நலம் தரும் நம் நாட்டு மூலிகைகள்!

நம் உடல் நல பாதிப்புகளுக்கு நிவாரணம் தரும் மூலிகைகள் நம் நாட்டில் ஏராளமாக உள்ளது.  அவற்றில் சில... 

 தொற்று நோய்கள் பரவி வரும்  இந்த காலசூழலில் ஒரு லிட்டர் நீரில் இருபது துளசி இலைகளைப் போட்டு கொதிக்க வைத்து காய்ச்சி வடிகட்டி குடித்து வர தொற்று ஏற்படுவதைத் தடுக்கலாம்.

மகத்தான சக்திக்கு வெள்ளை கரிசலாங்கண்ணி, மஞ்சள்காமாலைக்கு மஞ்சள் கரிசலாங்கண்ணி மிகச்சிறந்த மருந்து.

தூதுவளை, மஞ்சள் கரிசலாங்கண்ணி, துளசி, நித்தியகல்யாணி ஆகியவை புற்றுநோயிலிருந்து காக்க சிறப்பாக செயலாற்றும் தன்மை கொண்டவை.

கணையப் புற்று, குடல் புற்று வராமல் தடுக்கும் தன்மை பிரண்டை  துவையலுக்கு உண்டு.

உணவில் வாரம் ஒருமுறை வாழைத்தண்டு சாப்பிட்டு வர கணையத்தில் கற்கள் ஏற்படாது. குடல்வால் அழற்சி நோயும் வராமல் தடுக்கப்படும்.

கொள்ளு உடல் நலம் காக்கும் அற்புத தானியம். கொள்ளுத் துவையல், கொள்ளு சுண்டல் பொடி,  கொள்ளு ரசம் ஆகியவைகளை உணவில் அடிக்கடி சேர்த்து வந்தால் மூச்சிரைப்பு, வாய்வு வலி, தோல் நோய்கள், நரம்புத் தளர்ச்சி ஆகியவற்றை குணப்படுத்தும்.

முட்டைகோஸ் சூப், பப்பாளிக்காய் கூட்டு, கீரைத்தண்டு பொரியல், கொள்ளு சுண்டல் ஆகியவைகளை அடிக்கடி உணவில் சேர்த்தால் உடலில் சேரும் கொழுப்பைக் கரைக்கலாம்.

கண் கோளாறுகளுக்கு சிறுகீரை, பொன்னாங்கண்ணி, கரிசலாங்கண்ணி போன்ற  கீரைகளைஅடிக்கடி உணவில் சேர்த்து வந்தால் கண்பார்வைக் குறைபாடுகள் வராமல் காக்கும்.

நரம்புத்தளர்ச்சி உள்ளவர்கள் முருங்கைக் கீரை, முருங்கைக்காய், எள்ளு, மிளகுப் பொடியையும் அடிக்கடி உணவில் பயன்படுத்தினால் நலம் தரும். 

சர்க்கரை நோயோடு காசநோயும் உள்ளவர்கள் முசுமுசுக்கை, தூதுவளை துவையல், வேப்பம் பூ துவையல் சாப்பிட்டு வந்தால் குணம் தெரியும்.

புண்களால் அவதிபடுவோர் பாகற்காய், சுண்டைக்காய், கோவைக்காய் சேர்க்கலாம் .நெல்லிக்காய், வல்லாரைத் துவையல் பயன்படுத்தலாம் .துளசி போட்டு ஊறிய நீரை அருந்தலாம்.

சிறுகீரை, சிறுகுறிஞ்சான், நெருஞ்சில் போன்றவைகள் சிறுநீரக நோயை குணப்படுத்த உகந்தவை.

நினைவுக்கு வல்லாரை, நீரிழிவுக்கு ஆவாரை என்பார்கள். நீர்கடுப்பு , நீர்த்தாரைப் புண், வெள்ளைப்போக்கு, குடல் புண்கள் தோல் நோய்கள் உள்ள நீரிழிவு நோயாளிகளுக்கு ஆவாரம் பூ  அற்புத பலன் தரும். இதன் இருபது இதழ்களை கழுவி சுத்தம் செய்து காலை மாலை வெறும் வயிற்றில் மென்று சாப்பிட்டு வர பலன் கிடைக்கும்.