மக்களுடன் முதல்வா் திட்ட முகாம்: மகளிா் உரிமைத் தொகை - குவிந்த மனுக்கள்

ஆலங்குளம் ஒன்றியம் குறிப்பன்குளத்தில் வியாழக்கிழமை நடைபெற்ற ‘மக்களுடன் முதல்வா்’ திட்ட முகாமில் மகளிா் உரிமைத் தொகை கோரி மனு அளிக்க திரளான மக்கள் குவிந்தனா்.

ஆலங்குளம் ஊராட்சி ஒன்றியம், நெட்டூா், அய்யனாா்குளம், சுப்பையாபுரம், நாரணபுரம், மேலவீராணம், கிடாரக்குளம், குறிப்பன்குளம் ஆகிய ஊராட்சிகளுக்கான மக்களுடன் முதல்வா் திட்ட முகாம் குறிப்பன்குளத்தில் வியாழக்கிழமை நடைபெற்றது.

ஆலங்குளம் ஒன்றியக் குழுத் தலைவா் திவ்யா மணிகண்டன் தலைமை வகித்து, முகாமைத் தொடங்கி வைத்துப் பேசினாா். அனைத்துத் துறை அதிகாரிகள், அலுவலா்கள் பொதுமக்களிடமிருந்து மனுக்களைப் பெற்றுக் கொண்டனா். திட்டம் குறித்து எவ்வித அறிவிப்பும் அரசு சாா்பில் வெளியிடாத நிலையில் மகளிா் உரிமைத் தொகைத் திட்டத்திற்கு மனுக்கள் அளிக்க நூற்றுக்கணக்கான பெண்கள் நீண்ட வரிசையில் நின்று மனுக்கள் அளித்தனா். மக்களை ஒழுங்கு படுத்தும் பணியில் போலீஸாா் ஈடுபட்டனா்.

இந்த முகாமில் வட்டார வளா்ச்சி அலுவலா் கல்யாணராமன், துணை வட்டார வளா்ச்சி அலுவலா் சுப்பையா, துணை வட்டாட்சியா் சீனிப்பாண்டியன், ஆலங்குளம் தெற்கு ஒன்றிய திமுக செயலா் செல்லத்துரை, ஊராட்சித் தலைவா்கள், ஊராட்சி செயலா்கள் கலந்து கொண்டனா்.