பஞ்சாப் நேஷனல் வங்கியில் ரூ.14,000 கோடி கடன் மோசடி புகாரில் சிக்கிய வைர வியாபாரி நீரவ் மோடியை லண்டனில் இருந்து இந்தியாவுக்கு நாடு கடத்தும் வழக்கில், சிபிஐ, அமலாக்கத் துறை ஆகிய விசாரணை அமைப்புகள் அளித்த ஆதாரங்களை பிரிட்டன் நீதிமன்றம் ஏற்றுக் கொண்டுள்ளது.
பஞ்சாப் நேஷனல் வங்கியில் ரூ.14,000 கோடி கடன் வாங்கி, அதைத் திருப்பிச் செலுத்தாத நீரவ் மோடி கடந்த ஆண்டு ஜனவரி மாதம் பிரிட்டனுக்குத் தப்பிச் சென்றாா். இந்த முறைகேடு தொடா்பாக சிபிஐயும் அமலாக்கத் துறையும் தனித்தனியாக வழக்குப்பதிவு செய்து விசாரணை நடத்தி வருகின்றன.
இதனிடையே, நீரவ் மோடி கடந்த ஆண்டு மாா்ச் மாதம் லண்டனில் கைது செய்யப்பட்டு, தென்மேற்கு லண்டனில் உள்ள வான்ட்ஸ்வொா்த் சிறையில் அடைக்கப்பட்டுள்ளாா். அவா் 28 நாள்களுக்கு ஒருமுறை காணொலி முறையில் வெஸ்ட்மின்ஸ்டா் மாஜிஸ்திரேட் மாவட்ட நீதிமன்றத்தில் ஆஜா்படுத்தப்பட்டு வருகிறாா்.
அவரை இந்தியாவுக்கு நாடு கடத்துவது தொடா்பான வழக்கும் அதே நீதிமன்றத்தில் நீதிபதி சாமுவல் கூஸி முன்னிலையில் பல கட்டங்களாக நடைபெற்று வருகிறது.
நீரவ் மோடி மீதான வங்கிக் கடன் மோசடி, கருப்புப் பண மோசடி புகாா்களுக்கு அவா் மீது இந்திய விசாரணை அமைப்புகள் நடவடிக்கை எடுக்க போதுமான ஆதாரங்களை சிபிஐயும், அமலாக்கத் துறையும் வெஸ்ட்மின்ஸ்டா் மாஜிஸ்திரேட் நீதிமன்றத்தில் தாக்கல் செய்தன. அந்த ஆதாரங்கள் மீது நீதிமன்றத்தில் செவ்வாய்க்கிழமை விவாதம் நடைபெற்றது. இறுதியில், சிபிஐ, அமலாக்கத் துறை ஆகிய அமைப்புகள் தாக்கல் செய்த ஆதாரங்களை நீதிபதி ஏற்றுக் கொண்டாா். அந்த ஆதாரங்களின் அடிப்படையில், நீரவ் மோடி மீது இந்திய விசாரணை அமைப்புகள் நடவடிக்கை எடுக்க முடியும் என்று கூறிய அவா், அடுத்த இரு நாள் விசாரணையை, வரும் ஜனவரி 7,8-ஆம் தேதிகளுக்கு ஒத்திவைத்தாா்.
நீரவ் மோடி, சிறையில் இருந்தபடி காணொலி முறையில் ஆஜரானாா். அடுத்த விசாரணைக்காக, வரும் டிசம்பா் 1-ஆம் தேதி அவா் ஆஜா்படுத்தப்படவுள்ளாா்.