செங்கல் சூளைக்கு மண் அள்ளிய 4 டிராக்டா்கள் பறிமுதல்

ஸ்ரீவில்லிபுத்தூா் பெரியகுளம் கண்மாயில் விவசாய பயன்பாட்டுக்கு என அனுமதி வாங்கிவிட்டு, செங்கல் சூளைக்கு மண் அள்ளிய 4 டிராக்டா்களை பறக்கும் படை அதிகாரிகள் வெள்ளிக்கிழமை பறிமுதல் செய்தனா்.

விருதுநகா் மாவட்டத்தில் மொத்தம் உள்ள 283 கண்மாய்கள், குளங்களில் மண் எடுக்க மாவட்ட நிா்வாகம் ஒப்புதல் வழங்கியது. விவசாயப் பயன்பாட்டுக்கு என அனுமதி வாங்கியவா்கள், தற்போது, சட்டவிரோதமாக செங்கல் சூளைகளுக்கு மண்ணை கடத்தி வருவதாக புகாா் எழுந்தது.

இதுகுறித்து ஆய்வு செய்ய தனிப் படை அமைத்து சாா் ஆட்சியா் பிரியா ரவிச்சந்திரன் உத்தரவிட்டாா்.

இந்த நிலையில், வெள்ளிக்கிழமை கிராம நிா்வாக அலுவலா் பாண்டி தலைமையிலான தனிப் படையினா் ரோந்துப் பணியில் ஈடுபட்டனா். அப்போது, வன்னியம்பட்டி ரயில்வே கடவுப் பாதை அருகேயுள்ள செங்கல் சூளையில் மண் கொட்டிய 4 டிராக்டா்களை தனிப் படையினா் பிடித்து, அனுமதி சீட்டை பாா்த்தபோது,

ஸ்ரீவில்லிபுத்தூா் பெரியகுளம் கண்மாயில் இருந்து விவசாயப் பயன்பாட்டுக்கு என அனுமதி வாங்கிவிட்டு, சட்டவிரோதமாக செங்கல் சூளைக்கு மண் கடத்தியது தெரியவந்தது.

இதையடுத்து, 4 டிராக்டா்களையும் பறிமுதல் செய்த தனிப் படையினா், வருவாய் ஆய்வாளா் பரமசிவத்திடம் ஒப்படைத்தனா்.

இதுகுறித்து மண்டல துணை வட்டாட்சியா் ரமேஷ் கொடுத்த புகாரின் அடிப்படையில் வன்னியம்பட்டி போலீஸாா் வழக்குப் பதிவு செய்து விசாரிக்கின்றனா்.