Enable Javscript for better performance
அரங்கம்: க்ரோவா, காகத்ரி மற்றும் கண்ணாடிக்காரர்- Dinamani

சுடச்சுட

    அரங்கம்: க்ரோவா, காகத்ரி மற்றும் கண்ணாடிக்காரர்

    By - க. சங்கர்  |   Published on : 24th July 2021 08:51 PM  |   அ+அ அ-   |    |  

    sm11

     

    காட்சி : 1
    இடம் : கண்ணாடிக்காரர் வீடு / மொட்டை மாடி
    நேரம் : காலை / வெவ்வேறு மாதங்கள்
    உறுப்பினர்  : கண்ணாடி மனிதர், க்ரோவா, காகத்ரி
    முதல் மாதம் : 

    கண்ணாடிக்காரர் தட்டில் சாப்பாடு வைக்கிறார். 
    "கா கா கா' எனச் சத்தம் கொடுக்கிறார்.
    மூன்றாம் மாதம் :
    கண்ணாடிக்காரர் தட்டில் சாப்பாடு வைக்கிறார். க்ரோவா வந்து சாப்பிடுகிறது.
    ஏழாவது மாதம் :
    க்ரோவாவும் காகத்ரியும் காத்திருக்கின்றன. கண்ணாடிக்காரர் சாப்பாடு கொண்டுவருகிறார். 

     

    காட்சி : 2
    இடம் : கண்ணாடிக்காரர் வீடு / மொட்டை மாடி
    நேரம் : காலை 8.20
    உறுப்பினர்கள் : க்ரோவா, காகத்ரி

    (க்ரோவா தட்டில் இருக்கும் உணவைப் பார்த்துக்கொண்டிருக்கிறது.)

    காகத்ரி : (அங்கே வந்து) என்ன க்ரோ.. பயங்கரமா யோசிக்கிற போலிருக்கு. ?
    க்ரோவா  : அந்தக் கண்ணாடிக்காரர் ஒரு முழு இட்லிய அப்படியே படச்சிருக்காரு, பாரு ..
    காகத்ரி : அதனால என்ன.. வழக்கம்போல கொத்தி சாப்பிடலாம்..
    க்ரோவா : அவங்க மட்டும்  நல்லா பிசஞ்சு சாப்டுவாங்க.. நாம இட்லி தனியா சாம்பார் தனியா சாப்டணும்? ஆறாவது அறிவு இதயெல்லாம்  சொல்லிக் கொடுக்காதா ?
    காகத்ரி : ஏய், நீ ரொம்ப பேசற.. நாம சாப்ட்டதுக்கு அப்றம்தான அவங்க சாப்பட்றாங்க.. அது அவங்க நமக்குக் கொடுக்கற மரியாதை இல்லையா ?
    க்ரோவா  : ம்ம்ம்.. மரியாதைய வெச்சு இந்த இட்லிய பிசஞ்சு சாப்ட முடியுமா ?
    (காகத்ரியின் முகத்தில் புன்னகை தோன்றுகிறது.)


    காட்சி : 3
    இடம் : வேப்பமரம் 
    நேரம் : முற்பகல் 11.15
    உறுப்பினர்கள் : க்ரோவா, காகத்ரி

    (க்ரோவாவின் அருகில் வந்து அமர்கிறது காகத்ரி.) 

    க்ரோவா  : முடிஞ்சுதா..?
    காகத்ரி : (அலட்சியமாக) முடிஞ்சுது ! இன்னிக்கு எங்க பகுதில ஒழுங்கான சாப்பாடே இல்ல.. தண்ணிக்கும் கஷ்டமாப் போச்சு.. யாரும் மாத்தி வெக்கவேல்ல.. நேத்தைய தண்ணி !
    க்ரோவா  : ஆறாவது அறிவுக்குத் தெரியுதா நாம ஒருநாள் குடிச்சத அடுத்த நாள் குடிக்கமாட்டோம்னு ? செங்கல் டப்பா வந்ததுக்கப்றம் பாதி பேர் சரியில்ல.. இதையெல்லாம் கண்டுக்க மாட்டேங்கறாங்க..
    காகத்ரி : (புரியாமல்) செங்கல் டப்பாவா ?
    க்ரோவா  : அதான்.. கையில எதையோ வெச்சுட்டுப் பாத்துட்டே இருக்காங்களே..
    காகத்ரி : ஸ்ஸ்ஸ்.. அதுக்குப் பேர் ஸ்மார்ட்போன்.. அதுக்குள்ள பெரிய உலகமே இருக்கு..
    க்ரோவா : ம்ம்ம்.. உலகம் வெளிய இருக்கு.. அதுக்குள்ள பாத்துட்டிருக்காங்க.. பாவம், இதுகூடத் தெரியல !
    காகத்ரி : போதும்.. எனக்கு இப்போ தண்ணி 
    வேணும் !

