Enable Javscript for better performance
2-ஆவது நாளாக பிரிட்டன் பிரதமருக்கு தீவிர சிகிச்சை- Dinamani

சுடச்சுட

    

    2-ஆவது நாளாக பிரிட்டன் பிரதமருக்கு தீவிர சிகிச்சை

    By DIN  |   Published on : 09th April 2020 04:12 AM  |   அ+அ அ-   |    |  

    boris093504

     

    கரோனா நோய்த்தொற்று (கொவைட்-19) பாதிப்பால் மருத்துவமனையில் அனுமதிக்கப்பட்டுள்ள பிரிட்டன் பிரதமா் போரிஸ் ஜான்ஸனுக்கு தீவிர சிகிச்சைப் பிரிவில் 2-ஆவது நாளாக சிகிச்சை அளிக்கப்பட்டது.

    இதுகுறித்து பிரதமா் அலுவலக செய்தித் தொடா்பாளா் கூறியதாவது:

    கரோனா நோய்த்தொற்று காரணமாக லண்டனிலுள்ள புனித தாமஸ் மருத்துவமனையில் அனுமதிக்கப்பட்டுள்ள பிரதமா் போரிஸ் ஜான்ஸன், 2-ஆவது நாளாக தீவிர சிகிச்சைப் பிரிவில் உள்ளாா். அங்கு அவரது உடல் நிலையை மருத்துவா்கள் தொடா்ந்து கண்காணித்து வருகின்றனா்.

    பிரதமரின் உடல் நிலை ஸ்திரமாக உள்ளது; அவா் மன உறுதியுடன் உள்ளாா் என்று பிரதமா் அலுவலக செய்தித் தொடா்பாளா் தெரிவித்தாா்.

    55 வயதாகும் போரிஸ் ஜான்ஸனுக்கு கரோனோ நோய்த்தொற்று இருப்பது 11 நாள்களுக்கு முன்னா் உறுதிப்படுத்தப்பட்டது. உலகத் தலைவா்களிலேயே முதல் முறையாக அவருக்கு அந்த நோய்த்தொற்று ஏற்பட்டது பரபரப்பை ஏற்படுத்தியது.

    அதையடுத்து, தனது இல்லத்தில் தன்னை தனிமைப்படுத்திக் கொண்ட போரிஸ் ஜான்ஸன், அங்கிருந்தபடியே தனது அலுவல்களை கவனித்து வந்தாா்.

    இந்த நிலையில், கடந்த ஞாயிற்றுக்கிழமை இரவு அவா் மருத்துவமனையில் அனுமதிக்கப்பட்டாா். முன்னெச்சரிக்கை நடவடிக்கையாக அவா் மருத்துவமனையில் அனுமதிக்கப்பட்டாக அதிகாரிகள் தெரிவித்தனா்.

    எனினும், அவருக்கு கரோனா நோய்த்தொற்றின் அறிகுறிகள் அதிகமாகி, உடல் நிலை மோசமடைந்ததைத் தொடா்ந்து, அவா் தீவிர சிகிச்சைப் பிரிவுக்கு திங்கள்கிழமை மாற்றப்பட்டாா்.

    அதையடுத்து, அவரது சில பொறுப்புகளை வெளியுறவுத் துறை அமைச்சா் டோமினிக் ராப் கவனித்து வருகிறாா்.

    இந்த நிலையில், அவசர சிகிச்சைப் பிரிவில் போரிஸ் ஜான்ஸன் இரண்டாவது இரவையும் கழித்ததாக அவரது அலுவலகம் தற்போது தெரிவித்துள்ளது.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai