கறிவேப்பிலையைப் பால் விட்டு அரைத்து தலைமுடியின் வேர்கால்களில் நன்கு படும்படி தேய்த்து அரை மணி நேரம் வைத்திருந்து பின் சீயக்காய்த் தூள் கொண்டு தலைக்கு குளிக்க வேண்டும். இப்படி வாரம் ஒரு முறை செய்து வர முடி கருமையுடன் நன்கு வளரும்.
• பாதாம் ஆயில் 1 தேக்கரண்டி, ஆலிவ் ஆயில் 1 தேக்கரண்டி இரண்டையும் கலந்து தினமும் தலைக்கு தடவி வர முடி அடர்த்தியுடன் நீளமாக வளரும்.
• வாரம் 1 நாள் முட்டை வெள்ளைக் கருவை தலைக்கு தேய்த்து 10 நிமிடம் ஊறவிட்டு அலசி வர தலைமுடி சிக்குகள் அதிகம் பிடிக்காமல் மிருதுவாக இருக்கும்.
• அதிகம் உஷ்ணம் காரணமாக முடி உதிர்ந்தால், வெந்தயம் 1 தேக்கரண்டி ஊற வைத்து, அத்துடன் முட்டை வெண்கரு, தயிர் இம்மூன்றையும் ஒன்றாக கலந்து வாரம் 1 நாள் தலையில் தேய்த்து குளித்து வர, தலைமுடி செழித்து வளரும். இது இயற்கை ஹேர் கண்டிஷனராகும்.
• அதிகம் பேன், பொடுகு இருப்பவர்கள், சீதாப்பழ விதை, மருதாணி விதை, வெந்தயம் மூன்றையும் 2 தேக்கரண்டி எடுத்து பாலில் ஊற வைத்து அரைத்து தலையில் தேய்த்து சிறிது நேரம் ஊறவிட்டு, வெந்நீரில் சீயக்காய்த் தூள் கொண்டு தேய்த்து வாரம் ஒருமுறை குளித்து வர, பேன், பொடுகு தொல்லை நீங்கி முடி நன்கு வளரும். ஷாம்பு உபயோகிக்கக் கூடாது.
• பாசிப்பருப்பு பொடி, தயிர் கலந்து தலைக்குத் தேய்த்து 10 நிமிடம் ஊறிய பின் வெந்நீரில் குளித்து வர தலைமுடி பட்டுப்போல் மின்னும்.
• 1 கைப்பிடியளவு கறிவேப்பிலை, கால் தேக்கரண்டி கசகசா, 2 பாதாம் பருப்பு மூன்றையும் தேங்காய்ப்பால் விட்டு அரைத்து தலைக்குத் தேய்த்து வாரம் 1 முறை குளித்து வர தலைமுடி கருமையாக நன்கு வளரும்.
• வாரம் 1 நாள் வெண்ணெய்யைத் தலையில் தேய்த்து சிறிது நேரம் கழித்து சீயக்காய்த்தூள் கொண்டு அலசி வர, முடி நன்கு வளரும்.
- எஸ்.சரோஜா