உறுதிமொழியை மாற்றி எடுத்த மருத்துவக் கல்லூரிகள் மீது நடவடிக்கை: மருத்துவக் கல்வி இயக்குநா்

மதுரை: உறுதிமொழியை மாற்றி எடுத்துள்ள அனைத்து மருத்துவக் கல்லூரிகள் மீதும் நடவடிக்கை எடுக்கப்படும் என்று மருத்துவக் கல்வி இயக்குநா் ஆா்.நாராயணபாபு செவ்வாய்க்கிழமை தெரிவித்தாா்.

மதுரை அரசு மருத்துவக் கல்லூரியில் உறுதிமொழியை மாற்றி எடுத்த விவகாரம் தொடா்பாக கல்லூரி முதல்வா் ஏ.ரத்தினவேல் காத்திருப்போா் பட்டியலில் வைக்கப்பட்டுள்ளாா். இதுதொடா்பாக மருத்துவக்கல்லூரி இயக்குநா் ஆா்.நாராயணபாபு தலைமையிலான குழுவினா் மதுரை மருத்துவக் கல்லூரியில் செவ்வாய்க்கிழமை விசாரணை மேற்கொண்டனா். இதில், கல்லூரி முதல்வா் ஏ.ரத்தினவேல், துணை முதல்வா் தனலட்சுமி, மாணவா் பேரவைத் தலைவா் ஜோதிஸ் குமாரவேல் உள்ளிட்ட நிா்வாகிகள் ஆகியோரிடம் விசாரணை நடத்தினா்.

பின்னா் செய்தியாளா்களிடம் மருத்துவக் கல்வி இயக்குநா் ஆா்.நாராயணபாபு செவ்வாய்க்கிழமை கூறியது: தமிழக மருத்துவக் கல்லூரிகளில் எப்போதும் ‘ஹிப்போகிரடிக்’ உறுதிமொழி மட்டுமே ஏற்கப்படுகிறது. ஆனால் மதுரை மருத்துவக் கல்லூரியில் மகரிஷி சரக்சப்த் (சபதம்) உறுதி மொழி எடுக்கப்பட்டுள்ளது.

இதுதொடா்பாக கல்லூரி முதல்வா் ரத்தினவேல், துணை முதல்வா் தனலட்சுமி மற்றும் மாணவா்களிடம் விசாரணை நடத்தப்பட்டுள்ளது. விசாரணையின்போது மாணவா்கள் தவறுதலாக உறுதிமொழியை பதிவிறக்கம் செய்து ஏற்ாகவும், இது கல்லூரி முதல்வா், துணை முதல்வா் ஆகியோரின் கவனத்துக்கு கொண்டு செல்லவில்லை என்று தெரிவித்துள்ளனா்.

கல்லூரியில் நடைபெற்ற விசாரணை குறித்து அரசுக்கு அறிக்கை அனுப்பப்படும். தேசிய மருத்துவ ஆணையம் உறுதிமொழி தொடா்பாக சுற்றறிக்கை மட்டுமே அனுப்பியுள்ளது, அது உத்தரவு அல்ல. மேலும் தேசிய மருத்துவ ஆணையத்தின் சுற்றறிக்கையை அப்படியே பின்பற்றக்கூடாது என்று தமிழக சுகாதாரத்துறைச் செயலா், பிப்ரவரி 10 ஆம் தேதி அனைத்து மருத்துவக் கல்லூரி முதல்வா்களுக்கும் அறிவுறுத்தி உள்ளாா்.

இதையடுத்து மருத்துவக்கல்வி இயக்குநரகமும், முதலாமாண்டு மாணவா் சோ்க்கை, வரவேற்பு விழாக்கள் மற்றும் தேசிய மருத்துவ ஆணையத்தின் சுற்றறிக்கை குறித்து, அனைத்து மருத்துவக் கல்லூரிகளுக்கும் சுற்றறிக்கை அனுப்பியுள்ளது. இதேபோல மதுரை மருத்துவக்கல்லூரி முதல்வருக்கும் சுற்றறிக்கை அனுப்பப்பட்டுள்ளது. எனவே, உறுதிமொழியை மாற்றி எடுத்ததால் நடவடிக்கை எடுக்கப்பட்டுள்ளது. மேலும் ராமநாதபுரம் உள்பட பல்வேறு மருத்துவக் கல்லூரிகளிலும் உறுதிமொழி மாற்றி எடுக்கப்பட்டுள்ளதாக புகாா்கள் எழுந்துள்ளன.

எனவே, உறுதிமொழியை மாற்றி எடுத்த அனைத்து மருத்துவக் கல்லூரிகள் மீதும் நடவடிக்கை எடுக்கப்படும். மேலும் உறுதிமொழி ஏற்பு நடைபெற்றபோது துணை முதல்வா் அங்கு இல்லை என்று எழுத்துப் பூா்வமாக தெரிவித்துள்ளாா். தற்போது முதற்கட்ட விசாரணை முடிந்துள்ளது. தேவைப்பட்டால் மேலும் விசாரணை நடத்தப்படும். விசாரணை அறிக்கையின் அடிப்படையில் முதல்வரை மீண்டும் நியமிப்பது குறித்து அரசு முடிவு எடுக்கும் என்றாா்.