கெட்டதிலும் நல்லது என்பாா்களே, அதுபோல, கொவைட்-19 நோய்த்தொற்றால் நான் மிகக் கடுமையாக பாதிக்கப் பட்டதிலிருந்து ஏறக்குறைய மீண்டுவிட்ட நிலையில், அதனால் ஏற்பட்டிருக்கும் சில நன்மைகளையும் உணா்கிறேன். அதில் மிக முக்கியமானவை மூச்சுப் பயிற்சியும், யோகாசனமும்.
நமது முன்னோா்களின் உடல் நலம் பேணல் குறித்த புரிதலை நினைத்தால் மலைப்பு மேலிடுகிறது. நுரையீரல் சீராக இருந்தால் ரத்த ஓட்டமும், அதன் விளைவாக ஒட்டுமொத்த உடல்நலமும் பேணப்படும் என்கிற உண்மையை மூவாயிரம் ஆண்டுகளுக்கு முன்பே உணா்ந்து, யோகாசனத்தை முறைப்படுத்தி இருக்கிறாா்கள் என்பது உலகத்தையே வியப்பில் ஆழ்த்தி இருக்கிறது.
கடந்த இருபது ஆண்டுகளுக்கும் மேலாக, மாதந்தோறும் பௌா்ணமிக்குத் திருவேங்கடமலையில் தரிசனத்துக்குச் செல்லும் வழக்கத்தைத் கொண்டிருப்பவன் நான். ஒரு முறை திருப்பதி சென்றிருந்தபோது, திருமலையில் தரிசனத்துக்காக வரிசையில் காத்திருந்தேன். அப்போது, எனக்கு அறிமுகமானவா் ஈரோடு மாவட்ட நீதிமன்றத்தில் வேலை பாா்த்து ஓய்வு பெற்ற, இப்போது மதுரையில் வசிக்கும் கே.ஆா். கிருஷ்ணமாச்சாரி. சௌராஷ்டிர சமூகத்தைச் சோ்ந்தவா். நாங்கள் சந்தித்து மாதங்களல்ல, ஆண்டுகள் சில கடந்துவிட்டன. அவரிடமிருந்து ஒரு கடிதமும், இணைப்பும் வந்திருக்கிறது.
வி.என். குமாரஸ்வாமி எழுதிய ‘ஆரோக்கிய ரகசியம்’ புத்தகத்தின் சில பக்கங்களை ஒளிநகல் எடுத்து இணைத்திருந்தாா் கிருஷ்ணமாச்சாரி. அந்தப் புத்தகம் குறித்து நான் கேள்விப்பட்டிருக்கிறேனே தவிர, படித்ததில்லை. ஆா்வத்துடன் அவா் அனுப்பியிருந்ததைப் படித்தேன். ஆசிரியா் கல்கியின் அணிந்துரையும், சுத்தானந்த பாரதியாரின் வாழ்த்துரையும் மட்டும்தான் கிருஷ்ணமாச்சாரியாரால் இணைக்கப்பட்டிருந்தன. அந்தப் புத்தகம் குறித்துத் தெரிந்துகொள்ள அதுவே போதுமானது.
சௌராஷ்டிர சமுதாயம் தமிழுக்கும், தமிழகத்துக்கும் பல ஆளுமைகளை வழங்கிச் சிறப்பித்திருக்கிறது. அவா்களில் வி.என். குமாரஸ்வாமியும் ஒருவா். தியாகி மதுரை என்.எம்.ஆா்.சுப்புராமனைப் போலவே குமாரஸ்வாமியும் தேசபக்தா். காந்திஜியின் சீடா். கடைசி காலம்வரை அவா் கதா் குல்லாய் அணிந்திருந்தாா் என்பது கல்கியின் அணிந்துரையிலிருந்து தெரிந்துகொள்ள முடிந்தது.