    காட்சி : 4
    இடம் : கண்ணாடிக்காரர் வீடு / மொட்டை மாடி
    நேரம் : முற்பகல் 11.25
    உறுப்பினர்கள் : கண்ணாடிக்காரர், க்ரோவா

    (கண்ணாடிக்காரர் கோதுமையைக் காயப்போட்டுக்கொண்டிருக்
    கிறார்.)

    க்ரோவா  : (ஆச்சர்யமாக) இவர் என்ன, இந்த நேரத்துல இங்க இருக்காரு !
    காகத்ரி : சிக்னல் கெடச்சிருக்காது, மேல வந்துட்டார்.. சரி, அவர் கெடக்கறார்.. தண்ணி எங்க ?
    க்ரோவா  : இதோ..  தண்ணி டேங்க்கு பக்கத்துல.. 
    பக்கெட்ல பார்.. 
    காகத்ரி பறந்து செல்கிறது.
    க்ரோவா  : (கோதுமையைப் பார்த்து) ஓஹோ.. இதான் சப்பாத்தி பண்றதா ? காகத்ரி.. இங்க வா.. ரெண்டு மூனு மணி தின்னு பார்ப்போம், எப்டி இருக்குனு..
    (காகத்ரி தண்ணீர் குடிப்பதில் மும்முரமாய் 
    இருக்கிறது)

    க்ரோவா  : (மெதுவாக) ம்ம்ம்.. உனக்குக் கொடுத்துவெக்கல.. நானாவது ருசி பாக்கறேன்..
    (க்ரோவா  கோதுமைமணிகளில் ஒன்றிரண்டைக் கொத்துகிறது.)
    கண்ணாடிக்காரர் :  (அதிர்ந்து) ஆ.. மொத்த கோதுமையையும் காக்கா திங்குதே.. ச்சூ.. ச்சூ.. ஏய்..
    (கண்ணாடிக்காரர் கையில் கிடைத்த சோப்புத்
    துண்டால் க்ரோவாவை அடிக்கிறார்.)

    காகத்ரி : (அடிபட்டு தூக்கி எறியப்படும் க்ரோவாவைப் பார்த்து) ஐயோ !
     
    காட்சி : 5
    இடம் : வேப்பமரம் 
    நேரம் : மாலை 6.50
    காகங்கள் : க்ரோவா, காகத்ரி

    (க்ரோவா  மெதுவாகக் கண்களைத் திறக்கிறது.)

    காகத்ரி : (மகிழ்ச்சியாக) யம்மா.. 
    இப்பாவது கண்ணைத் திறந்தயே! சோப்புத் துண்டுக்கே இந்த மயக்கமா ?
    க்ரோவா  : (பலவீனமாக) என்ன.. என்னாச்சு ?
    காகத்ரி : ஒன்னும் ஆகல.. இரு, இரை கொண்டு வரேன்.. 
    (க்ரோவா கோதுமணிகளைக் கொண்டுவந்து வைக்கிறது.)

    க்ரோவா : (வியப்பாக) இது.. இப்பத்தான் ஞாபகம் வருது..  அந்த ஆள் என்னை எதிலயோ அடிச்சார்.. ஆமா, இது உனக்கு எப்டிக் கிடச்சுது ?
    (காகத்ரி அமைதியாகப் பார்க்கிறது)

    காட்சி : 6
    இடம் : கண்ணாடிக்காரர் வீடு / மொட்டை மாடி
    நேரம் : காலை 7.20
    உறுப்பினர்கள் : க்ரோவா, காகத்ரி

    (க்ரோவா பதற்றத்துடன் அமர்ந்திருக்கிறது.)

