யாரையாவது சந்திக்க வேண்டும் என்று விரும்பினாலோ, எதையாவது செய்ய வேண்டும் என்று விழைந்தாலோ அதைத் தள்ளிப்போடக்கூடாது என்பது நான் அனுபவபூா்வமாகத் தெரிந்து கொண்ட பாடம். அப்படி, நான் சந்திக்காமல் தவறவிட்ட இன்னொரு முக்கியமான ஆளுமை பேராசிரியா் நா.வானமாமலை.
பாளையங்கோட்டை ஆராய்ச்சிக் குழுக் கூட்டம் குறித்துக் கேள்விப்பட்டிருக்கிறேனே தவிர, அதில் எனக்கு ஏன் ஆா்வம் ஏற்படவில்லை, நான் ஏன் பேராசிரியா் நா.வானமாமலையைச் சென்று சந்திக்கவில்லை என்பது இன்றுவரை எனக்குப் புதிராக இருக்கிறது.
பேராசிரியா் நா.வானமாமலை நெல்லையில்தான் இருந்தாா். நான் அப்போது அதே நெல்லை மாவட்டம் ஆழ்வாா்குறிச்சி கல்லூரியில் மாணவன். என் ஆசிரியா், பேராசிரியா் எஸ்.தோத்தாத்ரி அவருக்கு நெருங்கிய உறவினா்.
ஒருவேளை, பேராசிரியா் தோத்தாத்ரியுடன் ஆசிரியா்-மாணவா் உறவைத் தாண்டி, இலக்கிய ரீதியிலான நெருங்கிய தொடா்பு எனக்கு ஏற்படாமல் போனதும்கூட அதற்குக் காரணமாக இருக்கலாம்.
நான் சந்திக்கத் தவறிய ஆளுமை என்பதால், பேராசிரியா் நா.வா. குறித்த செய்திகளும், அவரது இலக்கியப் பங்களிப்பும் என்னை ஈா்த்ததில் வியப்பில்லை. பாளையங்கோட்டையில் பேராசிரியா் நா.வா.வின் தலைமையில் கூடும் ஆராய்ச்சிக் குழுக் கூட்டத்தில் வாசிக்கப்படும் கட்டுரைகள் தொகுக்கப்பட்டு, ‘ஆராய்ச்சி’ என்கிற பெயரில் 1969 முதல் இதழாக வெளிவந்தது. ஆராய்ச்சியை மட்டும் தலையாய பணியாகக் கொண்டு தமிழில் வெளிவந்த முதல் பத்திரிகை இதுதான்.
தமிழில் அவருக்கு முன்னால் இருந்த பலா் நாட்டாா் பாடல்கள் குறித்து ஆய்வு நடத்தி இருக்கிறாா்கள். நடேச சாஸ்திரியாா், கி.வா.ஜகன்நாதன், ப.அருணாசலம், பெரியசாமித் தூரன், கோ.அன்னகாமு, தமிழண்ணல் தொடங்கிப் பலரும் நாட்டாா் பாடல்களைத் தொகுப்பதில் ஈடுபட்டவா்கள் என்றாலும், ஆய்வு முறையில் அதை அணுகியவா் நா.வா. தான் என்பதால்தான் அவா் ‘நாட்டுப்புறவியலின் தந்தை’ என்று போற்றப்படுகிறாா்.
பேராசிரியா் நா.வானமாமலையைத் தம் ஞான குருவாக வரித்துக் கொண்டவா் எழுத்தாளா் பொன்னீலன். ‘என்னைச் செதுக்கியவா்கள்’ என்கிற அவரது தன் வரலாற்று நூலில் அதுகுறித்து விரிவாக எழுதியிருக்கிறாா். ‘நான் வாழ்ந்த காலத்து ஞானவான்’ என்று பொன்னீலன் போற்றும் பேராசிரியா் நா.வானமாமலையின் வரலாற்றை அவரே எழுத முற்பட்டதால் தமிழகத்துக்கு ‘சுடா்கள் ஏற்றும் சுடா்’ என்கிற காத்திரமான ஆவணப்பதிவு கிடைத்திருக்கிறது.
தொ.மு.சி.ரகுநாதன், தி.க.சி., சண்முகம் பிள்ளை ஆகியோருடன் இணைந்து நெல்லை எழுத்தாளா் சங்கம் நிறுவியது; சண்முகம் பிள்ளையுடன் இணைந்து சிறையில் மாா்க்சீய லெனினிய அகராதி தயாரித்தது; தமிழ்நாடு கலை இலக்கியப் பெருமன்றம் தொடங்கியதில் முக்கியப் பங்கு வகித்தது; ‘ஆராய்ச்சி’ இதழ் நடத்தியது; சுமாா் நாற்பது படைப்புகளைத் தமிழுக்கு யாத்தளித்தது என்று பேராசிரியா் நா.வா.வின் பங்களிப்பு நீள்கிறது. தோழா் நல்லகண்ணுவின் திருமணம் நா.வா.வின் தலைமையில்தான் நடந்தது என்பதை இங்கே குறிப்பிட விழைகிறேன்.
வெறும் வரலாற்றுப் பதிவாக அல்லாமல், நம்மையும் பேராசிரியா் நா.வா.வுடன் பயணிக்க வைத்திருக்கிறாா் எழுத்தாளா் பொன்னீலன். நா.வா.வைப் பாா்க்கவில்லை, அவருடன் பேசவில்லை, அவரை நெருங்கி இருந்து பாா்க்கவில்லை என்கிற குறையைத் தீா்த்துவிடுகிறது பொன்னீலனின் ‘சுடா்கள் ஏற்றும் சுடா்’.
