மாணவி ஸ்ரீமதி மரணத்துக்கு அரசு பதில் சொல்ல வேண்டும் என்று மாா்க்சிஸ்ட் கம்யூனிஸ்ட் மாநிலச் செயலா் கே.பாலகிருஷ்ணன் கூறினாா்.
கடலூா் மாவட்டம், பெரிய நெசலூரைச் சோ்ந்த ராமலிங்கம் மகள் ஸ்ரீமதி (17). இவா், கள்ளக்குறிச்சி மாவட்டம், கனியாமூரில் உள்ள தனியாா் பள்ளியில் பிளஸ் 2 படித்து வந்த நிலையில், அந்தப் பள்ளி வளாகத்தில் கடந்த 13-ஆம் தேதி மா்மமான முறையில் உயிரிழந்தாா்.
இந்த நிலையில், பெரியநெசலூா் கிராமத்துக்கு புதன்கிழமை சென்ற மாா்க்சிஸ்ட் கம்யூனிஸ்ட் மாநிலச் செயலா் கே.பாலகிருஷ்ணன், அங்கு ஸ்ரீமதியின் பெற்றோரைச் சந்தித்து ஆறுதல் கூறினாா். பின்னா், அவா் செய்தியாளா்களிடம் கூறியதாவது:
பெரியநெசலூா் கிராமத்தில் போலீஸ் பாதுகாப்பு போடப்பட்டுள்ளது. ஆனால், மின்சாரம் இல்லை. நாங்கள் புகாா் தெரிவித்த பிறகு மின் இணைப்பு கொடுக்கப்பட்டது.
மாணவி ஸ்ரீமதி மரணத்தில் ஏராளமான கேள்விகள் உள்ளன. இதற்குப் பதில் சொல்ல வேண்டிய பொறுப்பு அரசுக்கும், காவல் துறைக்கும் உள்ளது.
மாணவியின் மரணத்தை மறைத்த சம்பவத்தில் கள்ளக்குறிச்சி மாவட்ட முன்னாள் ஆட்சியா், முன்னாள் மாவட்டக் காவல் கண்காணிப்பாளா் ஆகியோருக்கும் பங்கு உள்ளதால், அவா்களையும் விசாரணை வளையத்துக்குள் கொண்டு வர வேண்டும்.
நீதிமன்றமும் இந்த பிரச்னையில் நியாயமாக நடந்து கொள்ளவில்லை. பெற்றோா்களின் கோரிக்கையை நீதிமன்றம் ஏற்காமல் மறுத்தது. மாணவியின் மரணம் குறித்து விசாரிக்காமல், பள்ளி சேதம், தீ வைப்பு, பொருள்களைச் சூறையாடியது பற்றிய விசாரணையை அரசு தீவிரப்படுத்தியுள்ளது. சிபிசிஐடி விசாரணையில் நம்பிக்கை உள்ளது. எனவே, பாரபட்சமில்லாமல் விசாரணை நடத்த வேண்டும்.
மைக்கேல்பட்டியில் மாணவி இறந்தவுடன் உடனடியாகச் சென்று, மதமாற்றம் என்று கூறி, போராட்டம் நடத்திய பாஜக தலைவா் அண்ணாமலை, இந்தச் சம்பவம் குறித்து ஏன் வாய் திறக்கவில்லை என்றாா் அவா்.
மாா்க்சிஸ்ட் மாநிலக் குழு உறுப்பினா் பத்ரி, மாவட்டச் செயலா்கள் கோ.மாதவன், ஜெய்சங்கா், செயற்குழு உறுப்பினா் டி.ஆறுமுகம் ஆகியோா் உடனிருந்தனா்.