சன் தொலைக்காட்சியில் புதியதாக ஆரம்பமாகியிருக்கும் தொடர் "அன்பே வா'. இத் தொடரின் நாயகி பூமிகாவாக அறிமுகமாகியிருப்பவர், டெல்னா டேவிஸ். கேரளாவைப் பூர்விகமாக கொண்ட தமிழ் குடும்பத்தைச் சேர்ந்தவர் இவர், பிறந்தது வளர்ந்தது எல்லாம் திருச்சூரில்தான். பி.ஏ. ஆங்கிலம் படித்திருக்கிறார். இவர் ஒரு கிளாசிக்கல் டான்ஸரும் கூட.
திரைத்துறைக்குள் வருவதற்கு முன்பு மாடலாக இருந்தவர். அதன் மூலம்தான் திரைத்துறையில் வாய்ப்பு கிடைத்துள்ளது.
"விடியும் வரை பேசு' என்ற படத்தின் மூலம் தமிழ்த் திரையுலகிற்கு அறிமுகமாகியுள்ளார். அதைத்தொடர்ந்து தமிழ் மற்றும் மலையாளத்தில் பல திரைப்படங்களில் நடித்துள்ளார். ஆனால், அந்தப் படங்கள் இவருக்கு சரியான வரவேற்பைப் பெற்றுத் தராததால், சின்னத்திரை பக்கம் வந்திருக்கிறார்.
"அன்பே வா' தொடர்தான் இவருக்கு முதல் சின்னத்திரை தொடர். இவர், எதிர்பார்க்கும் வரவேற்பை சின்னத்திரையாவது வழங்குமா என்பதை பொருத்திருந்துதான் பார்க்க வேண்டும்.
விஜய் டிவியில் ஒளிபரப்பாகி வரும் தொடர்களில் மிகவும் பிரபலமான தொடர் "பாண்டியன் ஸ்டோர்ஸ்'. அண்ணன் தம்பிகளுக்கு இடையான பாசம்தான் தொடரின் கதைக்களம். இதில் கதிர் - முல்லை ஜோடிக்கு என்று ஒரு ரசிகர் வட்டம் இருப்பதுபோல், ஜீவா - மீனா ஜோடிக்கும் ரசிகர்களிடையே நல்ல வரவேற்பு உண்டு.
இந்நிலையில் தொடரின் கதைப்படி மீனா கர்ப்பமாக இருந்தார். ஆனால், அதே சமயத்தில் நிஜத்திலும் மீனாவாக நடித்து வந்த ஹேமா கர்ப்பமாக இருந்தார். இதையடுத்து வீட்டில் எளிமையாகவும், தொடரில் தடபுடலாகவும் வளைகாப்பு நிகழ்ச்சி நடத்தப்பட்டது.
இந்நிலையில் ஹேமாவுக்கு சமீபத்தில் ஆண் குழந்தை பிறந்தது. இதனால், மீனா தொடரில் இருந்து சிலமாதமாக ஓய்வில் இருக்கிறார். இந்நிலையில் வேறு ஒருவரை மீனா கதாபாத்திரத்தில் நடிக்க வைக்க தயாரிப்புக் குழு ஏற்பாடு செய்தனர். ஆனால் மீனா கதாபாத்திரத்தில் வேறு யாரையும் நடிக்க வைக்கக் கூடாது என ரசிகர்கள் கோரிக்கை வைத்ததை ஏற்றுக் கொண்டனர். இந்நிலையில், ஹேமா தற்போது மீண்டும் "பாண்டியன் ஸ்டோர்ஸ்' தொடரின் படப்பிடிப்பில் பங்கேற்றுள்ள புகைப்படங்கள் சோஷியல் மீடியாவில் வைரலாகி வருகிறது. இதனால், விரைவில் ஹேமாவை பாண்டியன் ஸ்டோர்ஸில் எதிர்பார்க்கலாம் என தெரிகிறது.