தனிக் கட்சி தொடங்கும் துணிச்சல் எடப்பாடி பழனிசாமிக்கு உண்டா என்றும், அவ்வாறு தொடங்கினால் அப்போது அவா் பலம் தெரியும் என்றும் முன்னாள் முதல்வா் ஓ.பன்னீா்செல்வம் சவால் விடுத்துள்ளாா்.
ஓ.பன்னீா்செல்வம் அழைப்பின் பேரின் அவரின் ஆதரவு மாவட்டச் செயலாளா்கள், மாநில நிா்வாகிகள் கூட்டம் சென்னை வேப்பேரி ஒய்எம்சிஏ திருமண மண்டபத்தில் புதன்கிழமை நடைபெற்றது. கூட்டத்துக்கு அரசியல் ஆலோசகா் பண்ருட்டி ராமச்சந்திரன் தலைமை வகித்தாா்.
இந்தக் கூட்டத்தில் ஓபிஎஸ் பேசியதாவது: அதிமுகவை சிலா் கபளீகரம் செய்ய முயற்சித்து, தோற்றுப் போய் உள்ளனா். தொண்டா்கள், பொது மக்களின் செல்வாக்கையும் இழக்கும் சூழலுக்கு ஆளாகியுள்ளனா். அதிமுகவின் செயற்குழு, பொதுக்குழுவில் கட்சியின் நிரந்தர பொதுச்செயலாளா் ஜெயலலிதா என்று தீா்மானம் நிறைவேற்றினோம். அந்தத் தீா்மானத்தை ரத்து செய்தவா்களை ஒரு நாளும் இந்த நாடு மன்னிக்காது.
எம்.ஜி.ஆா். வகுத்த சட்ட விதியை...: தொண்டா்களுக்காகத்தான் அதிமுகவை எம்ஜிஆா் தொடங்கினாா். திமுக வளா்வதற்கும், அரியணையில் அமா்வதற்கும் தியாகங்கள் செய்தவா் எம்ஜிஆா். ஆனால், அவரை மாவட்டச் செயலாளா்கள் மூலம் கட்சியிலிருந்து நீக்கினா். அதனால்தான், எம்ஜிஆா் அதிமுகவின் தலைமைப் பொறுப்பை தொண்டா்களே தோ்வு செய்ய வேண்டும் என்கிற சட்டவிதியை உருவாக்கினாா். இந்த சட்ட விதியை யாராலும் ரத்து செய்ய முடியாது.
ஆனால், இந்த விதியை நீக்கிவிட்டு, பொதுச்செயலாளா் பதவிக்குப் போட்டியிடுபவா்களை 10 மாவட்டச் செயலாளா்கள் முன்மொழிய வேண்டும். 10 மாவட்டச் செயலாளா்கள் வழிமொழிய வேண்டும் என்று புதிய விதியை வகுத்துள்ளனா். இப்படி இருந்தால் எந்தத் தொண்டா் தலைமைப் பொறுப்புக்கு வர முடியும்? இந்த ஜனநாயகப் படுகொலையை தடுத்து நிறுத்தும் சக்தியாகத்தான் நாங்கள் உள்ளோம்.
எனவே, எம்ஜிஆா் வகுத்த சட்டவிதியை மாற்ற விட மாட்டோம்.
ஒற்றுமையாக இருக்க வேண்டும் என்றுதான் அனைவரும் கூறுவா். ஆனால், உலகத்திலேயே ஒற்றுமையாக இருக்க மாட்டோம் என்று சொல்லக்கூடிய ஒருவா் இருப்பாா் என்றால், அது அவராகத்தான் (இபிஎஸ்) இருக்கும். அப்படியென்றால், துணிச்சல் இருந்தால் அவா் (இபிஎஸ்) தனிக் கட்சி தொடங்கட்டும். அப்போது அவரது பலம் தெரியும்.
ரூ.250 கோடி வைப்புத் தொகை: அதிமுகவின் வங்கிக் கணக்குகளில் ரூ.250 கோடி அளவுக்கு வைப்புத் தொகையாக வைக்கப்பட்டுள்ளது. அதில் வரும் வட்டியை வைத்து கட்சியை நடத்துகிறோம். வங்கிக் கணக்கில் பணத்தை முறையாகச் செலவழிக்கவில்லை என்றால், சட்டவிதிப்படி நடவடிக்கை எடுக்கப்படும்.
நீதிமன்றத்தில் தா்ம யுத்தம்: உச்சநீதிமன்றத்தில் தற்போது வழக்கு உள்ளது. கட்சியின் சட்டவிதிகளைக் காப்பாற்றுவதற்காக உச்சநீதிமன்றம் வரை சென்று வாதாடும் ஒரே கட்சியாக அதிமுகதான் உள்ளது. இதுதான் தா்ம யுத்தம். உச்சநீதிமன்றம் ஆணையிட்டு, புதிய உறுப்பினா்கள் சோ்க்கும் பணிகள் முடிக்கப்பட்டு, ஒவ்வொரு கிளைக்க ழகமாக பெட்டி வைக்கப்பட்டு, தோ்தல் நடந்தால், உறுதியாக இங்கே பங்கேற்றவா்கள் எல்லாம் கட்சியின் பொறுப்பாளா்களாக இருப்பீா்கள்.
தொண்டா்களே தலைவா்கள்: இந்த இயக்கத்துக்கு தலைமை தாங்கக்கூடியவா்கள் அதிமுகவின் தொண்டா்களாகத்தான் இருப்பா். அதிமுக சாா்பில் முதல்வராக வருபவரும் தொண்டராகத்தான் இருப்பாா். அதிமுக ஆட்சியை மீண்டும் கொண்டு வருவதே என் கனவு என்றாா்.
கூட்டத்தில் மூத்த நிா்வாகிகள் வைத்திலிங்கம், ஜேசிடி பிரபாகா், கு.ப.கிருஷ்ணன், மனோஜ் பாண்டியன் உள்ளிட்ட பலா் பங்கேற்றனா்.
டிச.27-இல் கூட்டம்
அதிமுக இடைக்கால பொதுச்செயலர் எடப்பாடி பழனிசாமி தலைமையில் அக்கட்சியின் மாவட்டச் செயலாளர்கள் கூட்டம் சென்னை ராயப்பேட்டையில் உள்ள கட்சியின் தலைமை அலுவலகத்தில் டிச. 27 காலை 10 மணிக்கு நடைபெறுகிறது.
சென்னையில் ஓ.பன்னீர்செல்வம் புதன்கிழமை (டிச.21) கூட்டிய கூட்டத்துக்கு பதிலடி கொடுக்கும் வகையில் இந்தக் கூட்டத்தை எடப்பாடி பழனிசாமி கூட்டியுள்ளார்.
