சுடச்சுட

    
    11

    9. முடிவு
     
     எங்கள் பயணத்தை பிரிட்ஜ் வழிநடத்தினான். நானும் மற்ற பிள்ளைகளும் அவனைப் பின்தொடர்ந்தோம். பாறைகள் நிறைந்த பகுதியாக இருந்ததால் பயணம் சிரமமாக இருந்தது. இறுதியில் நாங்கள் முத்துக்கள் நிறைந்த குடாப் பகுதியை அடைந்தோம். பிரிட்ஜ் குறிப்பிட்டதுபோல் அந்த இடத்து நீர் மிகவும் தெளிவாக இருந்தது. கருவிகளைப் பயன்படுத்தி முத்துச்சிப்பிகளை கரையில் கோரிப் போட்டோம். ஏராளமாகச் சேர்ந்துவிட்டது.
     நாங்கள் வீட்டிற்குத் திரும்பத் தொடங்கினோம். முத்துக் குடாப் பகுதியிலிருந்து கிளம்பி ஒன்றரை மணி நேரப் பயணத்தில் குகை வழியை அடைந்தோம். அதைக் கடக்கும்போது பிரிட்ஜ்ஜின் படகு எங்களை நெருங்கியது. அவன் என்னிடம் ஒரு கடிதத்தைக் கொடுத்துவிட்டு தனது படகை எதிர்த்திசையில் செலுத்திக்கொண்டு போனான்.
     "மாலுமியைத் தேடிச் செல்கிறேன். இனியும் தாமதிப்பதற்கில்லை' என்று கடிதத்தில் எழுதியிருந்தான். நான் மறுப்புத் தெரிவிப்பதற்குள் அவனது படகு சிறிது தூரம் சென்று விட்டது. தனியாகச் செல்வது பாதுகாப்பானதில்லை. அவனைத் தடுக்க முடியவில்லை. மனதிற்குள் வாழ்த்தினேன்.
     ஐந்து நாட்களாகியும் பிரிட்ஜ் திரும்பவில்லை. அவனுடைய அம்மா மிகவும் கலக்கமடைந்தாள். அதனால் நாங்கள் பிரிட்ஜ்ஜை தேடிக் கிளம்பினோம். நாங்கள் அதிக தூரம் செல்வதற்கு முன்பே எர்னஸ்ட் "பிரிட்ஜ்' என்று கத்தினான். தொலைவில் அலைகளில் ஆடி வரும் படகைக் காட்டினான். படகு நெருங்க நெருங்க அதிலிருக்கும் பிரிட்ஜ் தெரிந்தான்.
     பிரிட்ஜ் எங்களோடு இணைந்தான். அண்ணனைப் பார்த்த தம்பிகள் ஆனந்தக் கூத்தாடினார்கள். நான் அவனை தனியே அழைத்துச் சென்று "போன காரியம் வெற்றியா?' என்று கேட்டேன்.
     "ஆமாம்' என்றவன், "கடிதம் எழுதியிருந்தவள் ஒரு பெண். நம்மைப் பற்றி அவளிடம் கூறினேன். நம்மையெல்லாம் பார்க்க அவள் வெட்கப்பட்டாள். பக்கத்து தீவில் தங்க வைத்தேன். அவளை அழைத்து வருகிறேன்' என்று கிளம்பினான்.
     மீண்டும் அவன் படகில் கிளம்பினான். நாங்களும் அவனைப் பின் தொடர்ந்தோம். தீவில் இறங்கியதும் பிரிட்ஜ் குரல் கொடுத்தான். மறைந்திருந்த அந்தப் பெண் எமிலி வெளியே வந்தாள். பெண் என்று தெரிந்து கொள்ளாதபடிக்கு எமிலி ஆண் உடையில் இருந்தாள். பத்து வருடங்களுக்குப் பிறகு மனித இனத்தைச் சேர்ந்த ஒருவரைப் பார்க்கிறோம் என்ற எண்ணம் எங்களை மகிழ்ச்சியில் ஆழ்த்தியது.
