அதிமுக இழந்த 10% வாக்குகளை பெற கட்சியினா் தீவிர பணியாற்ற வேண்டும்: எடப்பாடி பழனிசாமி

மக்களவைத் தோ்தலில் அதிமுக இழந்த 10 சதவீத வாக்குகளை மீண்டும் பெற கட்சியினா் தீவிரமாக பணியாற்ற வேண்டும் என்று கட்சியின் பொதுச்செயலா் எடப்பாடி பழனிசாமி கூறினாா்.

அதிமுக தகவல் தொழில்நுட்பப் பிரிவு மாநில நிா்வாகிகள், மண்டல நிா்வாகிகள், மாவட்டச் செயலா்கள் ஆலோசனைக் கூட்டம், சென்னை ராயப்பேட்டையில் உள்ள கட்சியின் தலைமை அலுவலகத்தில் செவ்வாய்க்கிழமை நடைபெற்றது.

கூட்டத்தில் எடப்பாடி பழனிசாமி பங்கேற்று பேசியதாவது: சட்டப்பேரவைத் தோ்தலுக்கு இன்னும் 15 மாதங்களே உள்ள நிலையில், அதிமுக தகவல் தொழில்நுட்ப பிரிவினரின் செயல்பாடு இன்னும் தீவிரமாக வேண்டும்.

அதிமுக ஆட்சியின் சாதனைகளையும், திமுக ஆட்சியின் தோல்விகளையும் அனைத்து சமூக வலைதளங்களிலும் கொண்டு சோ்க்க வேண்டும். தமிழகத்தில் நிலவும் சட்டம் - ஒழுங்கு சீா்கேடுகளையும், தமிழகத்தில் போதைப் பொருள் புழக்கம் அதிகரித்துள்ளதையும் மக்களிடம் விளக்க வேண்டும்.

புதுமுக வாக்காளா்கள், இளைஞா்கள் வாக்குகள் 40 சதவீதம் உள்ளன. அந்த வாக்குகளை முழுமையாக அதிமுக பெறும் வகையில் பணியாற்ற வேண்டும். பொய் வாக்குறுதிகள் மூலம் இளைஞா்களைக் கவர திமுக முயற்சிக்கிறது. அதை முறியடிக்க வேண்டும் என்றாா் அவா்.

அவைத் தலைவா் தமிழ்மகன் உசேன், மூத்த நிா்வாகிகள் கே.பி.முனுசாமி, திண்டுக்கல் சீனிவாசன், நத்தம் விஸ்வநாதன், எஸ்.பி.வேலுமணி, தகவல் தொழில்நுட்பப் பிரிவு செயலா் ராஜ் சத்யன் உள்பட பலா் கூட்டத்தில் பங்கேற்றனா்.

பொறுப்பாளா்கள் நியமனம்: அதிமுகவின் உறுப்பினா் அட்டை வழங்கும் பணிகளை மேற்பாா்வையிட மாவட்ட வாரியாகப் பொறுப்பாளா்களை நியமித்து அக் கட்சியின் பொதுச்செயலா் எடப்பாடி பழனிசாமி அறிவித்துள்ளாா்.

இது தொடா்பாக அவா் வெளியிட்ட அறிக்கை: அதிமுக நிா்வாகிகளுக்கும், உறுப்பினா்களுக்கும் புதிய உறுப்பினா் உரிமைச் சீட்டுகள் வழங்கும் பணி மாவட்டம் வாரியாக முழு வீச்சில் நடைபெற்று வருகிறது. சம்பந்தப்பட்ட மாவட்டங்களில், புதிய உறுப்பினா் உரிமைச் சீட்டுகள் அனைவருக்கும் கிடைத்திடும் வகையில், மாவட்டச் செயலா்களுடன் இணைந்து இப்பணியை விரைந்து முடிப்பதற்கு ஏதுவாக, மாவட்டம் வாரியாக பொறுப்பாளா்கள் நியமிக்கப்படுகின்றனா். பொறுப்பாளா்கள் அனைவரும் உடனடியாக சம்பந்தப்பட்ட மாவட்டங்களுக்கு நேரில் சென்று, அனைவருக்கும் உறுப்பினா் உரிமைச் சீட்டுகள் வழங்கும் பணியினை நிறைவு செய்து, அதன் விவரங்களை அக். 13-க்குள் தலைமைக் கழகத்தில் அளிக்க வேண்டும் என்று அவா் கூறியுள்ளாா்.

முன்னாள் அமைச்சா்கள், மூத்த நிா்வாகிகள் அதிமுகவின் 82 மாவட்டங்களுக்கும் பொறுப்பாளா்களாக அறிவிக்கப்பட்டுள்ளனா்.