கரோனா அச்சுறுத்தல் காரணமாக 2020-ம் ஆண்டு குறைவான ஆட்டங்களில் தான் இந்திய அணி விளையாடியுள்ளது.
இந்த வருடம் 24 சர்வதேச ஆட்டங்களில் மட்டுமே விளையாடியுள்ளது. 4 டெஸ்டுகள், 11 டி20, 9 ஒருநாள் ஆட்டங்கள்.
இதுவரை விளையாடிய நான்கு டெஸ்டுகளில் (அனைத்தும் வெளிநாடுகளில்) மூன்று ஆட்டங்களில் இந்திய அணி தோல்வியடைந்துள்ளது. மெல்போர்னில் ஆஸ்திரேலியாவுக்கு எதிரான 2-வது டெஸ்டை இந்திய அணி வென்றுள்ளது.
11 டி20 ஆட்டங்களில் இந்திய அணி ஒரு டி20 ஆட்டத்தில் மட்டுமே தோற்று 9 வெற்றிகளைப் பெற்றுள்ளது. ஒரு டி20 ஆட்டம் மழையால் ரத்தானது. வெளிநாடுகளில் இரு டி20 தொடர்களை வென்றுள்ளது இந்திய அணி.
9 ஒருநாள் ஆட்டங்களில் விளையாடி 3 வெற்றிகளை மட்டுமே பெற்று 6 ஒருநாள் ஆட்டங்களில் தோல்வியடைந்துள்ளது இந்திய அணி. மோசமாக விளையாடியிருந்தாலும் 3 வெற்றிகளும் ஆஸ்திரேலியாவுக்கு எதிராகக் கிடைத்துள்ளன.
| இந்திய அணி 2020 | ஆட்டங்கள் | வெற்றிகள் | தோல்விகள் | முடிவு இல்லை |
| டெஸ்ட் | 4 | 1 | 3 | - |
| ஒருநாள் | 9 | 3 | 6 | - |
| டி20 | 11 | 9 | 1 | 1 |
202-ம் ஆண்டில் இந்திய அணி விளையாடிய கிரிக்கெட் தொடர்கள்
* ஜனவரி மாதம் இந்தியாவில் 3 ஆட்டங்கள் கொண்ட டி20 தொடரில் விளையாடியது இலங்கை அணி. டி20 தொடரை 2-0 என வென்றது இந்திய அணி. முதல் டி20 ஆட்டம் மழையால் ரத்தானது. நவ்தீப் சைனி தொடர் நாயகன் விருது பெற்றார்.
* ஜனவரியில் ஆஸ்திரேலிய அணி இந்தியாவுக்கு வந்து 3 ஒருநாள் ஆட்டங்களில் விளையாடியது. ஒருநாள் தொடரை 2-1 என வென்றது இந்திய அணி. தொடர் நாயகன் விருதை விராட் கோலி வென்றார்.
* ஜனவரி - பிப்ரவரியில் நியூசிலாந்துக்குச் சென்று 3 ஒருநாள், 5 டி20, 2 டெஸ்டுகளில் இந்திய அணி விளையாடியது.
டி20 தொடரை 5-0 என வென்று சாதனை செய்தது இந்திய அணி. கே.எல். ராகுல் தொடர் நாயகன் விருதை வென்றார். ஒருநாள் தொடரை 3-0 எனவும் டெஸ்ட் தொடரை 2-0 எனவும் தோற்றது.
* கரோனா காரணமாக இந்திய அணி மார்ச்சுக்குப் பிறகு நவம்பர் வரை எந்தவொரு சர்வதேச ஆட்டத்திலும் விளையாடவில்லை. நடுவில் ஐபிஎல் போட்டி நடைபெற்றது. மும்பை இந்தியன்ஸ் அணி மீண்டும் பட்டம் வென்றது.
* தற்போது, ஆஸ்திரேலியாவுக்குச் சுற்றுப்பயணம் மேற்கொண்டுள்ள இந்திய அணி - டெஸ்ட், ஒருநாள், டி20 தொடா்களில் விளையாடுகிறது. ஒருநாள் தொடரை 1-2 எனத் தோற்றது இந்திய அணி. எனினும் டி20 தொடரை 2-1 என வென்றுள்ளது. தொடர் நாயகன் விருதை ஹார்திக் பாண்டியா வென்றார். ஒருநாள், டி20 தொடர்களில் தமிழக வீரர் நடராஜன் அறிமுகமாகி அனைவரையும் சந்தோஷப்படுத்தியுள்ளார்.
இந்தியாவுக்கு எதிரான முதல் டெஸ்ட் கிரிக்கெட் ஆட்டத்தில் 8 விக்கெட் வித்தியாசத்தில் அபார வெற்றி கண்டது ஆஸ்திரேலியா. மெல்போர்னில் நடைபெற்ற 2-வது டெஸ்டை ரஹானே தலைமையிலான இந்திய அணி வென்றுள்ளது. கடந்த முறை ஆஸ்திரேலியாவில் கோலி தலைமையிலான இந்திய அணி டெஸ்ட் தொடரை வென்றது. இந்தமுறையும் இந்திய அணி ஆஸ்திரேலியாவுக்குச் சவாலாக விளங்குமா என ரசிகர்கள் ஆவலுடன் காத்திருக்கிறார்கள்.