    காகத்ரி : (அங்கே வந்து) என்ன நேரத்துலயே வந்துட்டே ? எட்டு மணிக்கு மேலதான வருவாரு..
    (க்ரோவா அமைதியாக இருக்கிறது.)

    காகத்ரி : (உரக்க) க்ரோ.. உங்ககிட்டத்தான்.. என்னாச்சு உனக்கு ?
    க்ரோவா : (கோபமாக) நேத்து அந்த ஆள் என்னை அடிச்சார்ல.. பதிலுக்கு நான் அவர உச்சந்தலையில கொத்தப்போறேன்!
    (காகத்ரி அதிர்ச்சியடைகிறது.)

    க்ரோவா  : காலங்காத்தால காக்கா கொத்துனா, என்ன அர்த்தம் ? நேரம் சரியில்லனு.. என்னைத் தாக்கினதுக்கு வருஷம் முழுக்க அவரு அனுபவிக்கட்டும்..  
    காகத்ரி : (பயத்தில்) க்ரோ.. க்ரோ.. சொன்னாக்கேளு.. அப்டியெல்லாம் செய்யாத.. மனிதர்கள் நம்மள முன்னோர்களா நினைக்கிறாங்க.. ரொம்ப மாசமா இவர் சாப்பாட நாம சாப்டிருக்கோம்..
    க்ரோவா  : (கோபத்துடன்) அடிவாங்கினது நான்..  உனக்கென்ன..  நான் பழிவாங்கியே ஆகணும்.. 
    காகத்ரி : உனக்கு இப்போ பழி வாங்கணும்.. அவ்ளோதானே.. நான் சொல்றதக் கேளு..
    (க்ரோவா கவனிக்கிறது.)

    காட்சி : 7
    இடம் : கண்ணாடிக்காரர் வீடு / மொட்டை மாடி
    நேரம் : காலை 8.05
    உறுப்பினர்கள் : கண்ணாடிக்காரர், க்ரோவா, காகத்ரி.

    (க்ரோவாவும் காகத்ரியும் தண்ணீர்த் தேக்கியின் பின்னால் அமர்ந்திருக்கின்றன.)

    க்ரோவா : (சந்தேகமாக) இது சரியா வருமா ? இப்பகூடக் கெட்டுப்போகல.. அவர் வந்ததும் ஒரு கொத்து கொத்திரட்டுமா..?
    காகத்ரி : உஷ்ஷ்.. நல்லா ஒளிஞ்சுக்கோ.. வர்றார்..
    (கண்ணாடிக்காரர் தட்டில் சாப்பாடு வைக்கிறார்.) 

    கண்ணாடிக்காரர் : (சத்தமாக) கா.. கா.. கா.. 
    (காகத்ரி சிரிப்பை அடக்கிக்கொண்டு க்ரோவாவைப் பார்க்கிறது.)
    க்ரோவா : (மெதுவாக) கத்து ஆறறிவு..  கத்து.. தெனம் அரை மணி நேரம் கத்து.. அப்றம் வர்றோம்.. பாவி, என்னையவா அடிக்கற ?
    காகத்ரி : போதுமா.. நாம சாப்படாம அவர் சாப்டமாட்டார்.. உனக்கு எப்போ அவர மன்னிக்கணும்னு தோணுதோ.. அதுவரைக்கும் இப்டியே பண்ணு.. ஆனா, கொத்தமட்டும் கூடாது..
    க்ரோவா : உன் யோசனை சரிதான்.. தப்பு செஞ்சவங்களுக்கு நாம கொடுக்கற பெரிய தண்டனை அத உணரவெக்கறதுதான்.. ரெண்டு மூனு நாள்ல இந்த ஆறறிவுக்கு எல்லாம் புரிஞ்சிரும்..
    காகத்ரி : அதே ! அதே !
    கண்ணாடிக்காரர் : (இன்னும் சத்தமாக) கா.. கா.. கா.. 
    (க்ரோவாவும் காகத்ரியும் மறைந்திருந்தபடியே சிரிக்கிறார்கள்.)

    (திரை)


    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp