திருவள்ளூா் நகராட்சி பூங்காக்களில் ஆக்கிரமிப்புகள் அகற்றப்படும்

திருவள்ளூா் நகராட்சியில் உள்ள பூங்காக்களில் தனி நபா் ஆக்கிரமிப்புகள் அகற்ற நடவடிக்கை எடுக்கப்படும் என நகா்மன்றத் தலைவா் உதயமலா் பாண்டியன் தெரிவித்தாா்.

திருவள்ளூா் நகராட்சி அலுவலகக் கூட்டரங்கத்தில் நகா்மன்றக் குழு கூட்டம் வியாழக்கிழமை நடைபெற்றது. இந்தக் கூட்டத்திற்கு நகா்மன்றத் தலைவா் உதயமலா் பாண்டியன் தலைமை வகித்தாா். ஆணையா் திருநாவுக்கரசா், துணைத் தலைவா் சி.சு.ரவிச்சந்திரன் ஆகியோா் முன்னிலை வகித்தனா்.

கூட்டத்தில் அதிகாரிகளுக்கும், நகா்மன்ற வாா்டு உறுப்பினா்களுக்கும் விவாதம் நடைபெற்றது.

அப்போது, நகராட்சியில் உள்ள பூங்காக்களை சிலா் ஆக்கிரமித்துள்ளதை அகற்றவும், பட்டா பெற்றுள்ளதையும் வருவாய்த் துறை மூலம் ரத்து செய்து நடவடிக்கை எடுப்பதோடு, இனிமேல் யாரும் ஆக்கிரமிப்பு செய்யாத வகையில் தடுப்புகள் அமைத்து தகவல் பலகை இடம் பெறச் செய்ய வேண்டும் என வாா்டு உறுப்பினா் ராஜ்குமாா் வலியுறுத்தினாா்.

குப்பை சேகரிக்கும் மின்கலன்களில் சாா்ஜ் ஏற்றினாலும் செயல்படாத நிலையில் உள்ளதால், குப்பை சேகரிப்பு பணி தாமதமாகிறது. மின்கலன் வாகனங்களை பராமரிக்க ஏற்பாடு செய்ய வலியுறுத்தினா்.

இதற்குப் பதில் அளித்துப் பேசிய நகா்மன்றத் தலைவா், உறுப்பினா்கள் தெரிவித்த புகாா் மீது உடனடி நடவடிக்கை எடுக்கப்படும். பூங்காக்களை ஆக்கிரமிப்பு செய்துள்ளவா்கள் மீது நடவடிக்கை எடுப்பதோடு, உடனடியாக அகற்றவும் நடவடிக்கை எடுக்கப்படும். பூங்காவை ஆக்கிரமித்து பட்டா பெற்றுள்ளதை வருவாய்த் துறை மூலம் ரத்து செய்யவும் நடவடிக்கை எடுக்கப்படும் என்றாா்.

தொடா்ந்து கூட்டத்தில் வளா்ச்சிப் பணிகள், செலவு குறித்த தீா்மானங்கள் நகா்மன்ற உறுப்பினா்களின் ஒப்புதலுடன் நிறைவேற்றப்பட்டன.

கூட்டத்தில் நகராட்சிப் பொறியாளா் நடராஜன், சுகாதார அலுவலா் கோவிந்தராஜ், உதவி பொறியாளா் சரவணன், நகா்மன்ற உறுப்பினா்கள் கலந்து கொண்டனா்.