தமிழ்நாடு சீருடைப் பணியாளர் தேர்வாணையம் நடத்திய காவலர் பணிக்கான எழுத்துத் தேர்வில் திருவள்ளூர் மாவட்டத்தில் 14,624 பேர் பங்கேற்றனர்.
தமிழ்நாடு சீருடைப் பணியாளர் தேர்வாணையம் சார்பில், தமிழக காவல் துறையில் காலியாக உள்ள 2-ஆம் நிலை காவலர், 2-ஆம் நிலை சிறைக்காவலர், தீயணைப்பு வீரர்கள் பணியிடங்களுக்கு எழுத்துத் தேர்வு மாநிலம் முழுவதும் ஞாயிற்றுக்கிழமை நடைபெற்றது.
திருவள்ளூர் மாவட்டத்தில் அமைக்கப்பட்டிருந்த 9 மையங்களில் 14,624 பேர் தேர்வெழுதினர். இதுகுறித்து மாவட்ட எஸ்.பி. சிபி சக்கரவர்த்தி கூறியதாவது:
திருவள்ளூர் மாவட்டத்தில் வேப்பம்பட்டு, அரண்வாயல் குப்பம், காக்களூர், திருவள்ளூர், திருப்பாச்சூர், பாண்டூர், கொழுந்தலூர் உள்ளிட்ட 9 மையங்களில் இந்த தேர்வு நடைபெற்றது.
பைகள், புத்தகங்கள், செல்லிடப்பேசி, கால்குலேட்டர், ப்ளுடூத், கைக்கடிகாரம் போன்ற பொருள்கள் தேர்வு மையத்துக்குள் கொண்டு செல்ல தடை விதிக்கப்பட்டுள்ளது. ஒவ்வொரு தேர்வு மையத்திலும் ஒரு டி.எஸ்.பி., 3 காவல் ஆய்வாளர்கள், 10 உதவி ஆய்வாளர்கள், 50 போலீஸார் கொண்ட குழுவினர் கண்காணிப்புப் பணியில் ஈடுபட்டிருந்தனர்.
தேர்வு தொடங்கியது முதல் முடியும் வரை அனைத்தும் விடியோ பதிவு செய்யப்பட்டுள்ளது. தேர்வில் 80 ஒரு மதிப்பெண் கேள்விகள் கேட்கப்பட்டுள்ளன. இதற்காக 4 விதமான கேள்வித்தாள்கள் தயாரிக்கப்பட்டுள்ளன. இதனால், அருகில் இருப்பவர்களை பார்த்து எழுத முடியாது என்றார்.
இந்நிலையில், பாண்டூரில் உள்ள இந்திரா பொறியியல் கல்லூரியில் அமைக்கப்பட்டிருந்த தேர்வு மையத்தை தமிழ்நாடு காவல் உயர்மட்ட பயிற்சியகத்தின் தலைவர் அறிவுச்செல்வம் நேரில் பார்வையிட்டு ஆய்வு செய்தார்.