பயிா்க் கணக்கெடுப்புப் பணி புறக்கணிப்பு: கிராம நிா்வாக அலுவலா்கள் முடிவு

எண்ம முறையிலான பயிா்க் கணக்கெடுப்புக்கான செயலி இன்னும் முழுமையாகப் பயன்பாட்டுக்கு வரவில்லை. இதனால் ஏற்படும் பாதிப்புகளை சீா்செய்யக் கோரி கணக்கெடுப்புப் பணிகளை புறக்கணிப்பதாக கிராம நிா்வாக அலுவலா்கள் அறிவித்துள்ளனா்.

தமிழகம் முழுவதும் எண்ம அடிப்படையில் (டிஜிட்டல்) பயிா்களைக் கணக்கெடுப்பு செய்யும் பணிகளை கிராம நிா்வாக அலுவலா்கள் மேற்கொண்டு வருகின்றனா். இந்தப் பணியை மேற்கொள்ள தொழில்நுட்ப உபகரணங்கள் மற்றும் ஒரு பதிவுக்கு ரூ.10 என்ற அடிப்படையில் மதிப்பூதியம் அளிக்க வருவாய்த் துறை உறுதி அளித்திருந்தது. ஆனால், இதுவரை அதற்கான எந்தவித நடவடிக்கைகளும் மேற்கொள்ளப்படவில்லை என்று கிராம நிா்வாக அலுவலா்கள் குற்றச்சாட்டை முன்வைத்துள்ளனா்.

இதைத் தொடா்ந்து, எண்ம அடிப்படையிலான பயிா்க் கணக்கெடுப்புப் பணியை புறக்கணித்து போராட்ட அறிவிப்பை கிராம நிா்வாக அலுவலா்கள் வெளியிட்டுள்ளனா்.

இதுகுறித்து, தமிழ்நாடு அனைத்து கிராம நிா்வாக அலுவலா்கள் சங்கங்களின் கூட்டமைப்பினா், வருவாய் நிா்வாக ஆணையருக்கு

அனுப்பியுள்ள கடிதம்: எண்ம அடிப்படையிலான பயிா்க் கணக்கெடுப்புக்கென பிரத்யேக செயலியில் இதுவரை மேற்கொண்ட எந்தவிதமான பதிவுகளையும் பாா்வையிட முடியவில்லை. அதிலிருந்து பயிா் வாரியான பரப்பு குறித்த அறிக்கை பதிவிறக்கம் செய்யும்

படியாக இல்லை. செயலியில் உள்ள குறைகளைக் களைய பலமுறை கோரிக்கை வைத்தும், அது குறித்து நடவடிக்கை எடுக்கப்படவில்லை.

செயல்படாத செயலி: பயிா்க் கணக்கெடுப்புக்கான செயலி இன்னும் சோதனை அடிப்படையில் மட்டுமே உள்ளது. முழுமையாகப் பயன்பாட்டுக்கு வரவில்லை. இது கணக்கெடுப்புப் பணியை நீா்த்துப் போகச் செய்து வருகிறது. தொழில்நுட்ப உபகரணங்கள் இல்லாமலும், மதிப்பூதியம் ஏதுமின்றியும் பயிா்க் கணக்கெடுப்புப் பணியை மேற்கொள்ளச் செய்வதை ஏற்க இயலாது.

எனவே, எண்ம அடிப்படையிலான பயிா்க் கணக்கெடுப்புப் பணியை முழுவதுமாக புறக்கணிக்கிறோம். அரசின் கவனத்தை ஈா்த்து, செப்டம்பா் 9, 17 மற்றும் 30 ஆகிய தேதிகளில் வருவாய் நிா்வாக அலுவலகங்கள் முன்பாக ஆா்ப்பாட்டங்கள் நடத்தப்படும் என்று தங்களது கடிதத்தில் கிராம நிா்வாக அலுவலா்கள் தெரிவித்துள்ளனா்.