விவசாயிகளுக்கு ரசாயன உரங்கள் தங்குதடையின்றி கிடைப்பதை உறுதி செய்ய வேண்டும் என அதிகாரிகளை வேளாண்மைத் துறை அமைச்சா் எம்.ஆா்.கே.பன்னீா்செல்வம் அறிவுறுத்தினாா்.
இதுகுறித்து, புதன்கிழமை அவா் வெளியிட்ட செய்தி:- மானிய விலையில் வழங்கப்படும் ரசாயன உரங்களை அதிக விலைக்கு விற்றாலோ, பதுக்கினாலோ, விவசாயம் அல்லாத பிற பயன்பாட்டுக்கு பயன்படுத்தினாலோ சம்பந்தப்பட்ட உரக் கடைகளின் உரிமங்கள் ரத்து செய்யப்படும் என அனைத்து உரக் கடைகளுக்கும் அறிவுறுத்தல்கள் அளிக்கப்பட்டன.
ஆனாலும், விவசாயிகளின் நலன் கருதி மேற்கொள்ளப்பட்டுள்ள அரசின் உத்தரவை முறையாகப் பின்பற்றாமல் சில இடங்களில் உரக் கடைகளில் தொடா்ந்து விதிமீறல்கள் நடைபெற்ால், தமிழகத்தின் அனைத்து மாவட்டங்களிலும் பறக்கும் படைகள் அமைக்கப்பட்டு, அண்மையில் திடீா் ஆய்வுகள் மேற்கொள்ளப்பட்டன.
இதில், 750 மொத்த உர விற்பனைக் கடைகள், 11, 548 கூட்டுறவு, தனியாா் சில்லறை உர விற்பனை நிலையங்கள், 54 உர இருப்புக் கிடங்குகள், 56 கலப்பு உர உற்பத்தி நிறுவனங்கள், 30 மாவட்ட சோதனைச் சாவடிகள், ஏழு தொழிற்சாலைகள் என மொத்தம் 12, 445 இடங்களில் ஆய்வுகள் செய்யப்பட்டன. இந்த ஆய்வில் 131 உரக் கடைகள் இருப்பு தகவல் பலகை இல்லாமல் உரங்களை விற்பனை செய்ததும், 141 கடைகளில் உர இருப்பு வித்தியாசமும், 51 கடைகள் உரிய அனுமதி பெறாமல் விற்பனை ஈடுபட்டதும் தெரிய வந்தது. பல்வேறு விதிமீறல்களில் ஈடுபட்டதாக மொத்தம் 243 உரக் கடைகளுக்கு
விளக்கம் கேட்டு நோட்டீஸ்கள் அனுப்பப்பட்டுள்ளன. மீதமுள்ள உரக் கடைகளின் மீதும் துறை ரீதியான நடவடிக்கை எடுக்க மாவட்ட அலுவலா்களுக்கு உரிய அறிவுரை அளிக்கப்பட்டுள்ளது என்று தனது அறிக்கையில் அமைச்சா் எம்.ஆா்.கே.பன்னீா்செல்வம் தெரிவித்துள்ளாா்.