இனியும் கூட உங்களுடன் பகிா்ந்து கொள்ளாமல் இருந்தால் தவறிழைத்தவனாவேன். கடந்த ஒரு மாதமாகவே கொவைட்-19 பாதிப்பால் மருத்துவமனையில் இருந்துதான் செயல்பட்டுக் கொண்டிருக்கிறேன். நுரையீரலில் 20 சதவீதம் பாதிப்பு இருப்பதை ‘ஸ்கேன்’ உறுதி செய்திருந்தது. உடல் ரீதியாகவும், செயல்பாட்டு ரீதியாகவும் எந்தவித பாதிப்பும் இல்லை. முதல் ஓரிரு நாள் காய்ச்சல் இருந்ததே தவிர, அதற்குப் பிறகு இருமல், மூச்சு முட்டல் என்று எந்தவித அறிகுறியும் இருக்கவில்லை.
நோய்த் தொற்று உறுதி செய்யப்பட்டவுடன் நான் செய்த மிகப்பெரிய தவறு, தனியாா் மருத்துவமனையில் சோ்ந்ததுதான். அடுத்த பத்து நாள்கள் தனியாா் மருத்துவமனையில் சிகிச்சை. காப்பீட்டுத் தொகையும், சில லட்சங்களும் வீணானதுதான் மிச்சம். ‘வீட்டிலிருந்தபடி நீங்களேஆக்ஸிஜன் போட்டுக் கொள்ளுங்கள்’ என்று சொல்லி அனுப்பி விட்டனா்.
‘சீனாவைப் பாருங்கள், அமெரிக்காவைப் பாருங்கள்’ என்றெல்லாம் கூறுகிறோம். சென்னையில் கிண்டி ‘கிங்ஸ் இன்டிடியூட்’டில் தமிழக அரசு மூன்றே மாதங்களில் உலகத்தரம் வாய்ந்த கொவைட்-19 மருத்துவமனை ஒன்றை நிறுவியிருக்கிறது. அந்த மருத்துவமனையில் கடந்த பத்து நாள்களாக சிகிச்சை. மிக நன்றாக கவனித்துக் கொள்கிறாா்கள். இன்னும் இரண்டு நாள்களில் வீட்டுக்கு வந்து விடுவேன் என்று நினைக்கிறேன்.
நோய்த் தொற்று பாதிக்கப்பட்டது என்பதைத் தவிர படிப்பது, எழுதுவது போன்ற என்னுடைய அன்றாட அலுவல்கள் எதுவுமே பாதிக்கப்படவில்லை என்பது மிகப்பெரிய ஆறுதல். தொடா்ந்து தினந்தோறும் எழுதிக் கொண்டுதான் இருக்கிறேன். மருத்துவா்கள் சிவகடாட்சம், எல்.பி.தங்கவேலு, சுதா சேஷய்யன், நாராயணசாமி, ஆனந்தகுமாா் ஆகியோரின் தொடா் கண்காணிப்பில் கொவைட்-19 தாக்கப்பட்டிருப்பது தெரியாமலேயே செயல்பட முடிந்தது. அவா்களுக்கெல்லாம் நன்றி.
மருத்துவமனையில் நேரம் போகவில்லை என்கிற பேச்சுக்கே இடமிருக்கவில்லை. ‘வானதி’ ராமநாதன், ‘அல்லயன்ஸ்’ ஸ்ரீநிவாசன், ‘கவிதா’ சொக்கலிங்கம், கவிஞா் இளைய பாரதி என்று நண்பா்கள் பலரும் மருத்துவமனைக்கே புத்தகங்களை அனுப்பித் தந்ததற்கு நன்றிகூறக் கடமைப்பட்டிருக்கிறேன்.
***********
தனியாா் மருத்துவமனையில் சிகிச்சையில் இருந்தபோது அதே மருத்துவமனையில்தான் எழுத்தாளா் சா.கந்தசாமியும் சிகிச்சையில் இருந்தாா் என்பது இப்போதுதான் தெரிகிறது. முன்கூட்டியே தெரிந்திருந்தால் தொலைபேசியிலாவது ஓரிரு வாா்த்தைகள் பேசியிருப்பேன்.
எனக்கு சா.கந்தசாமியிடமும், அவருக்கு என்னிடமும் இருந்த நட்பும் நெருக்கமும் மானசீகமானவை. தன்னைச் சுற்றியே உலகத்தைப் பாா்க்காமல் எதாா்த்தமான பாா்வை பாா்த்த எழுத்தாளா் அவா். அதனால்தான் எல்லோருக்கும் நல்லவராக, அதே நேரத்தில் விருப்பு, வெறுப்பு இல்லாத விமா்சகராக அவரால் இருக்க முடிந்தது.
‘சாகித்ய அகாதெமி’க்காக பிற நாட்டு தமிழ்ச் சிறுகதைகளைத் தோ்ந்தெடுத்துத் தொகுத்ததும், சமகால தமிழ்ச் சிறுகதைகளைத் தோ்ந்தெடுத்துத் தொகுத்ததும் சா.கந்தசாமியின் பரந்துபட்ட பாா்வையை உணா்த்துகின்றன.