     எலிசபெத் அவளை மிகுந்த அன்புடன் வரவேற்றாள். எலிசபெத்தின் விரிந்த கரங்களுக்குள் எமிலி ஓடிச் சென்று அடைக்கலமானாள். எமிலியின் கண்கள் கண்ணீரால் நிரம்பியிருந்தது.
     நாங்கள் மகிழ்ச்சிக் கடலில் மிதந்தோம். சுவையான உணவு எமிலிக்காக ஏற்பாடாகி இருந்தது. என்னுடைய ஆண் பிள்ளைகளுக்கு ஓர் இளம் பெண்ணோடு எப்படி பழகுவது என்பதுகூட தெரியவில்லை. பத்து வருடங்கள் மனித வாடையில்லாத காட்டில் வளர்ந்தவர்களல்லவா!
     மறுநாள் பிள்ளைகள் எமிலியின் கதையைக் கேட்க விரும்பினார்கள். "எமிலி இங்கிலாந்தைச் சேர்ந்தவள். சிறுவயதிலேயே தாயை இழந்து விட்டாள். தன் தந்தை வில்லியம் மாண்ட்ரோஸ்ஸுடன் இந்தியாவில் வசித்தாள். எமிலி தன் தந்தையிடமிருந்து வேட்டையாடுவது முதல் துப்பாக்கி சுடுதல் வரை கற்றுக் கொண்டிருந்தாள். என்றாலும் பெண்களுக்கே உரித்தான வெட்கம், பயம் போன்ற குணங்கள் அவளிடம் இருந்தன.
     போர்ப்படையில் கர்னலாக இருந்த எமிலியின் தந்தை வில்லியம் தம் படையினருடன் இங்கிலாந்து திரும்ப நேர்ந்தது. ஆனால், போர்க்கப்பலில் எமிலி செல்லக்கூடாது என்பதால் அவள் தனியாக வேறொரு கப்பலில் இங்கிலாந்துக்குப் புறப்பட்டாள். அப்போது அவளுக்கு வயது பதினேழு. சில நாள்கள் பயணத்திற்குப் பிறகு எமிலி பயணம் செய்த கப்பல் புயலில் சிக்கியது. பாறைகளில் மோதிய கப்பல் உடைந்து சிதறியது. எப்படியோ ஒரு படகில் தொற்றிக் கொண்டாள் எமிலி. சிறிது தொலைவு செல்வதற்குள் படகும் மூழ்கி விட்டது. அலைகளால் அடித்துச் செல்லப்பட்ட எமிலி ஏதோ ஒரு தீவின் கரையில் ஒதுக்கப்பட்டாள்.
     மயக்கத்தில் கிடந்த எமிலி கண் விழிக்க மூன்று நாட்களானது. அவளுடன் சேர்ந்து ஒரு மாலுமியின் பெட்டியும் கரை ஒதுங்கியிருந்தது. எமிலி செய்வதறியாது திகைத்தாள். பாறைகளின் கிடுக்குகளில் கிடந்த பறவைகளின் முட்டைகளை உணவாகச் சாப்பிட்டாள். பிறகு மீன்களையும் பறவைகளையும் வேட்டையாடி சாப்பிட்டாள். இப்படியே அந்தத் தீவில் மூன்று ஆண்டுகள் வாழ்ந்தாள். கடல் பறவைகளின் கால்களில் அடிக்கடி கடிதங்களைக் கட்டி அனுப்பிக் கொண்டிருந்தாள். ஒன்றுகூட பதிலுடன் திரும்பி வரவில்லை. பிரிட்ஜ் எழுதிய பதில் கடிதமும் அவளுக்குக் கிடைக்கவில்லை. கடைசியாக பிரிட்ஜ் அவளைப் பார்த்தான்' என்று கூறினாள்.
     எமிலிக்கு குகை வீடும் மற்ற வீடுகளும் மிகவும் பிடித்துவிட்டது. தோட்டமும் விலங்கு பண்ணையும் அவளைக் கவர்ந்தது.
     எமிலி மிகவும் சிறந்தவள் என்பதை நிரூபித்தாள். அவள் எங்களோடு சேர்ந்து கடுமையாக உழைத்தாள். அவள் எங்களுக்கு ஐந்தாவது குழந்தையாகிவிட்டாள். என் பிள்ளைகளுக்கு இனிய சகோதரி ஆகிவிட்டாள்.
