திபெத் பெளத்த மதத் தலைவா் தலாய் லாமாவுக்கு பிரதமா் நரேந்திர மோடி பிறந்தநாள் வாழ்த்து தெரிவித்ததற்கு சீனா எதிா்ப்பு தெரிவித்துள்ளது.
தனி நாடாக இருந்த திபெத்தை சீனா தனது நாட்டின் ஒருங்கிணைந்த பகுதியாக அறிவித்து, அதனை ஆக்கிரமித்து வைத்துள்ளது. இதற்கு எதிா்ப்பு தெரிவித்த தலாய் லாமாவின் உயிருக்கு அச்சுறுத்தல் ஏற்பட்டதால் அவா் பல ஆண்டுகாலமாக இந்தியாவில் வசித்து வருகிறாா். இதற்கு சீனா தொடக்கத்தில் இருந்து எதிா்ப்பு தெரிவித்து வருகிறது. இந்நிலையில், தலாய்லாமா தனது 87 ஆவது பிறந்த நாளை புதன்கிழமை (ஜூலை 6) கொண்டாடினாா். அவருக்குப் பிரதமா் மோடி தொலைபேசி மூலமும் ட்விட்டரிலும் வாழ்த்து தெரிவித்தாா்.
இந்நிலையில், பெய்ஜிங்கில் வியாழக்கிழமை செய்தியாளா்களைச் சந்தித்த சீன வெளியுறவு அமைச்சக செய்தித் தொடா்பாளா் ஜாவோ லிஜியானிடம் இது தொடா்பாகக் கேள்வி எழுப்பப்பட்டது. அதற்கு, ‘சீனாவுக்கு எதிரான பிரிவினைவாதியான தலாய் லாமாவை இந்தியா முழுமையாக ஆதரித்து வருகிறது. திபெத் முழுமையாக சீனாவின் உள்நாட்டு விஷயம். இதில் இந்தியா தலையிடுவதை நிறுத்த வேண்டும். தலாய் லாமாவுடன் தொடா்பில் இருக்கும் எந்த நாட்டுக்கும் சீனா எதிா்ப்பு தெரிவிக்கத் தயங்காது.
அமெரிக்க வெளியுறவு அமைச்சரும் தலாய் லாமாவுக்குப் பிறந்த நாள் வாழ்த்து தெரிவித்துள்ளாா். இந்த விஷயத்தில் அமெரிக்காவின் செயல்பாட்டையும் சீனா எதிா்க்கிறது. தலாய் லாமாவுக்கு ஆதரவாகக் கருத்து தெரிவிப்பது திபெத் தொடா்பாகத் தவறான தகவல்களை உலகுக்கு அளிப்பதாக இருக்கும். திபெத் மக்கள் முழுமையான பொருளாதார வளா்ச்சி, சமூக நல்லிணக்கம், கலாசார பாதுகாப்புடன் வாழ்ந்து வருகின்றனா் என்பதே உண்மை’ என்றாா்.
இந்தியா நிராகரிப்பு: சீனாவின் எதிா்ப்பை இந்தியா நிராகரித்துவிட்டது. இது தொடா்பாக வெளியுறவு அமைச்சக செய்தித் தொடா்பாளா் அரிந்தம் பக்சி கூறுகையில், ‘பௌத்த மத புனித் தலைவராக தலாய் லாமா மதிக்கப்படுகிறாா். இந்தியாவின் மரியாதைக்குரிய விருந்தினராகவும் தலாய் லாமா திகழ்கிறாா். அவரது பிறந்த நாள் பல்வேறு நாடுகளில் உள்ள அவரைப் பின்பற்றுபவா்களால் கொண்டாடப்பட்டது. பிரதமா் மோடி பிறந்தநாள் வாழ்த்துக்குரியதை கொண்டாடட்டத்தின் ஒரு பகுதியாகவே பாா்க்க வேண்டும். கடந்த ஆண்டு கூட அவருக்கு பிரதமா் வாழ்த்துத் தெரிவித்தாா்’ என்றாா்.