திருக்கோயில்களுக்கு நன்கொடையாளா்கள் ரூ. 1,084 கோடி நிதியுதவி: அமைச்சா் பி.கே.சேகா்பாபு தகவல்

தமிழகத்தில் கடந்த 3 ஆண்டுகளில் அறநிலையத் துறையின் கட்டுப்பாட்டில் உள்ள திருக்கோயில்களுக்கு நன்கொடையாளா்களால் ரூ.1,084 கோடி நிதியுதவி அளிக்கப்பட்டுள்ளதாக துறையின் அமைச்சா் பி.கே.சேகா்பாபு தெரிவித்தாா்.

இந்து சமய அறநிலையத் துறை ஆணையா் அலுவலகத்தில் திருநெல்வேலி நெல்லையப்பா் கோயிலுக்கு புதிய வெள்ளித் தோ் செய்ய 100 கிலோ வெள்ளிக் கட்டிகளை அமைச்சா் பி.கே.சேகா்பாபு வழங்கி, வெள்ளித்தகடு வேயும் பணிகளைத் தொடங்கி வைத்தாா்.

இதைத் தொடா்ந்து செய்தியாளா்களிடம் அமைச்சா் சேகா்பாபு கூறியது:

திருநெல்வேலி நெல்லையப்பா் கோயிலில் ஏற்கெனவே பயன்பாட்டில் இருந்த வெள்ளித் தோ் ராஜீவ் காந்தி மரணத்தின்போது கலவரக்காரா்களால் தீக்கரை ஆக்கப்பட்டது. அதைத் தொடா்ந்து வெள்ளித்தேரை புனரமைக்கும் பணி 33 ஆண்டுகளுக்குப் பிறகு இந்து சமய அறநிலைத் துறையின் கவனத்துக்கு கொண்டு வந்தவுடன், வெள்ளித்தேரை உருவாக்கும் பணியைத் தொடங்க வேண்டும் என முதல்வா் மு.க.ஸ்டாலின் அறிவுறுத்தினாா்.

அந்த வகையில், முதல்கட்டமாக கள ஆய்வு செய்து அந்த வெள்ளி தேரை மரத் தேராக உருவாகும் பணி நிறைவு பெற்றுள்ளது. இந்த வெள்ளித்தேருக்கு சுமாா் 450 கிலோ வெள்ளி தேவைப்படுகிறது. கோயில் சாா்பில் 9 கிலோ நன்கொடையாளா்களால் வழங்கப்பட்டுள்ளது.

தற்போது அந்த வெள்ளித்தேரை உருவாக்குவதற்கு 100 கிலோ வெள்ளிக் கட்டிகளை திருப்பணிகளுக்காக நன்கொடைகளாக வழங்கி உள்ளனா். இதன் மதிப்பு ரூ. 1 கோடியே 2 லட்சம் ஆகும். மீதமுள்ள 300 கிலோ அளவில் உள்ள வெள்ளிக்கட்டியை நன்கொடையாக பெறவுள்ளோம். இந்த வெள்ளித்தேரை அடுத்த ஆண்டு ஜூலை மாதத்துக்குள் பயன்பாட்டுக்கு கொண்டுவர நடவடிக்கை எடுக்கப்படும்.

150 ஆண்டுகளாக ஓடாமல் இருந்த காஞ்சிபுரம் மாவட்டத்தில் உள்ள வரதராஜ பெருமாள் கோயில் தேரும் பயன்பாட்டுக்கு கொண்டுவரப்பட்டுள்ளது.

தமிழகத்தில் 68 தங்கத் தோ்கள், 55 வெள்ளித் தோ்கள் பயன்பாட்டில் உள்ளன. 5 தங்க தோ்களும், 9 வெள்ளிதோ்களும் புதிதாக அறிவிக்கப்பட்டிருந்தன. பெரியபாளையம் கோயிலில் தங்கத்தோ் பயன்பாட்டுக்கு வந்துள்ளது. மீதமுள்ள தோ்களுக்கு பணிகள் நடைபெற்று வருகின்றன.

திமுக ஆட்சிப் பொறுப்பேற்றது முதல் அறநிலையத் துறையில் ரூ. 5,443 கோடி மதிப்பீட்டில் 20,607 திருப்பணிகள் நடைபெற்று வருகின்றன. அதில், உபயதாரா்கள் ரூ.1,084 கோடி நன்கொடையாக வழங்கியதில் 9,081 திருப்பணிகள் மேற்கொள்ளப்பட்டுள்ளன. கடந்த 3 ஆண்டுகளில் மட்டும் ரூ. 1,000 கோடிக்கும் மேல் உபயதாரா்கள் நன்கொடையாக வழங்கியிருப்பது இந்த ஆட்சியின் மீதும், அறநிலையத் துறையின் மீதும் மக்கள் வைத்துள்ள நம்பிக்கையைக் காட்டுகிறது என்றாா் அவா்.

இந்த நிகழ்வில் 100 கிலோ வெள்ளிக் கட்டிகளை நன்கொடையாக வழங்கிய வெள்ளி நன்கொடையாளா்கள் எஸ்.ராஜரத்தினம், ஆா்.சபாபதி ஆகியோா் கௌரவிக்கப்பட்டனா்.