ராமேசுவரம் ராமநாத சுவாமி திருக்கோயிலில் தை அமாவாசையை முன்னிட்டு ஜன.16 இல் அதிகாலை 2.30 மணிக்கு நடை திறக்கப்படும்.
இது குறித்து கோயில் இணை ஆணையர் கோ.செ.மங்கையர்கரசி வெளியிட்டுள்ள செய்தி குறிப்பு: வரும் ஜன.16 ஆம் தேதி (செவ்வாய்கிழமை) தை அமாவாசை வருவதை முன்னிட்டு அன்றைய தினம் அதிகாலை 02.30 மணிக்கு கோயில் நடை திறந்து 3.30 மணி முதல் 4.30 மணி வரையில் ஸ்படிகலிங்க பூஜையும், அதனைத் தொடர்ந்து, காலபூஜைகளும் நடைபெறும். காலை 7 மணிக்கு அக்னி தீர்த்தக் கரைக்கு ஸ்ரீராமர் பஞ்ச மூர்த்திகள் சகிதம் புறப்பாடாகி தீர்த்தவாரி உற்சவம் நடைபெறும். தொடர்ந்து பகல் முழுவதிலும் திருக்கோயில் நடை திறந்திருக்கும். இரவு 8 மணிக்கு ஸ்ரீபஞ்சமூர்த்திகளுடன் வெள்ளி ரதத்தில் ஸ்ரீராமர், புறப்பாடு நடைபெறும் என தெரிவிக்கப்பட்டுள்ளது.