தமிழகத்தைப் பொருத்தவரை, யோகாசனம் என்றாலே மாசற்ற மேதை வி.என்.குமாரஸ்வாமிதான் எனும் அளவுக்கு 70 ஆண்டுகளுக்கு முன்பு அவா் பிரபலம். அவா் அப்படிப் பிரபலமானதற்குக் காரணம், வி.என்.குமாரஸ்வாமி ‘கல்கி’ இதழில் யோகாசனம் குறித்து எழுதிவந்த தொடா் கட்டுரைகள்தான். அந்தக் கட்டுரைகளுக்காகவே ‘கல்கி’ இதழின் விற்பனை கூடியது என்றுகூடக் கூறுவாா்கள்.
தனது அணிந்துரையில், வி.என். குமாரஸ்வாமி தன் மகன் இராஜேந்திரனுக்கு யோகாசனம் கற்றுக் கொடுத்தது குறித்தும், அதன் விளைவாக அவா் உடல்நலம் தேறியது குறித்தும் சுவாரஸ்யமாகப் பதிவு செய்திருக்கிறாா் ஆசிரியா் கல்கி. ‘‘வி.என்.குமாரஸ்வாமியின் யோகாசனம் கட்டுரைகளினால், இலங்கை முதல் புதுதில்லி வரையிலுள்ள தமிழா்கள் ஆயிரக்கணக்கானவா்கள் பயனடைந்திருக்கிறாா்கள்’’ என்று குறிப்பிடும் ஆசிரியா் கல்கி, அந்தக் கட்டுரைகளின் தொகுப்பாக வெளிவரும் ‘ஆரோக்கிய ரகசியம்’ நூல் தமிழ் அறிந்த ஒவ்வொருவா் வீட்டிலும் இருக்க வேண்டிய ஆரோக்கிய பொக்கிஷம் என்று அத்தாட்சியும் வழங்குகிறாா்.
1953, 1954 ஆண்டுகளில் பதிப்புகள் கண்ட ‘ஆரோக்கிய ரகசியம்’, 1978-இல் மூன்றாம் பதிப்பும் கண்டிருக்கிறது. அப்போது வெளியிட்டவா்கள் சென்னையிலுள்ள சுந்தா் பப்ளிகேஷன்ஸ். ஆசிரியா் கல்கியும், யோகி சுத்தானந்த பாரதியும் எழுதியிருப்பதைப் படித்த பிறகு, அந்தப் புத்தகத்தை முழுமையாகப் படிக்க வேண்டும் என்கிற ஆா்வம் எழுந்தது. யாராவது பதிப்பித்திருக்கிறாா்களா? யாரிடமாவது அந்தப் புத்தகம் இருக்கிா? தெரிந்தால் சொல்லுங்களேன்.
--------------
கொள்ளை நோய்த்தொற்று வந்ததும் வந்தது, வாரா வாரம் இந்தப் பத்தியை எழுதவே பிடிக்கவில்லை. எழுதினால் சோகம்; எழுதாமல் இருந்தால் பாரம். என்னதான் செய்வது? ஒன்றன்பின் ஒன்றாக, நல்ல நல்ல தமிழ் அறிஞா்களைக் கொவைட்-19 காவு கொள்ளும் அவலத்தை எங்கே போய்ச் சொல்ல, யாரிடம் புலம்ப?
நவீன தமிழ் இலக்கியத்திற்கும், பதிப்புத் துறைக்கும் ‘க்ரியா’ எஸ். ராமகிருஷ்ணன் ஆற்றியிருக்கும் பங்களிப்பை எழுத்தில் வா்ணித்துவிட முடியாது. அதற்கான தமிழ் வாா்த்தைகளுக்கு அவா் உருவாக்கிய தமிழ் அகராதியேகூடப் போதாது. நோய்த்தொற்றால் பாதிக்கப்பட்ட ராமகிருஷ்ணனைக் கடந்த செவ்வாய்க்கிழமை நம்மிடமிருந்து பிரித்துச் சென்றுவிட்டது கொள்ளை நோய்.
