கண்டது
* (விழுப்புரம் பழைய பேருந்துநிலையம் அருகே ஒரு பூக்கடையின் பெயர்)
மலர்வனம்
கே.இந்துகுமரப்பன், விழுப்புரம்.
* (திண்டுக்கல்லில் ஒரு ஹெல்மெட் கடையின் பெயர்)
மண்டை பத்திரம்
பி.பழனிச்சாமி, தாடிக்கொம்பு.
* (செங்கல்பட்டில் உள்ள தனியார் மருத்துவமனை ஒன்றில் குழந்தைகள் பிரிவு பகுதியில்)
இந்த உலகத்தில் சந்தோஷமாக இருக்க
வேண்டும் என்றால்...
ஒன்று குழந்தைகளாக இருக்க வேண்டும்.
இல்லையென்றால் குழந்தைகளோடு
இருக்க வேண்டும்.
க.அருச்சுனன், செங்கல்பட்டு.
யோசிக்கிறாங்கப்பா!
உண்மையான அன்பு கிடைக்கும்போது,
அலட்சியமாகத்தான் தெரியும்.
தொலைக்கும்போதுதான்...
அதன் மதிப்பு தெரியும்.
ஜோ.ஜெயக்குமார், நாட்டரசன்கோட்டை.
கேட்டது
* (விருதுநகரில் ஒரு பள்ளியில் ஆசிரியரும் மாணவனும்)
"எப்படி சார் உங்களுக்கு இவ்வளவு
காயம் ஏற்பட்டுச்சு?''
"அதோ அங்கே ஒரு மரம் தெரியுதாப்பா?''
"ஆமாம் சார்... தெரியுது...''
"அந்த மரம் நேத்து எனக்குத் தெரியலைப்பா''
ஏ.எஸ்.இராஜேந்திரன், வெள்ளூர்.
* (திருச்சி தபால் நிலையம் ஒன்றில்)
"போஸ்ட்கார்டு இருக்கா?''
"இல்லை''
"ஐந்து ரூபாய் தபால் கவர் இருக்கா?''
"இல்லை''
"சரி...ஐந்து ரூபாய் ஸ்டாம்பாவது இருக்கா?''
"ஸ்டாக் இல்லைங்க''
"பூட்டு இருக்கா?''
"இருக்கு''
"சரி... பூட்டிட்டு கிளம்புங்க''
ஆர்எம்.வி.ராமசாமி, கோட்டையூர்.
எஸ்எம்எஸ்
பென்சில் கற்றுக் கொடுப்பது ஒன்றுதான்...
கூர்மையாக இரு...
இல்லாவிட்டால் சீவி விடுவார்கள்.
கே.முத்தூஸ், தொண்டி.
அப்படீங்களா!
APPLE WATCH SERIES 4 கைக்கடிகாரம் நேரத்தைக் காட்டுவதற்கு மட்டும் தயாரிக்கப்படவில்லை. அதைக் கட்டியிருப்பவரின் உடல் நலத்தைப் பற்றி எச்சரிக்கை செய்யும் கருவியாகவும் அது இருக்கிறது.
இதயம் ஒவ்வொருமுறை துடிக்கும்போதும் நமது உடலில் மின் தூண்டுதல்களை ஏற்படுத்துகிறது. அந்த மின்தூண்டுதல்களை நமது உடலின் இரத்த ஓட்டத்தின் வாயிலாக அறிந்து கொள்ள இசிஜி ஆப் என்ற செயலி இருக்கிறது.
இந்தச் செயலி இணைக்கப்பட்டுள்ள இந்த கைக்கடிகாரத்தைக் கட்டிக் கொண்டால், அது நமது இதயத்துடிப்பைத் துல்லியமாகப் பதிவு செய்கிறது. இதயத்துடிப்பு அதிகமாக இருக்கிறதா, குறைவாக இருக்கிறதா அல்லது ஒழுங்கற்று இருக்கிறதா என்பதைக் கண்டறிந்து உடனே எச்சரிக்கை செய்கிறது. இந்த எச்சரிக்கைத் தகவல் நமது செல்போனுக்கும் அனுப்பப்படுகிறது.
உதாரணமாக நடந்து சென்று கொண்டிருக்கும் ஒருவர் கீழே விழுந்துவிட்டார் என்று வைத்துக் கொள்ளுங்கள். உடனே இந்த கைக்கடிகாரம் செல்போன் மூலம் எச்சரிக்கை செய்கிறது. அந்த எச்சரிக்கையைக் கீழே விழுந்தவர் உடனே பார்க்காமல் அரை நிமிடம் தாண்டிவிட்டது என்றால், இந்தக் கைக்கடிகாரத்துடன் தொடர்புபடுத்தப்பட்டுள்ள செல்போன், ஆம்புலன்ஸுக்கும். கீழே விழுந்தவரின் நெருங்கிய உறவினர்களுக்கும் தகவல் கொடுத்துவிடுகிறது. எந்த இடத்தில் கீழே விழுந்து கிடக்கிறார்? என்பதையும் அவருடைய மருத்துவ அடையாள அட்டையையும் காண்பிக்கிறது. உயிர் காக்கும் கைக்கடிகாரம் என்று இதைச் சொல்லலாம்.
என்.ஜே., சென்னை-58.