ஆசிய கோப்பை ஹாக்கி: பாகிஸ்தானை பந்தாடியது இந்தியா

பதினெட்டு வயதுக்குள்பட்டோருக்கான ஆசிய கோப்பை ஹாக்கிப் போட்டியின் அரையிறுதியில் இந்திய அணி 3-1 என்ற கோல் கணக்கில் பாகிஸ்தானை வீழ்த்தி இறுதிச்சுற்றுக்கு முன்னேறியுள்ளது.
வங்கதேச தலைநகர் டாக்காவில் நடைபெற்று வரும் இந்தப் போட்டியில் வியாழக்கிழமை நடைபெற்ற அரையிறுதியில் இந்தியாவும், பாகிஸ்தானும் மோதின. விறுவிறுப்பாக நடைபெற்ற இந்த ஆட்டத்தின் ஆரம்பம் முதலே ஆதிக்கம் செலுத்திய இந்திய அணி 7-ஆவது நிமிடத்தில் முதல் கோலை அடித்தது. இந்த கோலை சிவம் ஆனந்த் அடித்தார்.
தொடர்ந்து அபாரமாக ஆடிய இந்திய அணியில் தில்பிரீத் சிங் 32-ஆவது நிமிடத்தில் கிடைத்த பெனால்டி வாய்ப்பை பயன்படுத்தி கோலடித்தார். இதனால் முதல் பாதி ஆட்டநேர முடிவில் இந்திய அணி 2-0 என முன்னிலை பெற்றது.
பின்னர் நடைபெற்ற 2-ஆவது பாதி ஆட்டத்தின் 46-ஆவது நிமிடத்தில் மற்றொரு பெனால்டி வாய்ப்பின் மூலம் 3-ஆவது கோலை அடித்தது இந்தியா. இந்த கோலை நீலம் சஞ்ஜீவ் அடித்தார்.
அதேநேரத்தில் மறுமுனையில் சரிவிலிருந்து மீள்வதற்கு போராடிய பாகிஸ்தான் அணிக்கு ஆறுதல் கோல் மட்டுமே கிடைத்தது. இந்த கோலை அந்த அணியின் அம்ஜத் அலி கான் (63-ஆவது நிமிடம்) அடித்தார். வெள்ளிக்கிழமை நடைபெறும் இறுதி ஆட்டத்தில் வங்கதேசத்தை சந்திக்கிறது இந்தியா. அரையிறுதியில் பாகிஸ்தானை வீழ்த்திய இந்திய அணிக்கு மத்திய விளையாட்டுத் துறை அமைச்சர் விஜய் கோயல் சுட்டுரை மூலம் வாழ்த்து தெரிவித்துள்ளார்.