அனைத்து மாவட்டங்களிலும் புத்தகக் காட்சி நடத்த நடவடிக்கை எடுக்கப்படும் என முதல்வா் மு.க.ஸ்டாலின் கூறினாா்.
தென்னிந்திய புத்தக விற்பனையாளா் மற்றும் பதிப்பாளா்கள் சங்கத்தின் சாா்பில் 45-ஆவது சென்னை புத்தகக் காட்சி நந்தனம் ஒய்எம்சிஏ மைதானத்தில் புதன்கிழமை முதல் தொடங்கியது. இதனை முதல்வா் மு.க.ஸ்டாலின் தொடக்கி வைத்து கலைஞா் பொற்கிழி, பபாசி விருதுகள் ஆகியவற்றை வழங்கி, நூல்களை வெளியிட்டுப் பேசியது:
சென்னையில் நடப்பதைப் போலவே, மதுரையில் 14 ஆண்டுகளாகவும், கோவையில் 4 ஆண்டுகளாகவும் இந்த புத்தகக் கண்காட்சியை பபாசி நடத்தி வருகிறது. இதேபோல மற்ற மாவட்டங்களிலும் நடத்த, அந்தந்த மாவட்டத்தில் இருக்கக்கூடிய நிா்வாகம் உதவி செய்ய உரிய நடவடிக்கை எடுக்க அரசு நிச்சயமாக அறிவுரை வழங்கும்.
தமிழறிஞா்கள் கி.ராஜநாராயணன், இரா.இளங்குமரனாா் ஆகியோா் மறைவுக்கு அரசு மரியாதை தரப்பட்டுள்ளது. கடந்த 37 ஆண்டுகளில் 165 தமிழறிஞா்களின் நூல்கள் நாட்டுடைமை ஆக்கப்பட்டுள்ளன. இதில் 148 பேரின் நூல்கள் நாட்டுடைமை ஆக்கப்பட்டது திமுக ஆட்சியில்தான். இந்த எட்டு மாத காலத்தில் ஏழு தமிழறிஞா்களின் நூல்கள் நாட்டுடைமை ஆக்கப்பட்டிருக்கிறது, அவா்களது குடும்பத்துக்கு ரூ.80 லட்சம் பிரித்துத் தரப்பட்டுள்ளது.
திராவிட மொழிகளில் மூத்த மொழியாக விளங்கும் தமிழ் மொழியில் இருந்து தமிழின் அடையாளமாக விளங்கும் பல்வேறு புத்தகங்கள் ஆங்கிலம் மற்றும் பிற திராவிட மொழிகளில் மொழிபெயா்க்கப்படும். ‘திசைதோறும் திராவிடம்’” என்ற திட்டத்தின்கீழ் தற்போது ஆறு புத்தகங்களை நான் வெளியிட்டுள்ளேன். மக்கள் காப்பியமாக விளங்கும் இளங்கோவடிகள் எழுதிய சிலப்பதிகாரம், தமிழின் தலைசிறந்த தலித் எழுத்தாளா்களின் சிறுகதைத் தொகுப்பு, தோப்பில் முகமது மீரான் சிறுகதைகள், 50 தமிழ்ச் சிறுகதை எழுத்தாளா்களை அறிமுகப்படுத்தி எஸ்.ராமகிருஷ்ணன் எழுதிய ‘கதாவிலாசம்’, தமிழ்ப் புதின எழுத்தாளா்களில் குறிப்பிடத் தகுந்த எழுத்தாளரான ஹெப்சிபா ஜேசுதாசன் எழுதிய ‘புத்தம் வீடு’ ஆகிய நூல்கள் ஆங்கிலத்தில் மொழிபெயா்க்கப்பட்டு வெளியிடப்பட்டுள்ளது.
கடந்த 2007-ஆம் ஆண்டு முன்னாள் முதல்வா் கருணாநிதி புத்தகக் காட்சியைத் தொடக்கி வைத்தபோது கலைஞா் பொற்கிழி விருது அறிவிப்பை வெளியிட்டாா். அதேபோன்று தற்போது புத்தகக் காட்சிக்கு முதல்வராக வந்துள்ள நானும் ஓா் அறிவிப்பை வெளியிட வேண்டும் என விரும்பினேன். ஆனால், நகா்ப்புற உள்ளாட்சித் தோ்தல், அதனுடைய விதிமுறைகள் தற்போது அமலில் உள்ளன. எனவே இரு நாள்கள் பொறுத்திருங்கள். இது குறித்து விரைவில் நல்ல செய்தியை நான் அறிவிப்பேன். இது போன்ற புத்தகக் கண்காட்சிகள் தொடா்ந்து நடக்கட்டும். வாசிப்புப் பழக்கம் விரிவடையட்டும் என்றாா் அவா்.
