அமெரிக்காவில் சிறியவகை விமானம் விழுந்து நொறுங்கியதில் இந்திய வம்சாவளி மருத்துவா் உள்பட 2 போ் உயிரிழந்தனா்.
இதுகுறித்து அமெரிக்க ஊடகங்களை மேற்கோள் காட்டி பிடிஐ செய்தி நிறுவனம் தெரிவித்துள்ளதாவது:
இந்திய வம்சாவளியைச் சோ்ந்த மருத்துவா் சுகதா தாஸ், அரிஸோனா மாகாணத்தில் யூமா மண்டல மருத்துவ மையத்தில் இருதய நோய் நிபுணராகப் பணியாற்றி வந்தாா்.
தனக்குச் சொந்தமான சிறிய விமானத்தில் சுகதா தாஸ் திங்கள்கிழமை சென்றுகொண்டிருந்தபோது திடீரென ஏற்பட்ட கோளாறால், அது விழுந்து நொறுங்கி விபத்துக்குள்ளானது. சம்பவ இடத்திலேயே அவா் உயிரிழந்தாா்.
விமானம் விழுந்ததில் இரு கட்டடங்கள் தீப்பிடித்தன. இதில், தரையிலிருந்த மேலும் ஒருவா் பலியானாா்.
தீயணைப்பு வீரா்கள் சம்பவப் பகுதிக்கு விரைந்து தீயை அணைத்தனா். கலிஃபோா்னியா மாகாணம், சான்டீ பகுதியிலுள்ள சான்டானா உயா்நிலைப் பள்ளி அருகே இந்த விபத்து நேரிட்டதாக தெரிவிக்கப்பட்டுள்ளது.