தேர்தல் மூலம் தங்களது தலைவர்களைத் தேர்ந்தெடுத்துக் கொள்ளலாம் என்ற கருத்து அந்தக் காலத்தில் உருவாகவில்லை. காலப்போக்கில் மனித சமுதாயத்தில் ஏற்பட்ட வளர்ச்சியைத் தொடர்ந்து, அந்தச் சமுதாயத்தின் நலனை மேம்படுத்தவும், அவர்களது பிரச்னைகளுக்கு தீர்வு காணவும் சபைகள் உருவாக்கப்பட்டன.
குடிமக்கள் தங்களது ஆட்சியாளர்களை வாக்கெடுப்புமூலம், அதாவது தேர்தல் மூலம் தேர்ந்தெடுக்கப்படும் நடைமுறை கி.மு. 5-ஆம் நூற்றாண்டில் பண்டைய கிரேக்க நகரங்களில் ஒன்றான ஏதென்ஸில் பின்பற்றப்பட்டது.நேரடி ஜனநாயகத்தின் தொடக்கமாக இது கருதப்படுகிறது. அதேசமயம், ஏதென்ஸ் குடிமக்களில் வயது வந்த ஆண்களுக்கு மட்டுமே வாக்கெடுப்பில் கலந்துகொள்ளும் உரிமை வழங்கப்பட்டது. பெண்கள், அடிமைப்படுத்தப்பட்ட மக்கள், வெளிநாட்டில் பிறந்து ஏதென்ஸ் நகரில் வசிப்பவர்களுக்கு வாக்களிக்கும் உரிமை வழங்கப்படவில்லை.
தென்னிந்தியாவில் சோழர்கள் ஆட்சிக் காலத்தில் (கி.பி. 10-ஆம் நூற்றாண்டு) கிராம சபை உறுப்பினர்களைத் தேர்ந்தெடுக்க பின்பற்றப்பட்ட முறை குறித்து உத்தரமேரூர் கல்வெட்டுகள் வெளிப்படுத்துகின்றன. கிராம சபை உறுப்பினர் பதவிக்குத் தகுதியான நபர்களை குடவோலை முறையில் தேர்ந்தெடுத்தனர். இது ஜனநாயகத் தேர்தல் முறைக்கு முன்னோடியாகும்.
ஐரோப்பிய நாடுகள் சிலவற்றிலும், அமெரிக்காவிலும் 18-ஆம் நூற்றாண்டின் இறுதியில் அரசியல் கட்சிகள் தோற்றுவிக்கப்பட்டு இருந்தாலும், 19 மற்றும் 20-ஆம் நூற்றாண்டுகளில் உலக நாடுகள் பலவற்றில் அதிக எண்ணிக்கையிலான உறுப்பினர்களைக் கொண்ட அரசியல் கட்சிகள் தோன்றின.
தேர்தல் கூட்டணி என்ற பெயரில் ஜனநாயக மாண்புகளைச் சிதைத்தல், சந்தைப் பொருள்களைப் போன்று வாக்குகளைப் பணம் கொடுத்து வாங்குதல், தேர்தல்களை எதிர்கொள்ளும் ஆளும் கட்சிகள் மாநில அரசின் நிதியில் இருந்து பெரும்தொகையை தேர்தல் நேரங்களில் வாக்காளர்களுக்கு வழங்குதல் போன்றவற்றுக்கு தீர்வு காணும் பொறுப்பு உடையது இந்திய தேர்தல் ஆணையம்.
இந்திய தேர்தல் ஆணையம் சுயாதீன அமைப்பாகச் செயல்பட்டு, இந்திய ஜனநாயகத்தின் மாண்புகளைப் பாதுகாக்க வலியுறுத்தும் முன்னெடுப்புகள் குறித்து, இந்திய வாக்காளர்கள் சிந்தித்துச் செயல்பட வேண்டிய தருணம் இது.