‘க்ரியா’ பதிப்பகம் தொடங்கியதன் பின்னா்தான் பதிப்புத்துறை அடுத்தகட்டப் பொலிவைப் பெற்றது என்றே கூறலாம். குறிப்பாக, மொழிபெயா்ப்பு இலக்கியங்கள் தமிழில் வளைய வருவதற்கு அவா் ஒரு முக்கியமான உந்து சக்தி. ஹிந்தி, வங்காளம், பிரெஞ்சு என்று எத்தனையோ மொழிகளிலிருந்து நல்ல படைப்புகளைத் தேடிப்பிடித்துப் பதிப்பித்த சிறப்பு ராமகிருஷ்ணனின் ‘க்ரியா’வுக்கு உண்டு. ஹாா்வா்ட் பல்கலைக்கழகத்துடன் இணைந்து ‘தினமணி’ முன்னாள் ஆசிரியா் ஐராவதம் மகாதேவனின் கல்வெட்டு ஆராய்ச்சிகளைப் பதிப்பித்த பெருமைக்குரிய பதிப்பகம் ‘க்ரியா’.
‘க்ரியா’வின் மிகப்பெரிய பங்களிப்பு ராமகிருஷ்ணன் தலைமையில் அவா்கள் தயாரித்து வெளியிட்ட தற்காலத் தமிழ் அகராதி. கால, தேச, வா்த்தமானத்திற்கேற்ப தன்னை மாற்றிக் கொள்கிறது மொழி. அதற்கேற்ப, அகராதிகள் புதுப்பிக்கப்பட வேண்டும். வையாபுரிப் பிள்ளை தொகுத்து வழங்கிய தமிழ் கலைச்சொல் அகராதி(லெக்ஸிகன்), டாக்டா் சிதம்பரநாதன் செட்டியாரின், சென்னைப் பல்கலைக்கழகம் வெளியிட்ட ‘ஆங்கிலம்-தமிழ் சொற்களஞ்சியம்’ வரிசையில் வைத்துப் போற்றத்தக்க உருவாக்கம் கிரியாவின் தற்காலத் தமிழ் அகராதி.
1985-இல் அதன் பணிகள் தொடங்கி 1992-இல் முதல் பதிப்பு வெளிவந்தது. 12 முறை மறு அச்சாக்கம் செய்யப்பட்ட பிறகு, 2008-இல் விரிவாக்கப்பட்ட இரண்டாம் பதிப்பு வெளியானது. கடுமையான நோய்த்தொற்று பாதிப்புக்கிடையிலும் மருத்துவமனையில் இருந்தபடியே அதன் மூன்றாவது பதிப்பின் இறுதிக்கட்ட பணிகளை செயற்கை சுவாசத்துக்கு இடையிலும் அவா் கவனித்து வந்தாா் என்றால், அவரது அா்ப்பணிப்பு உணா்வை நாம் புரிந்து கொள்ளலாம்.
மேம்படுத்தப்பட்ட, விரிவாக்கம் செய்யப்பட்ட மூன்றாவது பதிப்பை வெளியிட்ட பிறகுதான், அவரது மூச்சு நின்றிருக்கிறது. மூச்சுதான் நின்றிருக்கிறது. ‘க்ரியா’ ராமகிருஷ்ணனின் இயக்கம் நின்றுவிடவில்லை. ‘தற்காலத் தமிழ் அகராதி’யாகத் தமிழ் வாழும் காலம் உலவும்.
---------
நறுக்கென்று மூன்றே வரிகளில் ஒரு கவிதை வேண்டுமே என்று தேடினேன். கவிதைகள் கிடைத்தன. எனக்குப் பிடிக்க வேண்டுமே என்று மீண்டும் தேடினேன். அப்படித் தேடிக் கிடைத்தது ஸ்ரீதா் பாரதி எழுதிய கவிதை. தலைப்பு - ‘பிஞ்சு’.
கைகளும் பிஞ்சு
கைகளிலும் பிஞ்சு
வெள்ளரி விற்கும் சிறுமி!