நாளை ஆசிரியா் தினவிழா: விருதுகளை வழங்குகிறாா் அமைச்சா் உதயநிதி

தமிழக பள்ளிக் கல்வித் துறை சாா்பில் நிகழாண்டுக்கான ஆசிரியா் தின விருது வழங்கும் விழா சென்னையில் வியாழக்கிழமை (செப்.5) நடைபெறவுள்ளது. இதில் அமைச்சா் உதயநிதி ஸ்டாலின் கலந்து கொண்டு ஆசிரியா்களுக்கு விருதுகளை வழங்கவுள்ளாா்.

முன்னாள் குடியரசுத் தலைவா் ராதாகிருஷ்ணனின் பிறந்த நாளான செப். 5-ஆம் தேதி ஆண்டுதோறும் ஆசிரியா் தினமாக கடைப்பிடிக்கப்படுகிறது. இந்நாளில், சிறந்த ஆசிரியரை தோ்வு செய்து ‘டாக்டா் ராதாகிருஷ்ணன் விருது’ வழங்கி தமிழக அரசு கெளரவித்து வருகிறது. விருது பெறுபவா்களுக்கு ரூ.10,000 ரொக்கமும், வெள்ளிப் பதக்கம் மற்றும் பாராட்டுச் சான்றிதழும் வழங்கப்படும். அதன்படி, நிகழாண்டு மாநில நல்லாசிரியா் விருதுக்கு தகுதியானவா்களை விண்ணப்பிக்க பள்ளிக் கல்வித்துறை அழைப்பு விடுத்திருந்தது. அதற்கான இணையதள விண்ணப்பப் பதிவு ஜூலை 16-ஆம் தேதி தொடங்கி ஜூலை 23-ஆம் தேதி முடிவடைந்தது. ஆசிரியா்களின் வேண்டுகோளை ஏற்று ஜூலை 29 வரை விண்ணப்பிக்க கூடுதல் அவகாசம் வழங்கப்பட்டது. இதையடுத்து ‘எமிஸ்’ தளம் மூலமாக ஏராளமான ஆசிரியா்கள் விண்ணப்பித்துள்ளனா்.

386 பேருக்கு விருதுகள்: நிகழாண்டு 342 அரசு மற்றும் அரசு உதவி பெறும் பள்ளி ஆசிரியா்கள், 38 தனியாா் பள்ளி ஆசிரியா்கள், ஆங்கிலோ இந்தியன் பள்ளிகள், சமூக பாதுகாப்புத் துறை பள்ளிகள், மாற்றுத் திறனாளி ஆசிரியா்களில் தலா 2 போ் என மொத்தம் 386 பேருக்கு விருதுகள் வழங்கப்படவுள்ளன.

இந்த நிலையில், பள்ளிக் கல்வித் துறை சாா்பில் நிகழாண்டுக்கான டாக்டா் ராதாகிருஷ்ணன் விருது வழங்கும் விழா சென்னை வண்டலூரில் உள்ள பி.எஸ்.அப்துா் ரகுமான் கிரசண்ட் அறிவியல் மற்றும் தொழில்நுட்பக் கல்வி நிறுவனத்தில் வியாழக்கிழமை காலை 11 மணிக்கு நடைபெறவுள்ளது.

இதில், சிறப்பு அழைப்பாளராக இளைஞா் நலன் மற்றும் விளையாட்டு மேம்பாட்டுத் துறை அமைச்சா் உதயநிதி ஸ்டாலின் கலந்து கொண்டு ஆசிரியா்களுக்கு விருதுகளை வழங்கி பேருரையாற்றவுள்ளாா்.

தொடா்ந்து, பள்ளிக் கல்வித் துறை அமைச்சா் அன்பில் மகேஸ் பொய்யாமொழி, குறு, சிறு, நடுத்தர தொழில் நிறுவனங்கள் துறை அமைச்சா் தா.மோ.அன்பரசன் ஆகியோா் சிறப்புரையாற்றவுள்ளனா்.