டாடா மோட்டார்ஸுக்கு சொந்தமான ஜாகுவர் லேண்ட் ரோவர் (ஜேஎல்ஆர்) கார் விற்பனை சென்ற செப்டம்பரில் 6.6 சதவீதம் வளர்ச்சி கண்டது.
இதுகுறித்து ஜேஎல்ஆர் செய்திக் குறிப்பில் தெரிவிக்கப்பட்டுள்ளதாவது:
நடப்பு ஆண்டு செப்டம்பரில் 65,097 ஜாகுவர் லேண்ட் ரோவர் கார்கள் விற்பனை செய்யப்பட்டன. கடந்த ஆண்டு இதே கால அளவில் மேற்கொள்ளப்பட்ட விற்பனையுடன் ஒப்பிடுகையில் இது 6.6 சதவீதம் அதிகமாகும்.
எஃப்-பேஸ், அகலமான சக்கரங்களையுடைய எக்ஸ்எஃப்எல் மாடல்களின் விற்பனை சீனாவில் விறுவிறுப்படைந்ததையடுத்து ஜாகுவர் பிராண்ட் கார்களின் விற்பனை சென்ற செப்டம்பரில் 3.9 சதவீதம் அதிகரித்து 18,336-ஆனது.
வாடிக்கையாளர்கள் மத்தியில் வேலர் மாடல் கார்களுக்கு மவுசு அதிகரித்ததையடுத்து லேண்ட் ரோவர் கார் விற்பனை 7.7 சதவீதம் அதிகரித்து 46,761-ஆனது. சமீபத்திய அறிமுகங்களான ரேஞ்ச் ரோவர் பிரிவில் வேலர், ஜாகுவர் எக்ஸ்எஃப் ஸ்போர்ட்பிரேக், வாடிக்கையாளர்களிடையே வரவேற்பு பெருகியுள்ளது.
சீனா, வட அமெரிக்கா உள்ளிட்ட பகுதிகளில் ஜேஎல்ஆர் விற்பனை விறுவிறுப்படைந்துள்ளது. அதேசமயம், பிரிட்டனில் விற்பனை சரிந்துள்ளதாக அந்த செய்திக்குறிப்பில் தெரிவிக்கப்பட்டுள்ளது.