டாலின் எதிா்க்கட்சித் தலைவராக இருந்தபோது, பெட்ரோல் மற்றும் டீசல் விலை குறைக்கப்பட வேண்டுமென்றால், அவற்றை ஜிஎஸ்டி வரம்புக்குக் கீழ் கொண்டு வர வேண்டும் அல்லது அதற்கான ஆயத்தீா்வை குறைக்கப்பட வேண்டும் என்று வலியுறுத்தினாா். இந்தச் செய்தி கடந்த 2018-ஆம் ஆண்டு, ஜனவரி மாதம் 25-ஆம் தேதி அனைத்துப் பத்திரிகைகளிலும் வெளியானது.
பெட்ரோலியப் பொருள்களை ஜிஎஸ்டி வரம்பின் கீழ் கொண்டு வர வேண்டும் என்பதுதான் தமிழக சட்டப்பேரவைத் தோ்தலுக்கு முந்தைய திமுகவின் நிலைப்பாடு. இந்த நிலைப்பாடு, திமுக ஆட்சிக்கு வந்த பிறகு மாறிவிட்டது.
அண்மையில் நடைபெற்ற 45-ஆவது ஜிஎஸ்டி கவுன்சில் கூட்டத்தில், திமுக சாா்பில் நிதி அமைச்சா் கலந்து கொள்ளாவிட்டாலும், அவா் மத்திய நிதி அமைச்சருக்கு எழுதிய கடிதத்தில், ‘மாநிலங்களின் சொந்த வருவாயை நிா்வகிப்பதில் பெட்ரோல் மற்றும் டீசல் மீதான மாநில வரி விதிப்பு மட்டுமே தற்போது உள்ளது. இதையும் ஜிஎஸ்டி வரம்புக்குள் கொண்டு வந்தால் மாநிலங்களுக்குச் சொந்த வரி வருவாய் என்பதே இல்லாமல் போய்விடும். அதனால் இதுபோன்ற சிறிய அதிகாரங்களை இழக்க விரும்பவில்லை’ என்று தெரிவித்துள்ளாா். இது தோ்தலுக்கு பிந்தையை திமுகவின் நிலைப்பாடு.
இதன் விளைவாக, முதல்வா், எதிா்க்கட்சித் தலைவராக இருந்தபோது, ஜிஎஸ்டி வரம்பின் கீழ் பெட்ரோலியப் பொருள்கள் கொண்டு வரப்பட வேண்டும் என்று வலியுறுத்தியது எப்படியாவது ஆட்சியைப் பிடித்துவிட வேண்டும் என்பதற்காகத்தான் என்ற ஐயப்பாடு மக்கள் மனதில் ஏற்பட்டுள்ளது.
எனவே, முதல்வா் இதில் உடனடியாகத் தலையிட்டு, பொதுமக்களின் சுமையைக் குறைக்கும் வகையில், பெட்ரோலியப் பொருள்களை ஜிஎஸ்டியின் கீழ் கொண்டு வர நடவடிக்கை எடுத்து திமுகவின் தோ்தலுக்கு முந்தைய நிலைப்பாட்டை நிலைநிறுத்த வேண்டும். இது போன்ற நடவடிக்கை, பொதுமக்களின் சுமையைக் குறைப்பதோடு, பெட்ரோல் விலை லிட்டருக்கு ரூ.5 குறைப்பு, டீசல் விலை லிட்டருக்கு ரூ.3 குறைப்பு என்ற திமுகவின் வாக்குறுதியும் முழுமையாக நிறைவேற வழிவகுக்கும் என ஓ.பன்னீா்செல்வம் கூறியுள்ளாா்.