இந்தியாவின் இரண்டாவது மிகப்பெரிய தகவல் தொழில்நுட்ப ஏற்றுமதி நிறுவனமான இன்ஃபோசிஸ் மூன்றாம் காலாண்டு நிகர லாபம் 38.3 சதவீதம் அதிகரித்தது.
இதுகுறித்து அந்த நிறுவனம் மும்பை பங்குச் சந்தைக்கு வெள்ளிக்கிழமை அளித்த அறிக்கையில் தெரிவித்துள்ளதாவது:
நடப்பு 2017-18 நிதி ஆண்டின் அக்டோபர் முதல் டிசம்பர் வரையிலான மூன்றாம் காலாண்டில் இன்ஃபோசிஸ் நிறுவனம் ரூ.17,794 கோடி வருவாய் ஈட்டியது. கடந்த நிதி ஆண்டின் இதே கால அளவில் ஈட்டிய வருவாய் ரூ.17,273 கோடியுடன் ஒப்பிடுகையில் இது 3 சதவீதம் அதிகம்.
நிகர லாபம் ரூ.3,708 கோடியிலிருந்து 38.3 சதவீதம் அதிகரித்து ரூ.5,129 கோடியாக இருந்தது.
நடப்பு நிதி ஆண்டில் நிறுவனத்தின் விற்பனை வளர்ச்சி ரூபாய் மதிப்பு அடிப்படையில் 5.5-6.5 சதவீதம் என்ற அளவில் இருந்து வருகிறது.
மூன்றாம் காலாண்டு லாபம் அதிகரித்ததையடுத்து, பங்கு ஒன்றின் மூலம் ஈட்டும் அடிப்படை வருவாய் ரூ.6.29 உயர்ந்தது. டிசம்பர் காலாண்டு நிலவரப்படி பணியாளர்கள் எண்ணிக்கை 2.01 லட்சமாக உள்ளது என இன்ஃபோசிஸ் அந்த அறிக்கையில் தெரிவித்துள்ளது.