வடதமிழக பகுதிகளின் மேல் நிலவும் வளிமண்டல கீழ் அடுக்கு சுழற்சியால் ஞாயிற்றுக்கிழமை 12 மாவட்டங்களில் பலத்த மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.
இது குறித்து அந்த மையம் வெளியிட்ட அறிவிப்பு: வடதமிழக பகுதிகளின் மேல் நிலவும் வளிமண்டல கீழ் அடுக்கு சுழற்சியால் ஞாயிற்றுக்கிழமை நீலகிரி, கோவை, திருப்பூா், தேனி, திண்டுக்கல், ஈரோடு, கிருஷ்ணகிரி, தருமபுரி, சேலம், கரூா் , நாமக்கல், திருப்பத்தூா் மாவட்டங்களில் ஓரிரு இடங்களில் பலத்த மழைக்கு வாய்ப்புள்ளது.
செப்.5: நீலகிரி, கோவை, திருப்பூா், தேனி, திண்டுக்கல், ஈரோடு, கிருஷ்ணகிரி, சேலம்,தருமபுரி, கரூா் , நாமக்கல், கள்ளக்குறிச்சி, திருவண்ணாமலை, வேலூா், ராணிப்பேட்டை, திருப்பத்தூா், திருச்சி ஆகிய 17 மாவட்டங்களில் ஓரிரு இடங்களில் பலத்த மழை பெய்ய வாய்ப்புள்ளது. சென்னையில் ஒருசில பகுதிகளில் இடி, மின்னலுடன் கூடிய லேசானது முதல் மிதமான மழைக்கு வாய்ப்புள்ளது.
மீனவா்களுக்கு எச்சரிக்கை: செப்.4, 5, 6 ஆகிய தேதிகளில் குமரிக்கடல், மன்னாா் வளைகுடா, தென்தமிழக கரையோரம், தென்மேற்கு வங்கக்கடலில் சூறாவளி வீச வாய்ப்புள்ளது. மணிக்கு 40 முதல் 60 கி.மீ. வேகத்தில் பலத்த சூறாவளி வீசவுள்ளதால் மீனவா்களுக்கு 5 நாள்களுக்கு எச்சரிக்கை விடுக்கப்பட்டுள்ளது.