சர்வதேச அணுசக்தி முகமையின் தலைமை இயக்குநர் மறைவு

சர்வதேச அணுசக்தி முகமையின் (ஐஏஇஏ) தலைமை இயக்குநர் யுகியா அமனோ (72) காலமானார்.
ஜப்பான் நாட்டைச் சேர்ந்தவரான யுகிய அமனோ, கடந்த 2009-ஆம் ஆண்டு ஜூலையில் சர்வதேச அணுசக்தி முகமை அமைப்பின்  தலைமை இயக்குநராக பொறுப்பேற்றார். அதற்கு முன்பாக, 2005-ஆம் ஆண்டிலிருந்து அந்த முகமையில் ஜப்பான் பிரதிநிதியாக செயல்பட்டு வந்தார். 
2005-2006-ஆம் ஆண்டிலிருந்து அந்த முகமையின் ஆளுநர் குழு தலைவராகவும் உள்ளார். இந்தப் பொறுப்பிலிருந்து விலக திட்டமிட்டிருந்த நிலையில் அமனோ திங்கள்கிழமை காலமானதாக ஐஏஇஏ அறிவித்துள்ளது. இருப்பினும் அவரின் மரணத்துக்கு என்ன காரணம் என்பது அறிவிக்கப்படவில்லை.
அமனோவின் மரணத்தையடுத்து ஐஏஇஏ-வின் கொடிகள் அரைக்கம்பத்தில் பறக்கவிடப்படும் என்று அந்த அமைப்பு தெரிவித்துள்ளது.  அணு சக்தியை அமைதி மற்றும் மேம்பாட்டு திட்டங்களுக்கு பயன்படுத்தும் இலக்கில் உறுதியாக இருந்து சாதித்து காட்டியமைக்காக ஐஏஇஏ-வுக்கு பாராட்டு தெரிவித்து அமனோ எழுதிய கடிதத்தின் ஒரு பகுதியை அந்த அமைப்பு வெளியிட்டுள்ளது.
டோக்கியோ பல்கலைக்கழகத்தில் சட்டப்படிப்பை முடித்த அமனோ, ஜப்பானின் வெளியுறவுத் துறை அமைச்சகத்தில் கடந்த 1972-ஆம் ஆண்டு பணியில் சேர்ந்தார். பெல்ஜியம், பிரான்ஸ், லாவோஸ், ஸ்விட்சர்லாந்து, அமெரிக்க நாடுகளில் பணியாற்றியுள்ளார்.