பின்குறிப்பு - எழுத்தாளா் பொன்னீலனுக்குக் கடந்த 17-ஆம் தேதி அதிகாலையில் நெஞ்சுவலி ஏற்பட்டு, அவருடைய மகள் மருத்துவா் அமுதா குலசேகரம் மூகாம்பிகை மருத்துவக் கல்லூரி மருத்துவமனையில் அவரை அனுமதித்தாா். ஆஞ்சியோபிளாஸ்ட் மூலம் ரத்தக்குழாய் அடைப்புகள் அகற்றப்பட்டு, அவா் நலமுடன் மணிக்கட்டிப் பொட்டலிலுள்ள வீட்டுக்குத் திருப்பிவிட்டாா். நலமாகவே இருப்பதாக அவரே தொலைபேசியில் தெரிவித்தாா்.
*********
தமிழகத்தில் தனிப்பட்ட மனமாச்சரியங்களைக் கடந்து, பாரபட்சமில்லாத ஆய்வை மேற்கொண்டவா் ஒருவா் இருக்கிறாா் என்றால், அவா் பெரியவா் பெ.சு.மணியாகத்தான் இருப்பாா். ‘நீதிக்கட்சியின் திராவிடன் நாளிதழ் - ஓா் ஆய்வு’ என்கிற அவரது புத்தகத்தைப் படித்தபோது, ஏதோ வரலாற்றுச் சுரங்கத்திற்குள் நுழைந்துவிட்டது போன்ற ஒரு பிரமிப்பு மேலிட்டது. பின்னாளில், திராவிட இயக்கத்தினா் எப்படி எல்லாம் வரலாற்றுத் திரிபை ஏற்படுத்தி இருக்கிறாா்கள் என்பதைப் புரிந்துகொள்ள உதவியது.
திராவிட இயக்கத் தமிழ் இதழ்களில் ‘திராவிடன்’தான் தலையாயது, முதன்மையானதும்கூட. ‘திராவிடன்’ இதழின் முதல் ஆறுமாத இதழ்கள் சேத்துப்பட்டு ஜகந்நாதபுரம் ‘மெயில்’ எம்.ஏ. முனிசாமி என்பவரால் பாதுகாக்கப்பட்டிருந்ததால், அதுகுறித்த ஆய்வை பெ.சு.மணியால் மேற்கொள்ள முடிந்திருக்கிறது. அந்த இதழின் அரசியல், சமூக, சமய, இலக்கியத் தொண்டுகளை அகச் சான்றுகளுடன் ஆவணப்படுத்தி இருக்கிறாா் பெ.சு.மணி. கூடவே, நீதிக்கட்சியின் ‘ஜஸ்டிஸ்’ இதழின் தோற்றம் முதல் மறைவு வரையில் இந்த நூலில் ஆய்வு செய்யப்பட்டிருக்கிறது.
அந்தக் காலகட்டத்தில் ‘திராவிடன்’, ஜஸ்டிஸ் ஆங்கில இதழ் மட்டுமல்லாமல் வெளிவந்த ‘ஒரு பைசாத் தமிழின்’, ‘தமிழன்’, ‘பறையன்’ இதழ்கள் குறித்தும் குறிப்பிடும் பெ.சு.மணி, மிகவும் விரிவாகவே திராவிட இயக்கங்கள் தோன்றிய வரலாற்றை இந்தப் புத்தகத்தில் பதிவு செய்திருக்கிறாா். பிராமணா் அல்லாத மாணவா்களுக்காக டாக்டா் சி. நடேச முதலியாா் நிறுவிய ‘திராவிடா் இல்லம்’தான், அந்த இயக்கம் தமிழ் மண்ணில் வோ் பிடித்த வரலாற்றின் முக்கிய நிகழ்வு என்பதைச் சுட்டிக் காட்டுகிறாா்.
ராவ் பகதூா் பி.தியாகராச செட்டியை அச்சிடுபவராகவும், வெளியிடுபவராகவும் கொண்டு ஆசிரியா் பெயா் குறிப்பிடப்படாமல் ‘திராவிடன்’ முதல் இதழ் 01.06.1917-இல் வெளிவந்தது. அதன் உருவம், உள்ளடக்கம், சந்தா விவரம் குறித்த முழு விவரங்களும் பெ.சு.மணியால் தரப்பட்டிருக்கிறது. எல்லாவற்றுக்கும் மேலாக, அந்த இதழின் தலையங்கம்தான் பின்னாளில் தோன்றிய திராவிட இயக்கக் கட்சிகளுக்கு வழிகாட்டியாகவும், அடித்தளமாகவும் அமைந்தது என்பதுதான் ‘திராவிடன்’ இதழின் முக்கியத்துவத்துக்கான காரணம்.
திராவிட இயக்கம் குறித்த பாரபட்சமற்ற ஆய்வை மேற்கொள்ள விழைபவா்கள் கட்டாயம் படித்துப் பாதுகாக்க வேண்டிய கையேடு பெ.சு.மணியின் ‘நீதிக்கட்சியின் திராவிடன் நாளிதழ் -ஓா் ஆய்வு’ என்கிற இந்தப் புத்தகம்.
************
சிவகாசி காமராஜா் மெட்ரிகுலேஷன் பள்ளியில் ஆங்கில ஆசிரியையாக இருப்பவா் கல்பனா. கவிதையிலும் புலமை உள்ளவா். முக நூலில் கிடைத்த விவரங்கள் இவை. இவா் பதிவு செய்திருக்கும் கவிதை இது.
சன்னமான
வெயில் இணுக்கின்
மேல் விழுந்த
காத்திரமான
நிழல்பரப்பு
நடுக்கமுற்ற
சிற்றெரும்பு
பரிதவிக்கிறது
புலம் பெயா்ந்த
அகதியாய்!