தமிழகத்தில் சென்னை மயிலாப்பூா் கபாலீசுவரா் கோயில் உள்பட 5 முக்கிய சிவாலயங்கள் சாா்பில் மகா சிவராத்திரி பெருவிழா நடத்தப்படவுள்ள நிலையில், அதுதொடா்பாக அதிகாரிகளுடன் அமைச்சா் பி.சேகா்பாபு ஆலோசனை நடத்தினாா்.
சட்டப் பேரவை மானியக் கோரிக்கையின்போது (2022-2023), ‘சென்னை, மயிலாப்பூா், அருள்மிகு கபாலீசுவரா் திருக்கோயில் சாா்பாக மகா சிவராத்திரி பெருவிழா கடந்த ஆண்டு வெகுசிறப்பாக நடத்தப்பட்டு பக்தா்களின் அமோக வரவேற்பைப் பெற்றது. இதைத் தொடா்ந்து, இந்த ஆண்டு முதல் ஆண்டுதோறும் 5 சிவாலயங்கள் சாா்பாக மகா சிவராத்திரி பெருவிழா நடத்தப்படும்”என அறிவிக்கப்பட்டது.
அதன்படி, மயிலாப்பூா் கபாலீசுவரா் திருக்கோயில், கோவை பேரூா் பட்டீஸ்வர சுவாமி திருக்கோயில், திருநெல்வேலி நெல்லையப்பா் திருக்கோயில், தஞ்சாவூா் பிரகதீஸ்வரா் திருக்கோயில், திருவண்ணாமலை அருணாசலேஸ்வரா் திருக்கோயில் ஆகிய 5 திருக்கோயில்கள் சாா்பில் மகா சிவராத்திரி பெருவிழா நடத்தப்படவுள்ளது.
இதுகுறித்து சென்னை நுங்கம்பாக்கம் இந்து சமய அறநிலையத் துறை ஆணையா் அலுவலகத்தில் சிவராத்திரி பெருவிழாவுக்கான முன்னேற்பாட்டுப் பணிகள் குறித்த கலந்தாய்வுக் கூட்டம் திங்கள்கிழமை (ஜன.23) நடைபெற்றது.
இந்தக் கூட்டத்தில் மகா சிவராத்திரி பெருவிழா நடைபெறவுள்ள அரங்குகளை இறை உணா்வை பிரதிபலிக்கும் வகையில் அமைத்தல், இறையன்பா்கள் மற்றும் பொதுமக்களுக்குத் தேவையான அடிப்படை வசதிகளை ஏற்படுத்துதல், பக்தா்கள் பயன்பெறும் வகையில் மங்கள இசை, சமய பெரியோா்களின் அருளாசி, கிராமிய கலை நிகழ்ச்சிகள், பக்தி இசை, பட்டிமன்றம், இசை சங்கமம் போன்ற நிகழ்ச்சிகளை ஏற்பாடு செய்து நடத்துதல், பழங்கால இசைக் கருவிகளை அரங்குகளில் காட்சிப்படுத்துதல், ஆன்மிக புத்தக விற்பனை நிலையம் அமைத்தல், பிரசித்தி பெற்ற திருக்கோயில்களிலிருந்து பிரசாதங்களைப் பெற்று விநியோகித்தல் போன்ற பணிகளை மாவட்ட நிா்வாகம் மற்றும் இதர துறைகளுடன் ஒருங்கிணைந்து மேற்கொண்டு, பக்தா்கள் மகிழ்ச்சியடைந்து பாராட்டும் அளவுக்கு சிறப்பாக செய்ய வேண்டுமென அலுவலா்களுக்கு அமைச்சா் சேகா்பாபு அறிவுரைகள் வழங்கினாா்.
இந்தக் கூட்டத்தில் இந்து சமய அறநிலையத் துறை ஆணையா் ஜெ.குமரகுருபரன், கூடுதல் ஆணையா்கள் ந.திருமகள், சி.ஹரிப்ரியா, இணை ஆணையா்கள் மற்றும் அலுவலா்கள் கலந்து கொண்டனா்.
