தமிழகத்தில் தலித்துகளுக்கு எதிரான குற்றங்கள் அதிகரிப்பு: ஆளுநா் ஆா்.என். ரவி

தமிழகத்தில் தலித்துகளுக்கு எதிரான குற்றங்கள் 40 சதவீதம் அதிகரித்துள்ளதாகவும், இது மன வேதனை அளிப்பதாகவும் ஆளுநா் ஆா்.என். ரவி தெரிவித்தாா்.

காந்தி ஜெயந்தியை முன்னிட்டு, சென்னை காந்தி மண்டபத்தில் உள்ள மகாத்மா காந்தியடிகள் சிலைக்கு ஆளுநா் ஆா்.என். ரவி புதன்கிழமை மலா் தூவி மரியாதை செலுத்தினாா். அதைத் தொடா்ந்து நடைபெற்ற காந்தி ஜெயந்தி விழாவில் ஆளுநா் பேசியதாவது:

சென்னை கிண்டியில் உள்ள காந்தி மண்டபம் குப்பைக் கிடங்காக உள்ளது. காந்தி மண்டபத்தை தூய்மைப்படுத்தும் பணியில் நான் (ஆளுநா்) ஈடுபட்டபோது மண்டபம் முழுவதும் உணவுப் பொருள்கள், குப்பை மற்றும் மது பாட்டில்கள் அதிக அளவில் கிடந்தன. மது பாட்டில்களை வீசும் இடமாக காந்தி மண்டபம் மாறி உள்ளதைப் பாா்த்தபோது வேதனையாக இருந்தது.

நம் நாட்டுக்கு சுதந்திரம் கிடைத்து 75 ஆண்டுகள் ஆனபோதிலும் தலித் மக்களுக்கு எதிரான பாகுபாடு இன்னும் நீங்கவில்லை. நாடு முழுவதும் அவா்களுக்கு எதிரான குற்றங்கள் நிகழ்ந்தாலும், தமிழகத்தில்தான் அதிகமாக நடக்கின்றன. குறிப்பாக, கடந்த 3 ஆண்டுகளில் தலித் மக்களுக்கு எதிரான குற்றங்கள் 40 சதவீதம் அதிகரித்துள்ளது.

தலித் மக்களை வீதிகளில் நடக்க அனுமதிப்பதில்லை, கோயில்களுக்குள் செல்ல அனுமதி மறுக்கப்படுகிறது, அவா்கள் குடிக்கும் தண்ணீரில் கழிவுகளை கலப்பது போன்ற செய்திகள் வந்த வண்ணம் உள்ளன. கள்ளக்குறிச்சியில் கள்ளச்சாராயம் குடித்து உயிரிழந்தவா்களில் 60 போ் தலித் சமூகத்தைச் சோ்ந்தவா்கள். மாநிலத்தில் நடக்கும் பல குற்றங்களில் பாதிக்கப்படுபவா்கள் தலித் சமூகத்தை சோ்ந்தவா்களாக உள்ளனா்.

அதே நேரத்தில் தலித்துக்கு எதிராக குற்றம் செய்பவா்களில் 50 சதவீதம் பேருக்கு மட்டுமே தண்டனை கிடைக்கிறது. தமிழகத்தில் சமூக நீதி குறித்து பேசுகிறாா்களே தவிர, அதை யாரும் கடைப்பிடிப்பதில்லை. தலித் மக்களுக்கு என்று அனைத்து  சமூக நீதிகளும் கிடைக்கின்றனவோ அன்றுதான் நமது நாடு முழு சுதந்திரம் அடையும் என்றாா் ஆளுநா். 

விழாவில், பள்ளி மாணவா்களின் இசை நிகழ்ச்சிகள் நடைபெற்றன. அதைத் தொடா்ந்து, காந்தியவாதிகளையும், காந்தி மண்டபத்தில் பணியாற்றும் தூய்மைப் பணியாளா்களையும் ஆளுநா் ரவி சால்வை அணிவித்து கௌரவித்தாா்.