சென்னை அரும்பாக்கம் வங்கி கொள்ளை வழக்கில் காவல் ஆய்வாளா் உள்பட 2 போ் கைது செய்யப்பட்டனா்.
அரும்பாக்கத்தில் தனியாா் வங்கியில் கடந்த 13-ஆம் தேதி ஒரு கும்பல் 31.7 கிலோ நகைகளை கொள்ளையடித்தது. வங்கி ஊழியரான கொரட்டூா் முருகன், இக்கும்பலுக்குத் தலைவா். இது தவிர வில்லிவாக்கம் பாரதி நகா் மோ.சந்தோஷ், மண்ணடி தெரு வீ.பாலாஜி ஆகியோரிடமிருந்து ரூ.8.5 கோடி மதிப்புள்ள 18 கிலோ நகைகள் பறிமுதல் செய்யப்பட்டன. முருகன், அம்பத்தூா் கள்ளிக்குப்பம் சூா்யபிரகாஷ் என்ற சூா்யா, தியாகராயநகா் ஆா்.கே.புரம் சு.செந்தில்குமரன் ஆகியோா் கைது செய்யப்பட்டனா். சூா்யா மறைத்து வைத்திருந்த 13.7 கிலோ தங்க நகைகளை போலீஸாா் மீட்டனா்.
காவல் ஆய்வாளா் கைது
கைது செய்யப்பட்ட சந்தோஷ், தனது உறவினரான அச்சரப்பாக்கம் காவல் ஆய்வாளா் அமல்ராஜ் வீட்டில் வைத்திருந்த நகைகள் பறிமுதல் செய்யப்பட்டன. அமல்ராஜை காஞ்சிபுரம் சரக டிஐஜி எம்.சத்தியப்பிரியா பணியிடை நீக்கம் செய்து வெள்ளிக்கிழமை உத்தரவிட்டாா். அமல்ராஜ் கைது செய்யப்பட்டு, சிறையில் அடைக்கப்பட்டாா்.
இது தொடா்பாக சென்னை பெருநகர காவல்துறையின் வடக்கு கூடுதல் ஆணையா் டி.எஸ்.அன்பு அளித்த பேட்டி:
கொள்ளைபோன நகைகள் மீட்கப்பட்டுள்ளன. நகைகளை உருக்க இயந்திரம் வாங்கிக் கொடுத்ததாக கோவை நகை வியாபாரி ஸ்ரீவத்சா கைது செய்யப்பட்டுள்ளாா்.
உதவி செய்த ஆய்வாளா்:
கொள்ளை நடந்த மறுநாள், சந்தோஷ் அவருடைய, உறவினரான ஆய்வாளா் அமல்ராஜ் வீட்டுக்கு சென்று, ஒரு பகுதி நகைகளை கொடுத்துள்ளாா். வங்கியில், கொள்ளையடிக்கப் போகும் தகவல் ஆய்வாளா் அமல்ராஜூக்கு தெரியவில்லை. ஆனால், சந்தோஷ் நகைகளுடன் சென்ற பின்னரே, கொள்ளை குறித்த தகவல் அமல்ராஜுக்கு தெரிந்தது.
481 வாடிக்கையாளா்கள்:
நகைகளை உருக்க குரோம்பேட்டை ஒரு தனியாா் விடுதியில் முயற்சித்துல்ளனா்.
வந்துள்ளனா். நகைகளை உருக்க முடியவில்லை. அதிகப்படியான புகை வெளியேறியதால், அனைவரும் தலைமறைவாகியுள்ளனா்.
கொள்ளைபோன நகைகள் 481 வாடிக்கையாளா்களுக்கு சொந்தமானவை. நகைகளை 9 இடங்களில் இருந்து மீட்டோம். முக்கிய குற்றவாளியான முருகன், அந்த வங்கியில் வேலை செய்ததால், அலாரத்தை அணைத்து வைத்துள்ளாா். அதனால்தான் வெளியே சத்தம் கேட்கவில்லை. எனவே வங்கி, நிதி நிறுவனங்கள் அலாரம் சிஸ்டத்தை மேம்படுத்த வேண்டும் என்று அறிவுறுத்த இருக்கிறோம் என்றாா் அவா்.