திருவண்ணாமலையில் 6-ஆம் வகுப்பு மாணவி 3 நிமிடங்களில் 103 யோகாசனங்களை செய்து கின்னஸ் சாதனை முயற்சியில் ஈடுபட்டார்.
திருவண்ணாமலையைச் சேர்ந்த தனியார் பள்ளி 6-ஆம் வகுப்பு மாணவி மிஷ்தி (13). கடந்த 3 ஆண்டுகளாக யோகா பயிற்சி பெற்று வந்தார். இவர், 3 நிமிடங்களில் 103 யோகாசனங்களை செய்து காண்பித்து சனிக்கிழமை கின்னஸ் சாதனை முயற்சியில் ஈடுபட்டார்.
திருவண்ணாமலை ஸ்ரீவிடிஎஸ் ஜெயின் மேல்நிலைப் பள்ளியில் இந்த சாகச நிகழ்ச்சி நடைபெற்றது. யுனிவர்சல் புக்ஸ் ஆஃப் ரெக்கார்ட் நிறுவன நடுவர்கள் பங்கேற்று இந்த சாதனையை பார்வையிட்டனர். இதுவரை 3 நிமிடங்களில் 85 யோகா செய்தது உலக சாதனையாக உள்ளது.
மாணவியின் சாதனை விடியோ பதிவு செய்யப்பட்டு, சாதனை நிறுவனத்துக்கு அனுப்பி வைக்கப்பட உள்ளது. சாதனை படைத்த மாணவியை மாவட்ட ஆட்சியர் கே.எஸ்.கந்தசாமி, மாவட்ட முதன்மைக் கல்வி அலுவலர் வெ.ஜெயக்குமார் ஆகியோர் பாராட்டினர்.