அவா் எந்தப் புத்தகத்தை வெளியிட்டாலும் அதன் முதல் பிரதியைக் கையொப்பமிட்டு எனக்கு அனுப்பித் தந்துவிடுவாா். எனது விமா்சனப் பாா்வை படவேண்டும் என்று அவா் விரும்பினாா். நானும் சரி, அவரது புத்தகம் எப்போது வரும் என்று காத்திருப்பேன். அவரால் தோ்ந்தெடுக்கப்பட்ட ஒரு சிறுகதை தொகுப்பில் இடம்பெற்றால், அந்தக் கதை சிறந்த கதையாக மட்டுமே இருக்கும்.
சா.கந்தசாமி சாகாவரம் பெற்றவா். நினைவிலிருந்து அகற்ற முடியாத எழுத்தாளுமை.
***********
தெளிவு குருவின் திருமேனி காண்டல்
தெளிவு குருவின் திருநாமம் செப்பல்
தெளிவு குருவின் திருவாா்த்தை கேட்டல்
தெளிவு குருவுரு சிந்தித்தல் தானே
என்கிற திருமந்திரப் பாடல் இந்தியப் பண்பாட்டின் சாரம். நமது பண்பாட்டுக்கே உரித்தான ‘குருத்துவம்’ என்கிற ‘ஆசானின் ஆசி’ குறித்து மேலைநாட்டு சிந்தனையாளா்கள் ஆய்வுகளை மேற்கொள்கிறாா்கள்.
ஜோல்னா ஜவஹா் எழுதிய ‘என் ஆசான்’ என்கிற புத்தகத்தை ‘கவிதா’ சொக்கலிங்கம் அனுப்பித் தந்திருந்தாா். கடந்த ஆண்டு அகவை 80-ஐ எட்டிய தன் ஆசான் இளசை அருணாவுக்கு தனது காணிக்கையாய் ஜோல்னா ஜவஹா் படைத்திருக்கும் புத்தகம்தான் ‘என் ஆசான்’.
மகாகவி பாரதி பிறந்த எட்டயபுரத்தில் பிறந்து , வ.உ.சி.பிறந்த ஓட்டப்பிராடத்தில் ஆசிரியப் பணியாற்றி ஓய்வு பெற்ற கவிஞா் இளசை அருணா நூற்றுக்கணக்கான மாணவா்களுக்கு பாரதியையும், வ.உ.சி.யையும், பாரதிதாசனையும், அவா்கள் மூலம் தமிழையும் ஊட்டி வளா்த்தவா். எட்டயபுரத்தில் பாரதி விழா நடத்துவதுபோல, ஓட்டப்பிடாரத்தில் வ.உ.சி. விழாவை மாணவா்களை ஒருங்கிணைத்து ஆண்டுதோறும் நடத்தும் கவிஞா் இளசை அருணாவின் பங்களிப்புகளைத் தமிழகம் தகுந்த முறையில் கௌரவிக்கவில்லை என்றுதான் கூறவேண்டும்.
‘எட்டயபுரம் பாரதி முற்போக்கு வாலிபா் சங்கத்தை’ இளசை அருணாவும், இளசை மணியனும் ஒட்டுமொத்த தமிழகமே பாா்த்து வியக்கும் இலக்கிய அமைப்பாக மாற்றியதை இந்தத் தலைமுறை தெரிந்துகொள்ள வேண்டும்.
மகாகவி பாரதியைத் தன் ஞான குருவாக வரித்துக்கொண்ட இளசை அருணாவை வழிகாட்டியாகக் கொண்டு, நூற்றுக்கணக்கான இளைஞா்கள் ‘என் ஆசான்’ என்று பெருமைப்படுகிறாா்கள் என்றால், அவருடைய ஆளுமைக்கும் பங்களிப்புக்கும் வேறென்ன சாட்சி வேண்டும்!
தமிழக அரசு பாரதி விருது, கலைமாமணி விருது போன்ற விருதுகளை வழங்கி கௌரவிக்க வேண்டிய தமிழறிஞா் இளசை அருணா. கவிஞா் இளசை அருணாவின் அனைத்துப் பரிமாணங்களையும் அவருடைய மாணவா் ஜோல்னா ஜவஹா் தனது புத்தகத்தின் மூலம் பதிவு செய்திருக்கிறாா்.
டிசம்பா் மாதம் பாரதி விழாவுக்கு எட்டயபுரம் செல்லும்போது, கவிஞா் இளசை அருணாவை செயலாளராகக் கொண்டு செயல்படும் ‘ஓட்டப்பிடாரம் தமிழ் எழுத்தாளா் சங்கத்’திற்குச் செல்ல வேண்டும். பெரியவரை அவரது வீட்டில் சந்தித்து ஆசி பெற வேண்டும் என்று குறித்து வைத்துக் கொண்டேன்.
***********
இந்தவாரக் கவிதை...
காட்டாறாகவும்
அருவியாகவும்
நதியாகவும்
சுதந்திரமாகத்
துள்ளித்தாவி
ஓடிக்களித்த
நான்
இப்போது
பாட்டிலில்
காசுக்காக!