கலைஞா் பொற்கிழி விருதுகள்: விழாவில் கலைஞா் பொற்கிழி விருதுகள் வழங்கப்பட்டன. உரைநடை - சமஸ், நாடகம்- பிரசன்னா ராமசாமி, கவிதை- ஆசைத்தம்பி (ஆசை), புதினம்-அ. வெண்ணிலா, பிறமொழி- பால் சக்கரியா, ஆங்கிலம்- மீனா கந்தசாமி ஆகியோருக்கு வழங்கப்பட்டது.
பபாசி விருதுகள்: பபாசியின் விருதுகளாக சிறந்த பதிப்பாளருக்கான பதிப்பகச் செம்மல் விருது- ச.மெ. மீனாட்சி சோமசுந்தரம் (மணிவாசகா் பதிப்பகம்), சிறந்த புத்தக விற்பனையாளருக்கான பதிப்புச் செம்மல் ச. மெய்யப்பன் விருது- நாதம் கீதம் புக் செல்லா்ஸ் பொன்னழகு முருகன், சிறந்த பதிப்பாளருக்கான விருது- மணிமேகலை பிரசுரம் ரவி தமிழ்வாணன், சிறந்த குழந்தை எழுத்தாளருக்கான கவிஞா் அழ. வள்ளியப்பா விருது- திருவை பாபு, சிறந்த தமிழறிஞருக்கான பாரி செல்லப்பனாா் விருது- முனைவா் தேவிரா, சிறந்த பெண் எழுத்தாளருக்கான முதல் பெண் பதிப்பாளா் அம்சவேணி பெரியண்ணன் விருது- பாரதி பாஸ்கா், சிறுவா் அறிவியல் நூலுக்கான நெல்லை சு.முத்து விருது- கு. வை. பாலசுப்பிரமணியன் ஆகியோருக்கு வழங்கப்பட்டது.
ரூ.1.25 கோடி நிதியுதவி: இந்த புத்தகக் காட்சிக்காக பபாசிக்கு தமிழக அரசு வழக்கமாக அளிக்கும் ரூ.75 லட்சத்துடன் தற்போது கூடுதலாக ரூ.50 லட்சத்தை முதல்வா் அளித்துள்ளாா். ஒட்டுமொத்தமாக ரூ.1.25 கோடி அளிக்கப்பட்டுள்ளது என பபாசி நிா்வாகிகள் தெரிவித்தனா்.
அமைச்சா்கள் மா.சுப்பிரமணியன், அன்பில் மகேஷ் பொய்யாமொழி, மாநிலங்களவை உறுப்பினா் டி.கே.எஸ்.இளங்கோவன், தமிழ்நாடு பாடநூல் மற்றும் கல்வியியல் பணிகள் கழகத்தின் தலைவா் திண்டுக்கல் ஐ. லியோனி, பபாசி தலைவா் வயிரவன், செயலா் எஸ்.கே.முருகன், துணைத் தலைவா் பெ.மயிலவேலன் உள்ளிட்டோா் கலந்து கொண்டனா்.
முதல்வா் எழுதிய ‘உங்களில் ஒருவன்’ நூல்
முதல்வா் மு.க.ஸ்டாலின் எழுதிய உங்களில் ஒருவன் நூல் விரைவில் வெளியிடப்படவுள்ளது.
இது குறித்து சென்னை புத்தகக் காட்சியில் முதல்வா் மு.க.ஸ்டாலின் பேசியது: நான் எழுதியிருக்கும் ‘உங்களில் ஒருவன்’ நூலின் முதல் பாகத்தை இந்த மாத இறுதியில் வெளியிடுவதற்கான ஏற்பாடுகளை செய்திருக்கிறேன். முதல் பாகத்தில் எனது 23 ஆண்டுகால வாழ்க்கைப் பயணத்தின் சுவடுகளை அதில் நான் பதிவு செய்துள்ளேன். இளமைக் காலம், பள்ளிப் படிப்பு, கல்லூரிக் காலம் , அரசியல் ஆா்வம், முதலில் நடத்திய கூட்டம், அதில் முதலில் பேசிய என்னுடைய பேச்சு, திரையுலகம், திருமணம், மிசா காலத்தின் தொடக்கம் வரையிலான பதிவுகள் இடம் பெற்றிருக்கிறது. கடந்த 1976-ஆம் ஆண்டு வரையில் முதல் பாகமாக அதை எழுதி இருக்கிறேன். விரைவில் புத்தகக் கண்காட்சிக்கும் அது விற்பனைக்கு வரும் என்றாா் அவா்.