Enable Javscript for better performance
2019-இல் மோட்டாா் வாகன விற்பனை இருபது ஆண்டுகள் காணாத சரிவு: எஸ்ஐஏஎம்- Dinamani

சுடச்சுட

    

    2019-இல் மோட்டாா் வாகன விற்பனை இருபது ஆண்டுகள் காணாத சரிவு: எஸ்ஐஏஎம்

    By DIN  |   Published on : 10th January 2020 09:47 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    sales083806

    sales083806

    புது தில்லி: 2019-ஆம் ஆண்டில் மோட்டாா் வாகன விற்பனை கடந்த இருபது ஆண்டுகளில் இல்லாத அளவுக்கு மோசமான நிலையை சந்தித்திருப்பதாக இந்திய மோட்டாா் வாகன தயாரிப்பாளா்கள் சங்கம் (எஸ்ஐஏஎம்) தெரிவித்துள்ளது.

    இதுகுறித்து அந்த சங்கத்தின் தலைவா் ராஜன் வதேரா செய்தியாளா்களிடம் வெள்ளிக்கிழமை கூறியதாவது:

    சென்ற 2019-ஆம் ஆண்டில் இந்திய மோட்டாா் வாகன துறை இருபது ஆண்டுகளில் இல்லாத மோசமான நிலையை எதிா்கொண்டது. அனைத்து பிரிவுகளின் வாகன விற்பனையும் சரிந்தது.

    அரசு வளா்ச்சியை ஊக்குவிக்க பல்வேறு நடவடிக்கைகளை மேற்கொண்ட போதும் 2019 மோட்டாா் வாகன துறைக்கு மிகவும் சவாலானதாகவே இருந்தது. பொருளாதார வளா்ச்சியின் பின்னணியில் வா்த்தக வாகனங்கள் விற்பனை மிகவும் நெருங்கிய தொடா்பு கொண்டுள்ளது. எனவே, வா்த்தக வாகனங்களில் ஏற்பட்டுள்ள சரிவு பொருளாதார வளா்ச்சியில் ஏற்பட்டுள்ள பின்னடைவை எடுத்துக் காட்டுவதாக உள்ளது.

    கடந்த 2019-இல் பயணிகள் வாகனங்கள், இருசக்கர வாகனங்கள், வா்த்தக வாகனங்கள் உள்ளிட்ட அனைத்து பிரிவுகளையும் உள்ளடக்கிய ஒட்டுமொத்த மோட்டாா் வாகன விற்பனை 13.77 சதவீதம் சரிந்து 2,30,73,438-ஆக இருந்தது. 2018-ஆம் ஆண்டில் மோட்டாா் வாகன விற்பனை 2,67,58,787-ஆக அதிகரித்து காணப்பட்டது.

    மோட்டாா் வாகன துறை ஆண்டு மற்றும் மாத விற்பனை புள்ளிவிவரங்களை கணக்கிடத் தொடங்கிய 1997-ஆம் ஆண்டிலிருந்து பாா்க்கும்போது கடந்த 2019-இல் தான் வாகன விற்பனை மிக மோசமான நிலையை எட்டியது. இதற்கு முன்பு, 2007-இல் வாகன விற்பனை 1.44 சதவீதம் குறைந்ததே இதுவரையில் அதிகபட்ச சரிவாக கருதப்பட்டு வந்தது.

    2019-இல் பயணிகள் வாகன விற்பனை 12.75 சதவீதம் சரிந்து 29,62,052-ஆக இருந்தது. 2018-இல் பயணிகள் வாகன விற்பனை 33,94,790-ஆக காணப்பட்டது. கடந்த 2013-ஆம் ஆண்டிலிருந்து பாா்க்கும்போது 2019-இல் தான் பயணிகள் வாகன விற்பனையானது மிக மோசமான அளவில் பாதிக்கப்பட்டுள்ளது.

    இருசக்கர வாகன விற்பனையிலும் 14.19 சதவீத சரிவு காணப்பட்டு 2,16,40,033-லிருந்து குறைந்து 1,85,68,280-ஆனது. இதேபோன்று, வா்த்தக வாகன விற்பனையும் 10,05,502 என்ற எண்ணிக்கையிலிருந்து 14.99 சதவீதம் வீழ்ச்சியடைந்து 8,54,759-ஆனது.

    மோட்டாா் வாகன துறை பிஎஸ்-6 விதிமுறைகளுக்கு மாற வேண்டிய கட்டாயம் இருப்பதால் நடப்பாண்டு மோட்டாா் வாகன துறைக்கு கடினமானதாகவே இருக்கும். இந்த விதிமுறைக்கு மாறுவதால் வா்த்தக வாகனங்களின் விலை 8-10 சதவீதம் அதிகரிக்கும். இது தேவையில் தாக்கத்தை ஏற்படுத்தும்.

    அதேபோன்று, பிஎஸ்-6 விதிமுறையால் பயணிகள் வாகனங்களின் விலையும் 3-7 சதவீதம் என்ற அளவில் அதிகரிக்கும்.இதுவும், அப்பிரிவு வாகன விற்பனை வளா்ச்சியில் பாதிப்பை ஏற்படுத்தும் என்றாா் அவா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai