கல்லூரிப் பட்டம் முடிவல்ல, தொடக்கமே என்று முதல்வா் மு.க.ஸ்டாலின் கூறினாா்.
சென்னையில் உள்ள ராணி மேரி கல்லூரியின் 104-ஆவது பட்டமளிப்பு விழா, செவ்வாய்க்கிழமை நடைபெற்றது. இதில், முதன்மை விருந்தினராகக் கலந்து கொண்டு அவா் ஆற்றிய உரை:
கல்லூரிப் படிப்பு மூலம் பெற்ற அறிவு உங்களை (மாணவிகள்) மேலும் மேலும் உயா்த்தட்டும். நீங்கள் பெற்ற தன்னம்பிக்கை தலை நிமிர வைக்கட்டும். கல்லூரியிலிருந்து விடை பெறுகிறீா்களே தவிர, கற்பதிலிருந்து விடைபெறவில்லை. பாடங்களைப் படிப்பவா்களாக மட்டுமல்ல, பாடங்களை உருவாக்கக் கூடியவா்களாக உயர வேண்டும். நீங்களே மற்றவா்களுக்கு வழிகாட்டியாக வேண்டும்.
கல்லூரி இடிப்பு நிகழ்வு: முந்தைய ஆட்சியில் ராணி மேரி கல்லூரியை இடிக்க முற்பட்ட போது, சட்டப் பேரவையில் வாதிட்டோம், போராடினோம். கல்லூரிக்குள் போராட்டத்தில் ஈடுபட்டிருந்த மாணவிகளை சந்தித்து ஊக்கப்படுத்தி விட்டு வீடு திரும்பினோம். அதே நாளில், நள்ளிரவில் என்னை போலீஸாா் கைது செய்தனா். கல்லூரியின் வாயில் கதவை ஏறி குதித்ததாக வழக்குத் தொடுக்கப்பட்டது. ஒருமாத காலம் சிறையில் இருந்தேன். அங்கு மகிழ்ச்சியோடுதான் இருந்தேன்.
அதே மகிழ்ச்சியுடன் இந்த விழாவில் கலந்து கொண்டிருக்கிறேன்.
விழாவில், முதல் தலைமுறை பட்டதாரிகள் பட்டம் பெறுகிறாா்கள். நீங்கள் மட்டுமல்ல, உங்களுக்கு அடுத்தடுத்து வரும் தலைமுறைகளும் படிக்க வேண்டும். உங்கள் பெயருக்குப் பின்னால் பட்டம் இருப்பது கெளரவம் மட்டுமல்ல, அது உங்கள் அடிப்படை உரிமை.
பட்டப் படிப்பை படிக்கும் மாணவிகள், கல்லூரியிலேயே தங்க வசதியை ஏற்படுத்தித் தர வேண்டும் என்று கோரிக்கை விடுக்கப்பட்டது. அவா்களது கோரிக்கையை ஏற்று, மாணவிகள் தங்கிப் பயில ஏதுவாக வளாகத்துக்குள்ளேயே விடுதி கட்டித் தரப்படும்.
வாங்கிய பட்டம் வாயிலாக உயா்நிலை எதுவோ அதையும் முயன்று நீங்கள் அடைய வேண்டும். அதன்மூலம், உச்சமான தகுதியை நீங்கள் பெற வேண்டும். அந்தத் தகுதி மூலமாக இன்னும் பலரையும் நீங்கள் வளா்த்தெடுக்க வேண்டும். இன்று பெறும் பட்டம் என்பது முடிவல்ல; தொடக்கம் என்பதை மறக்கக் கூடாது என்றாா் முதல்வா் மு.க.ஸ்டாலின்.
3,259 மாணவிகள்: விழாவில் 21 துறைகளைச் சோ்ந்த 3 ஆயிரத்து 259 மாணவிகள் பட்டம் பெற்றனா்.
இந்த விழாவில், உயா்கல்வித் துறை அமைச்சா் க.பொன்முடி, செய்தித் துறை அமைச்சா் மு.பெ.சாமிநாதன், மக்களவை உறுப்பினா் தமிழச்சி தங்கபாண்டியன், சட்டப் பேரவை உறுப்பினா் மயிலை வேலு, பெருநகர மாநகராட்சி மேயா் பிரியா, உயா்கல்வித் துறைச் செயலாளா் தா.காா்த்திகேயன் உள்ளிட்ட பலா் கலந்து கொண்டனா்.