ஐக்கிய அரபு அமீரகத்திலுள்ள சார்ஜா நகரில் 2023ஆம் ஆண்டு ஜூலையில் நடைபெறவிருக்கும் 11-ஆம் உலகத் தமிழ் ஆராய்ச்சி மாநாட்டை முன்னிட்டு வழங்கப்படும் அனைத்துலக விருதுகளுக்கு விண்ணப்பங்கள் வரவேற்கப்படுவதாக அறிவிக்கப்பட்டுள்ளது.
11 - ஆம் உலகத் தமிழ் ஆராய்ச்சி மாநாடு அனைத்துலக விருதுக்கான விண்ணப்பப் படிவங்களை அனுப்ப வேண்டிய கடைசி நாள் 31.03.2023 என்றும் பதிவுக் கட்டணம் கிடையாது என்றும் அறிவிப்பில் தெரிவிக்கப்பட்டுள்ளது.
இதையும் படிக்க.. மாணவி சத்யாவை கொன்றது ஏன்? சதீஷ் பரபரப்பு வாக்குமூலம்
11- ஆம் உலகத் தமிழ் ஆராய்ச்சி மாநாட்டை முன்னிட்டு, அனைத்துலக விருதுகள்.. சிறந்த ஆராய்ச்சியாளர், சிறந்த பேராசிரியர், சிறந்த தமிழ் அறிஞர், சிறந்த தமிழ்த் தொண்டு, சிறந்த தமிழ்த் துறை - கல்லூரி / பல்கலைக்கழகம், சிறந்த தமிழ்ப் பள்ளி, சிறந்த தமிழாசிரியர் (பள்ளி). சிறந்த எழுத்தாளர், சிறந்த கவிஞர், சிறந்த தமிழ் அமைப்பு / சங்கம் / கழகம், சிறந்த பதிப்பாளர் / பதிப்பாசிரியர், சிறந்த முகநூல் எழுத்தாளர் (சமூக வலைதளம்), சிறந்த யூடியூப் தமிழ் காணொளிகள் (வீடியோ), சிறந்த ஊடகவியலாளர், சாதனை பெண்மணி, சாதனை இளைஞர் - ஆண் / பெண் ஆகிய 15 பிரிவுகளின் கீழ் வழங்கப்படுகிறது.
இந்தப் பிரிவுகளின் கீழ் விருதுகளைப் பெற விண்ணப்பிப்பவர்கள், அதற்கான படிவத்தை பூர்த்தி செய்து அனுப்புமாறு கேட்டுக் கொள்ளப்பட்டுள்ளது.
உலகத் தமிழ் ஆராய்ச்சி நிறுவனத்தின் (ஐஏடிஆர்) 11 ஆம் உலகத் தமிழ் ஆராய்ச்சி மாநாடு வரும் (2023 ஆம்) ஆண்டு ஜூலை மாதம் ஐக்கிய அரபு அமீரகத்திலுள்ள சார்ஜா நகரில் நடைபெறவிருக்கிறது.
மாநாடு பற்றிய அறிவிப்பை இந்த நிறுவனத்தின் இந்திய கிளை வெளியிட்டிருந்தது.
1966 ஆம் ஆண்டு முதல் உலகத் தமிழ் ஆராய்ச்சி மாநாடுகள் நடைபெற்று வருகின்றன. இதுவரையில் 10 மாநாடுகள் நடைபெற்றுள்ளன. 11 ஆம் உலகத் தமிழ் ஆராய்ச்சி மாநாடு சார்ஜாவில் 2023ஆம் ஆண்டு ஜூலையில் நடைபெற உள்ளது. மாநாட்டுத் தேதிகள் பின்னர் அறிவிக்கப்படும் என்றும் கூறப்பட்டுள்ளது.
உலகம் முழுவதும் உள்ள தமிழ் அறிஞர்களும், பிற மொழி அறிஞர்களும் கலந்துகொண்டு நம் மொழியின் சிறப்பையும், பிற மொழியில் உள்ள சிறப்புகளையும் அறிந்துகொள்ளும் வகையில் நடைபெறும் இந்த மாநாட்டை உலகத் தமிழ் ஆராய்ச்சி நிறுவனம் மற்றும் சார்ஜாவில் உள்ள லிங்கன் தொழில் மற்றும் மேலாண்மை பல்கலைக்கழகம் இணைந்து நடத்துகின்றன.
மேலும் விவரங்களை www.iatrinternational.org என்ற இணையதளத்தில் அறியலாம்.
மேலதிகத் தகவல்களுக்கு சென்னை தி.நகரிலுள்ள உலகத் தமிழ் ஆராய்ச்சி நிறுவனத்தை 044-28340488 / 96770 37474 / 98422 81957 / 96000 07819 என்ற எண்களில் தொடர்பு கொண்டு கேட்டறியலாம் என்றும் தெரிவிக்கப்பட்டுள்ளது.