புது தில்லி: ஜப்பானில் இம்மாத இறுதியில் நடைபெற உள்ள ஜி-20 மாநாட்டில் பிரதமர் நரேந்திர மோடி பங்கேற்க உள்ளதாக வெளியுறவுத்துறை தெரிவித்துள்ளது.
அமெரிக்கா, ரஷ்யா, சீனா, இந்தியா, ஜப்பான் உள்ளிட்ட நாடுகள் அங்கம் வகிக்கும் ஜி -20 நாடுகளின் உச்சி மாநாடு ஜப்பானின் ஒசாகா நகரில் வருகிற 28 மற்றும் 29 ஆம் தேதிகளில் நடைபெறுகிறது. இம்மாநாட்டில் உறுப்பு நாடுகளின் தலைவர்கள் பங்கேற்கின்றனர்
இந்நிலையில் ஜி-20 மாநாட்டில் பிரதமர் நரேந்திர மோடி பங்கேற்க உள்ளதாக வெளியுறவுத்துறை தெரிவித்துள்ளது.
இதுதொடர்பாக இந்திய வெளியுறவுத் துறை செய்தித் தொடர்பாளர் ரவீஷ் குமார் வெள்ளியன்று செய்தியாளர்களிடம் கூறியதாவது:
இந்த மாநாட்டில் பங்கேற்க ஜி- 20 நாடுகளின் பிரதமர்கள் அனைவருக்கும் அழைப்பு விடுக்கப்பட்டுள்ளது. அதனடிப்படையிலேயே பிரதமர் மோடிக்கும் அழைப்பு விடுக்கப்பட்டுள்ளது. இந்த அழைப்பை ஏற்றுக் கொண்டுள்ள பிரதமர் மோடி ஜூன் 27-ம் தேதி முதல் 29-ம் தேதி வரை பங்கேற்கிறார்.
இந்த மாநாட்டின்போது சீன அதிபர் ஜி ஜின்பிங் மற்றும் அமெரிக்க அதிபர் டொனால்ட் டிரம்ப் உள்ளிட்ட பல்வேறு முக்கிய உலகத்த தலைவர்களை சந்தித்து பிரதமர் மோடி ஆலோசனை நடத்த இருக்கிறார்.
இவ்வாறு அவர் தெரிவித்துள்ளார்.