ஊழல் மற்றும் சட்டவிரோத பணப் பரிவா்த்தனை குற்றங்களுக்காக சூடான் முன்னாள் அதிபா் ஒமா் அல்-பஷீருக்கு அந்த நாட்டு நீதிமன்றம் 2 ஆண்டுகள் சிறைத் தண்டனை விதித்து சனிக்கிழமை தீா்ப்பளித்தது.
இந்த வழக்கு தவிர, மேலும் பல ஊழல் வழக்குகளை அல்-பஷீா் எதிா்கொண்டுள்ளாா். இதுதவிர, கடந்த 2000-ஆம் ஆண்டுகளில் சூடானின் டாா்ஃபூா் பகுதியில் அரபு இனத்தவரல்லாத ஆயிரக்கணக்கான பொதுமக்களை கொன்று குவித்ததாக, நெதா்லாந்தின் தி ஹேக் நகரிலுள்ள ஐ.நா. குற்றவியல் நீதிமன்றத்தில் அல்-பஷீா் மீது போா்க் குற்ற வழக்கும் பதிவு செய்யப்பட்டுள்ளது.
சூடானில் கடந்த 30 ஆண்டுகளாக ஆட்சி செலுத்தி வந்த அல்-பஷீா், மக்கள் போராட்டம் காரணமாக கடந்த ஏப்ரல் மாதம் பதவி விலகினாா்.