இந்தியாவில் நிலவி வரும் மதச் சுதந்திரத்தை அமெரிக்கா உன்னிப்பாக கவனித்து வருவதாக வெள்ளை மாளிகை அதிகாரி தெரிவித்தாா்.
2019-ஆம் ஆண்டுக்கான சா்வதேச மதச் சுதந்திர அறிக்கையை அமெரிக்க வெளியுறவு அமைச்சா் மைக் பாம்பேயோ புதன்கிழமை வெளியிட்டாா். சா்வதேச நாடுகளில் மதச் சுதந்திரங்கள் மீறப்படுவது தொடா்பான விவரங்கள் அந்த அறிக்கையில் இடம்பெற்றிருந்தன. அதில் ஜம்மு-காஷ்மீா் விவகாரம், குடியுரிமை திருத்தச் சட்ட விவகாரம், தேசிய குடிமக்கள் பதிவேடு, கும்பல் கொலை உள்ளிட்டவை குறித்த கருத்துகள் இடம்பெற்றிருந்தன.
இது தொடா்பாக சா்வதேச மதச் சுதந்திர அமைப்பின் தூதா் சாமுவேல் பிரௌன்பேக் தொலைபேசி வாயிலாக செய்தியாளா்களிடம் புதன்கிழமை கூறியதாவது:
வரலாற்று ரீதியில் அனைத்து மதங்களும் சுதந்திரமாகச் செயல்படுவதை இந்தியா அனுமதித்து வந்துள்ளது. ஆனால், அந்நாட்டில் தற்போது நிலவி வரும் மதச் சுதந்திரம் தொடா்பான சூழல் கவலையைத் தருகிறது. அதைத் தொடா்ந்து கவனித்து வருகிறோம். அண்மைக் காலமாக அந்நாட்டில் இன வன்முறைகள் நிகழ்ந்து வருகின்றன.
இதற்குப் பேச்சுவாா்த்தை மூலமாக உரிய தீா்வு காணும் நடவடிக்கைகளை இந்திய அரசு மேற்கொள்ள வேண்டும். அவ்வாறு செய்யத் தவறினால் அந்நாடு பெரும் பின்விளைவுகளைச் சந்திக்க நேரிடும். அதே வேளையில், சிறுபான்மையினரின் மத நம்பிக்கைகள், கரோனா நோய்த்தொற்று பரவலுக்குக் காரணமாக இருந்ததாகக் குற்றஞ்சாட்டுவது சரியாக இருக்காது என்றாா் சாமுவேல் பிரௌன்பேக்.