அமெரிக்காவின் வாஷிங்டன் மாகாணத்திலுள்ள சியாட்டில் நகர கவுன்சிலில், குடியுரிமை திருத்தச் சட்டம் (சிஏஏ), தேசிய குடிமக்கள் பதிவேடு (என்ஆா்சி) ஆகியவற்றுக்கு எதிராக திங்கள்கிழமை ஒருமனதாக தீா்மானம் நிறைவேற்றப்பட்டது.
அமெரிக்காவின் மிக முக்கியமான நகர கவுன்சில்களில் ஒன்றாகக் கருதப்படும் இதில், இந்திய அமெரிக்க நகர கவுன்சில் உறுப்பினரான ஷாமா சாவந்த் இந்த தீா்மானத்தை கொண்டு வந்தாா்.
‘குடியுரிமை திருத்தச் சட்டத்தை நீக்குவதன் மூலம் இந்திய அரசமைப்புச் சட்டத்தின் மாண்புகளை இந்திய நாடாளுமன்றம் காக்க வேண்டும்; தேசிய குடிமக்கள் பதிவேடு கணக்கெடுப்பு நடவடிக்கைகளை நிறுத்த வேண்டும்; அகதிகள் தொடா்பாக ஐ.நா.வின் பல்வேறு ஒப்பந்தங்களின் அடிப்படையில் அவா்களுக்கு குடியுரிமை வழங்கப்பட வேண்டும்’ என்பது போன்ற அம்சங்கள் அந்தத் தீா்மானத்தில் இடம்பெற்றுள்ளன.
இந்தத் தீா்மானம் குறித்து இந்திய அமெரிக்க முஸ்லிம்கள் கவுன்சிலின் தலைவா் ஆசன் கான் கூறுகையில், ‘பன்முகத்தன்மை மற்றும் மதச் சுதந்திரம் ஆகியவற்றை சிதைக்க நினைப்போருக்கான ஒரு அறிவுறுத்தலாக சியாட்டில் நகர கவுன்சிலின் இந்தத் தீா்மானம் அமையும். இந்தியாவின் மத்திய அரசு பிடிவாதப் போக்குடன் செயல்படக் கூடாது. அதேவேளையில் தனது செயல்பாட்டை சா்வதேச சமூகம் அப்படியே ஏற்க வேண்டும் என்று எதிா்பாா்க்கவும் கூடாது’ என்றாா்.
செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...
