"தடம்', "களரி', "பசங்க 2' உள்ளிட்ட படங்களில் நடித்தவர் வித்யா பிரதீப். சினிமா வாய்ப்புகள் தொடர்ந்து சரிவர அமையாததால், மெகா தொடர்களின் பக்கம் சாய்ந்தார். இப்போது சிறு இடைவெளிக்குப் பின் மீண்டும் சினிமாவுக்கு வந்துள்ளார். ஸ்ரீகாந்த் நடிப்பில் உருவாகும் "எக்கோ' படத்தில் நடிக்கிறார். இதில் திஷா பாண்டே இன்னொரு கதாநாயகியாக நடிக்கிறார். இந்தப் படத்தின் படப்பிடிப்பு சென்னை ஈஞ்சம்பாக்கத்தில் பூஜையுடன் தொடங்கியது. ஸ்ரீகாந்த் மற்றும் வித்யா பிரதீப் நடிக்கும் காட்சிகள் கடந்த இரு வார காலமாக படமாக்கப்பட்டு வருகின்றன. காளி வெங்கட், ஆஷிஷ் வித்யார்த்தி உள்ளிட்டோர் கதையின் பிரதான கதாபாத்திரங்களில் நடிக்கின்றனர்.
சைக்கலாஜிக்கல் த்ரில்லர் படமாக உருவாகும் இப்படத்தை டாக்டர்.ராஜசேகர், ஹாரூன் ஆகியோர் இணைந்து தயாரிக்கின்றனர். அறிமுக இயக்குநர் நவீன் கணேஷ் இயக்குகிறார். ஜான் பீட்டர் இசையமைக்கும் இப்படத்தின் பாடல்களை ஏக்நாத் எழுதுகிறார். "கில்லி', "தூள்', உள்ளிட்ட பல படங்களுக்கு ஒளிப்பதிவு செய்துள்ள கோபிநாத் இப்படத்திற்கு ஒளிப்பதிவு செய்கிறார்.
சுதர்ஷன் படத்தொகுப்பு செய்ய, மைக்கேல் ராஜ் கலையை நிர்மாணிக்கிறார். ராதிகா நடனம் அமைக்க, டேஞ்சர் மணி சண்டைக்காட்சிகளை வடிவமைக்கிறார்.