     
     பிரிட்ஜ்ஜும் ஜாக்கும் சுறாத் தீவில் நாங்கள் அமைத்துள்ள பாதுகாப்புக் கோட்டையை பார்வையிடச் சென்றனர். பீரங்கிகளை வெடித்துப் பார்க்கும்படி நான் கூறியிருந்தேன்.
     அவர்கள் இரண்டு தடவை பீரங்கிக் குண்டுகளை வெடிக்கச் செய்தனர். மூன்று நிமிட இடைவெளிக்குப் பிறகு மேற்குத் திசையிலிருந்து பதிலுக்கு மூன்று குண்டுகள் வெடிக்கும் ஓசை கேட்டது.
     அதைக் கேட்டு பரபரப்படைந்த பிரிட்ஜ்ஜும் ஜாக்கும் என்னிடம் ஓடி வந்து விஷயத்தைக் கூறினர். நேரம் இருட்டாகிவிட்டதால் குண்டுகள் வெடிப்பு பற்றி அன்று எதுவும் அறிந்துகொள்ள முடியவில்லை.
     மறுநாள், மீண்டும் வந்து மூன்று முறை பீரங்கியால் சுட்டோம். பதிலுக்கு ஏழுமுறை குண்டுகள் முழங்கியதும் நான் மகிழ்ச்சியில் துள்ளிக் குதித்தேன்.
     "கப்பல் வந்திருக்கிறதா?' பிள்ளைகள் ஆவலுடன் கேட்டார்கள். "தன்னைக் காப்பாற்றி அழைத்துச் செல்வதற்காக தன் தந்தை வந்திருக்கலாம்' என்று எமிலி கூறினாள்.
     "வந்திருப்பது பயணிகள் கப்பலா? அல்லது கடற் கொள்ளையர்களின் கப்பலா? நம்மைக் காப்பாற்றவா? அல்லது தாக்கவா? என்பது தெரியாத நிலையில் நாம் அதிகம் மகிழ்ச்சி அடைய வேண்டாம்' என்று கூறினேன்.
     பாதுகாப்பு கருதி பெண்களையும் பிள்ளைகளையும் கருடன் கூட்டிற்கு அனுப்பி வைத்தேன். பிரிட்ஜ்ஜும் நானும் படகிலேறி புறப்பட்டோம். ஒன்றரை மணி நேரப் பயணத்திற்குப் பிறகு மலைப்பகுதியின் மறுபுறத்திலுள்ள கடலில் ஒரு கப்பல் நின்றிருந்தது. கப்பலில் இங்கிலாந்து நாட்டின் கொடி பறந்தது. பிரிட்ஜ் கப்பலைப் பார்த்து மிகவும் மகிழ்ச்சியடைந்தான். கப்பலை நெருங்கினோம். கப்பலின் மேற்புறத்தில் காவலுக்காக நின்றிருந்தவர் எங்களது உடையையும் தோற்றத்தையும் பார்த்து காட்டுமிராண்டிகள் என்று முடிவு செய்து பதிலளிக்கவில்லை.
     நாங்கள் ஏமாற்றத்துடன் கரை திரும்பினோம். நல்ல உடைகள் உடுத்தாமல் பெரிய படகை எடுத்துச் செல்லாமல் போனது தவறு என்று எலிசபெத் சுட்டிக்காட்டினாள்.
     மறுநாள், நாங்கள் பெரிய படகை தயார் செய்து புறப்பட்டோம். படகில் இங்கிலாந்து நாட்டு கொடியைப் பறக்க விட்டோம். பிரிட்ஜ் மாலுமி மாதிரி மிடுக்காக உடையணிந்து வந்தான்.
