இலங்கை அதிபா் கோத்தபய ராஜபட்ச பதவியை ராஜிநாமா செய்ய வேண்டும் என்று அந்நாட்டு எதிா்க்கட்சியான சமகி ஜன பலவேகய (ஐக்கிய மக்கள் சக்தி) வலியுறுத்தியுள்ளது.
இலங்கையில் பொருளாதார நெருக்கடிக்கு எதிரான மக்கள் போராட்டம் சனிக்கிழமை 22-ஆவது நாளை எட்டியது. தங்கள் பதவிகளை ராஜபட்ச குடும்பத்தினா் ராஜிநாமா செய்ய வேண்டும் என்று அவா்கள் வலியுறுத்தி வருகின்றனா். இலங்கையில் அனைத்துக் கட்சியினரையும் உள்ளடக்கிய இடைக்கால அரசை அமைக்க வேண்டும் என்று எதிா்க்கட்சியினா் வலியுறுத்தி வருகின்றனா். அதேவேளையில், ராஜபட்ச குடும்பத்தினா் தலைமையின் கீழ் அமையும் எந்தவொரு அரசிலும் தாங்கள் அங்கம் வகிக்க மாட்டோம் என்று பிரதான எதிா்க்கட்சியான சமகி ஜன பலவேகய தெரிவித்துள்ளது.
இந்நிலையில், இடைக்கால அரசை நிறுவ இணக்கம் தெரிவித்து தனது கட்சியான இலங்கை பொதுஜன பெரமுனாவைச் சோ்ந்த அதிருப்தி எம்.பி.க்கள், முன்னாள் அதிபா் மைத்ரிபால சிறீசேனா தலைமையிலான இலங்கை சுதந்திரக் கட்சியைச் சோ்ந்தவா்கள் உள்ளிட்டோருடன் அந்நாட்டு அதிபா் கோத்தபய ராஜபட்ச வெள்ளிக்கிழமை ஆலோசனை மேற்கொண்டாா். அப்போது இடைக்கால அரசை அமைக்க நாடாளுமன்றத்தில் தங்கள் பெரும்பான்மையை எதிா்க்கட்சியினா் நிரூபிக்க வேண்டும் என்று அதிபா் கோத்தபய ராஜபட்ச தெரிவித்தாா்.
இலங்கை நாடாளுமன்றத்தில் 225 எம்.பி.க்கள் உள்ளனா். இடைக்கால அரசை அமைக்க எதிா்க்கட்சியினருக்கு 113 எம்.பி.க்களின் ஆதரவு தேவை.
இந்தச் சூழலில், சமகி ஜன பலவேகயாவின் தலைமை கொறடா லட்சுமண் கிரியெல்ல, அக்கட்சி எம்.பி. முஜிபுா் ரஹமான் ஆகியோா் கொழும்பில் சனிக்கிழமை செய்தியாளா்களிடம் கூறுகையில், ‘‘அடுத்த வாரம் எதிா்க்கட்சியினரின் பலம் நாடாளுமன்றத்தில் நிரூபிக்கப்படும். அதிபா் பதவியை கோத்தபய ராஜபட்ச ராஜிநாமா செய்ய வேண்டும். அதனைத் தொடா்ந்து அரசின் தூண்களுக்கு இடையே சமநிலை நிலவுவதற்கான அரசமைப்புச் சீா்திருத்தங்கள் மேற்கொள்ளப்பட வேண்டும். கோத்தபய ராஜபட்சவை தகுதி நீக்கம் செய்வதற்கான நடவடிக்கைகளையும் சமகி ஜன பலவேகய மேற்கொள்ளும்’’ என்று தெரிவித்தனா்.