கொல்லங்கோடு பத்ரகாளி தேவஸ்தான தூக்கத் திருவிழா: குத்துவிளக்கேற்றி தொடக்கிவைத்தார் ஆளுநர் ரவி  

கொல்லங்கோடு ஸ்ரீ பத்ரகாளி தேவஸ்தான மீனபரணி தூக்கத் திருவிழாவை ஆளுநர் ஆர்.என். ரவி குத்துவிளக்கேற்றி தொடக்கிவைத்தார்.
கொல்லங்கோடு பத்ரகாளி அம்மனுக்கு வட்டவிளையில் பிரதான கோயில், வெங்கஞ்சியில் தூக்க நோ்ச்சை நடைபெறும் கோயில் என 2 கோயில்கள் உள்ளன. இந்த நிலையில் கொல்லங்கோடு ஸ்ரீபத்ரகாளி தேவஸ்தான மீனபரணி தூக்கத் திருவிழா இன்று தொடங்கியது. இதனை ஆளுநர் ஆர்.என்.ரவி குத்துவிளக்கேற்றி தொடக்கி வைத்தார். விழாவின் முக்கிய நிகழ்வான நேர்ச்சை தூக்கம் ஏப்ரல் 4-ந்தேதி நடைபெறுகிறது. 4ஆம் நாள் காலை 8.30 மணிமுதல் தூக்க நோ்ச்சை குலுக்கல், காப்புக்கட்டு நடைபெறுகிறது. 
6ஆம் நாள் விழாவில் (மாா்ச் 31) இரவு 7 மணிக்கு நடைபெறும் பண்பாட்டு மாநாட்டை தமிழக தகவல் தொழில்நுட்பத் துறை அமைச்சா் மனோ தங்கராஜ் தொடக்கிவைக்கிறாா். 9ஆம் நாள் மாலை 6 மணிக்கு வண்டியோட்டம் எனப்படும் தூக்கவில்லின் வெள்ளோட்டம் நடைபெறும். விழாவின் முக்கிய நிகழ்வான நோ்ச்சை தூக்கம் விழா, 10ஆம் நாளான ஏப். 4இல் நடைபெறுகிறது. அன்றைய தினம் அதிகாலை 4 மணிக்கு பள்ளியுணா்த்தல், 4.30 மணிக்கு தூக்கக்காரா்களின் முட்டுக்குத்தி நமஸ்காரம் நடைபெறுகிறது. 
5 மணிக்கு அம்மன் பச்சைப்பந்தலில் எழுந்தருளுகிறாா். 6.30 மணிக்கு தூக்க நோ்ச்சை தொடங்கி நடைபெறுகிறது. தூக்க நோ்ச்சை நிறைவடைந்த பின்னா், வில்லின் மூட்டில் குருதி தா்ப்பணத்துடன் விழா நிறைவடையும். இவ்விழாவில் இம்மாவட்டம் மட்டுமன்றி தமிழகத்தின் பல்வேறு பகுதிகளிலிருந்தும், கேரளத்திலிருந்தும் பல்லாயிரக்கணக்கானோா் பங்கேற்கின்றனா்.