     அந்தக் கப்பலின் கேப்டன் எங்களை அன்புடன் வரவேற்றார். என் பெயர் ராபின்சன் என்று அறிமுகப்படுத்திக் கொண்டேன். மாலுமிகளுக்குரிய மரியாதை தந்தார். நான் எங்களுடைய கதையையும் எமிலியின் கதையையும் கூறினேன். ஆஸ்திரேலியா நாட்டில் கரையேறிய மாலுமிகள் கொடுத்த தகவலின்படியே கப்பல் உடைந்த இந்த இடத்தைத் தேடி வந்ததாகக் கூறினார். நல்ல குடிதண்ணீர் பிடிப்பதற்காகவும் கப்பல் நின்று கொண்டிருக்கிறது என்றும் கேப்டன் கூறினார்.
     எங்கள் பயணிகளில் ஒருவரான புகழ்பெற்ற பொறியியல் வல்லுநர் மிஸ்டர் உல்ஸ்ட்டன் சுகமில்லாமல் இருக்கிறார். அவரால் தொடர்ந்து பயணம் செய்ய முடியவில்லை என்று கேப்டன் சொன்னார்.
     கேப்டனையும் மிஸ்டர் உல்ஸ்ட்டன் குடும்பத்தினரையும் எங்கள் குகை வீட்டிற்கு அழைத்து வந்து விருந்து வைத்தேன். அந்தத் தீவின் அழகும் அமைதியும் உல்ஸ்ட்டன் தம்பதியினரைக் கவர்ந்துவிட்டது. அவர்கள் அந்தத் தீவிலேயே தங்க விரும்பினர். நாங்கள் அதற்கு இசைவும் மகிழ்ச்சியும் தெரிவித்தோம். உல்ஸ்ட்டன் தம்பதியினரின் மூத்த பெண் தன் அண்ணன் வீட்டிற்குச் செல்ல விரும்பினாள். இளைய பெண் தீவிலே பெற்றோருடன் தங்க விரும்பினாள்.
     என் மனதில் மகிழ்ச்சியும் துக்கமும் ஒரு சேர கலந்திருந்தது. வெளி உலகத்தின் தூதுவனாகக் கடந்த பத்து வருடங்களில் இப்போதுதான் இக் கப்பல் காட்சியளிக்கிறது. அதுவும் சில நாட்களில் சென்றுவிடப் போகிறது.
     எலிசபெத் ஐரோப்பாவிற்குத் திரும்பிச் செல்ல விரும்பவில்லை. இனி ஒன்றும் புதிய வாழ்க்கை என்று ஆரம்பிக்க எனக்கு ஒன்றுமில்லை. ஆனால் எனது பிள்ளைகளின் எதிர்காலம்? அதை அவர்களே முடிவு செய்ய விரும்பினேன்.
     எனது பிள்ளைகளில் பிரிட்ஜ்ஜும் பிரான்சிஸ்ஸும் கப்பலில் ஐரோப்பா செல்ல விரும்பினர். ஜாக்கிற்கு வேட்டை வாழ்க்கைதான் பிடித்திருக்கிறது. எர்னஸ்ட் எப்போதும் படிப்பில் மூழ்கியிருக்க விரும்பினான்.
     ஒரு வாரத்திற்குப் பிறகு நாங்கள் அனைவரும் கடற்கரைக்குச் சென்றோம். பிரிட்ஜ், பிரான்சிஸ், எமிலி ஆகியோரை கடைசி முறையாகத் தழுவி விடை கொடுத்து அனுப்பினோம்.
     இதுவரை எழுதி வந்த குறிப்புகளைத் தொகுத்து புத்தகமாக வெளியிடுவதற்காக பிரிட்ஜ்ஜிடம் கொடுத்தேன்.
     கப்பலின் நங்கூரம் எடுக்கப்பட்டு விட்டது. காற்றும் கடல் அலைகளும் எங்களைப் பிரிக்க இருக்கிறது. எலிசபெத்தின் வேதனையைச் சொல்ல வார்த்தைகள் இல்லை. என் பிள்ளைகளே போய் வாருங்கள். மறுமுறை உங்களை என்னால் பார்க்க முடியுமோ தெரியவில்லை! மகிழ்ச்சியுடன் போய் வாருங்கள்! நான் அவர்களுக்கு விடை கொடுத்தேன்.
     (முற்றும்)
     ஆங்கிலம் : ஜோகன் வைஸ்
     தமிழில்: சுகுமாரன்
     
     

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai